20 ஓவர் கிரிக்கெட் தரவரிசை: தென்ஆப்பிரிக்க வீரர் டி காக் முன்னேற்றம்

துபாய்,

சர்வதேச 20 ஓவர் கிரிக்கெட் வீரர்களின் புதிய தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.) நேற்று வெளியிட்டது. இதில் பேட்ஸ்மேன்களின் தரவரிசையில் தென்ஆப்பிரிக்க அணியின் விக்கெட் கீப்பர் குயின்டான் டி காக் 4 இடங்கள் முன்னேறி 8-வது இடத்தை பிடித்துள்ளார். நேற்று முன்தினம் நிறைவடைந்த இலங்கைக்கு எதிரான 20 ஓவர் தொடரில் 3 ஆட்டங்களில் ஆடி 153 ரன்கள் எடுத்து தொடரை கைப்பற்ற வித்திட்டதன் மூலம் அவருக்கு இந்த ஏற்றம் கிடைத்துள்ளது. 

20 ஓவர் பேட்டிங் தரவரிசையில் டாப்-10 இடத்திற்குள் அவர் நுழைவது இதுவே முதல் முறையாகும். இந்திய கேப்டன் விராட் கோலி ஒரு இடம் முன்னேறி 4-வது இடத்தை பிடித்துள்ளார். மற்றொரு இந்திய வீரர் லோகேஷ் ராகுல் 6-வது இடத்தில் உள்ளார். டாப்-3 இடங்களில் டேவிட் மாலன் (இங்கிலாந்து), பாபர் அசாம் (பாகிஸ்தான்), ஆரோன் பிஞ்ச் (ஆஸ்திரேலியா) மாற்றமின்றி நீடிக்கிறார்கள்.

பந்து வீச்சாளர்கள் தரவரிசையில் முதல் 7 இடங்களை ஆக்கிரமித்துள்ள சுழற்பந்து வீச்சாளர்கள் மாற்றமின்றி அப்படியே நீடிக்கிறார்கள். முதலிடத்தில் ஷம்சியும் (தென்ஆப்பிரிக்கா), 2-வது இடத்தில் ஹசரங்காவும் (இலங்கை) உள்ளனர். இந்திய தரப்பில் அதிகபட்சமாக புவனேஷ்வர்குமார் 12-வது இடம் வகிக்கிறார்.