டெஸ்ட் கிரிக்கெட்: பந்து வீச்சாளர்கள் தரவரிசையில் பும்ரா முன்னேற்றம்

இதன்படி பேட்ஸ்மேன்கள் தரவரிசையில் முதல் 10 இடங்களில் எந்த மாற்றமும் இல்லை. 4-வது டெஸ்டில் சோபிக்காத இங்கிலாந்து கேப்டன் ஜோ ரூட் 13 புள்ளிகளை இழந்தாலும் 903 புள்ளிகளுடன் முதலிடத்தில் நீடிக்கிறார். நியூசிலாந்து கேப்டன் கேன் வில்லியம்சன் (901 புள்ளிகள்) 2-வது இடத்திலும், ஆஸ்திரேலிய வீரர்கள் ஸ்டீவன் சுமித் (891 புள்ளிகள்), லபுஸ்சேன் (878 புள்ளிகள்) முறையே 3-வது, 4-வது இடத்திலும் தொடருகின்றனர். 2-வது இன்னிங்சில் சதம் அடித்த இந்திய அணியின் தொடக்க ஆட்டக்காரர் ரோகித் சர்மா (813 புள்ளிகள்) 40 புள்ளிகள் அதிகரித்து 5-வது இடத்திலும், இந்திய அணி கேப்டன் விராட்கோலி (783 புள்ளிகள்) 10 புள்ளிகள் உயர்ந்து 6-வது இடத்திலும் நீடிக்கின்றனர். இரண்டு இன்னிங்சிலும் அரைசதம் விளாசிய இந்திய அணியின் ஆல்-ரவுண்டர் ஷர்துல் தாக்குர் 59 இடங்கள் முன்னேறி 79-வது இடத்தை பிடித்துள்ளார். அத்துடன் 4 விக்கெட் வீழ்த்தியதன் பலனாக 7 இடங்கள் உயர்ந்து பவுலிங் தரவரிசையில் 49-வது இடம் பெற்றுள்ளார். இங்கிலாந்து வீரர் ஆலி போப் முதல் இன்னிங்சில் 82 ரன்கள் எடுத்ததால் 9 இடங்கள் முன்னேறி 49-வது இடத்தை அடைந்துள்ளார்.

பந்து வீச்சாளர்கள் தரவரிசையில் கம்மின்ஸ் (ஆஸ்திரேலியா), ஆர்.அஸ்வின் (இந்தியா), டிம் சவுதி (நியூசிலாந்து), ஹேசில்வுட் (ஆஸ்திரேலியா) முறையே முதல் 4 இடங்களில் மாற்றமின்றி தொடருகின்றனர். இங்கிலாந்து வேகப்பந்து வீச்சாளர் ஜேம்ஸ் ஆண்டர்சன் 2 இடங்கள் சரிந்து 7-வது இடத்துக்கு பின்தங்கினார். நீல் வாக்னெர் (நியூசிலாந்து), காஜிசோ ரபடா (தென்ஆப்பிரிக்கா) தலா ஒரு இடம் முன்னேறி முறையே 5-வது, 6-வது இடத்தை பிடித்துள்ளனர். ஷகீன் அப்ரிடி (பாகிஸ்தான்) 8-வது இடத்தில் தொடருகிறார். இந்திய வேகப்பந்து வீச்சாளர் ஜஸ்பிரித் பும்ரா ஒரு இடம் ஏற்றம் கண்டு 9-வது இடத்தை பிடித்து இருக்கிறார். ஜாசன் ஹேல்டர் (வெஸ்ட்இண்டீஸ்) 10-வது இடத்துக்கு சறுக்கி உள்ளார்.

ஆல்-ரவுண்டர்கள் தரவரிசையில் ஜாசன் ஹோல்டர் (வெஸ்ட்இண்டீஸ்), பென் ஸ்டோக்ஸ் (இங்கிலாந்து), ரவீந்திர ஜடேஜா (இந்தியா) முறையே முதல் 3 இடங்களில் மாற்றமின்றி நீடிக்கின்றனர். இந்திய சுழற்பந்து வீச்சாளர் ஆர்.அஸ்வின் ஒரு இடம் சரிந்து 5-வது இடத்தை பெற்றுள்ளார். வங்காளதேசத்தின் ஷகிப் அல்-ஹசன் ஒரு இடம் முன்னேறி 4-வது இடம் பிடித்து இருக்கிறார். இங்கிலாந்து வீரர் கிறிஸ் வோக்ஸ் 2 இடம் உயர்ந்து 9-வது இடத்தை தனதாக்கி இருக்கிறார்.