கிரிக்கெட்

முதலாவது ஒரு நாள் கிரிக்கெட்டில் இலங்கை அணியை வீழ்த்தியது வங்காளதேசம் + "||" + Bangladesh defeated Sri Lanka in the first one day cricket

முதலாவது ஒரு நாள் கிரிக்கெட்டில் இலங்கை அணியை வீழ்த்தியது வங்காளதேசம்

முதலாவது ஒரு நாள் கிரிக்கெட்டில் இலங்கை அணியை வீழ்த்தியது வங்காளதேசம்
முதலாவது ஒரு நாள் கிரிக்கெட்டில் இலங்கை அணியை வங்காளதேசம் 33 ரன்கள் வித்தியாசத்தில் வீழ்த்தி வெற்றி பெற்றது.
டாக்கா, 

வங்காளதேசத்துக்கு சென்றுள்ள இலங்கை கிரிக்கெட் அணி 3 போட்டிகள் கொண்ட ஒரு நாள் தொடரில் ஆடுகிறது. இதன் முதலாவது ஒரு நாள் போட்டி டாக்காவில் நேற்று பகல்-இரவு மோதலாக நடந்தது. மெதுவான தன்மை கொண்ட மந்தமான இந்த ஆடுகளத்தில் ‘டாஸ்’ ஜெயித்து முதலில் பேட் செய்த வங்காளதேச அணி 50 ஓவர்களில் 6 விக்கெட்டுக்கு 257 ரன்கள் சேர்த்தது. கேப்டன் தமிம் இக்பால் (52 ரன்), விக்கெட் கீப்பர் முஷ்பிகுர் ரஹிம் (84 ரன், 87 பந்து, 4 பவுண்டரி, ஒரு சிக்சர்), மக்முதுல்லா (54 ரன்) ஆகியோர் அரைசதம் விளாசினர். அடுத்து களம் இறங்கிய இலங்கை அணி 48.1 ஓவர்களில் 224 ரன்களுக்கு ஆல்-அவுட் ஆனது. அதிகபட்சமாக 8-வது வரிசையில் ஆடிய ஹசரங்கா 74 ரன்களும் (60 பந்து, 3 பவுண்டரி, 5 சிக்சர்), புதிய கேப்டன் குசல் பெரேரா 30 ரன்களும் எடுத்தனர். இதன் மூலம் வங்காளதேசம் 33 ரன்கள் வித்தியாசத்தில் வெற்றி பெற்றது. சுழற்பந்து வீச்சாளர் மெஹிதி ஹசன் 4 விக்கெட்டுகளும், வேகப்பந்து வீச்சாளர் முஸ்தாபிஜூர் ரகுமான் 3 விக்கெட்டுகளும் வீழ்த்தினர்.

முன்னதாக நடத்தப்பட்ட கொரோனா பரிசோதனையில் இலங்கை அணியைச் சேர்ந்த 3 பேருக்கு கொரோனா தொற்று உறுதி செய்யப்பட்டிருப்பதாக வெளியான தகவலால் பரபரப்பு ஏற்பட்டது. இதனால் ஆட்டம் நடக்குமா என்ற சந்தேகம் கிளம்பியது. பிறகு மறுபடியும் நடத்தப்பட்ட சோதனையில் இரண்டு முடிவு தவறானது என்பது தெரியவந்தது. மற்றொருவருக்கு மட்டும் கொரோனா இருப்பதற்கான ‘பாசிட்டிவ்’ முடிவு 2-வது முறையாக வந்தது. ஆனாலும் அவர் கொரோனா தடுப்பு மருத்துவ பாதுகாப்பு வளையத்திற்குள் நல்ல நிலையில் இருப்பதால் இது பெரிதாக எடுத்துக் கொள்ளப்படவில்லை. இந்த கொரோனா பிரச்சினைக்கு மத்தியில் போட்டி தடங்கலின்றி நடந்து முடிந்திருக்கிறது.

இவ்விரு அணிகள் இடையிலான 2-வது ஒரு நாள் போட்டி இதே மைதானத்தில் நாளை நடக்கிறது.