சையத் முஷ்டாக் அலி காலிறுதி: கேரளாவை வீழ்த்தி அரையிறுதிக்கு முன்னேறியது தமிழகம்

டெல்லி,

சையத் முஷ்டாக் அலி கோப்பைக்கான காலிறுதி சுற்றுக்கு தமிழ்நாடு, ராஜஸ்தான், பெங்கால், குஜராத், ஹைதராபாத், கேரளா, விதர்பா, கர்நாடகம் ஆகிய அணிகள்  தகுதி பெற்றுள்ளன.

இந்த நிலையில் இன்று நடைபெற்ற காலிறுதியில் தமிழ்நாடு-கேரள அணிகள் மோதின. இப்போட்டியில் டாஸ் வென்ற தமிழகம் பந்துவீச்சைத் தேர்வு செய்தது. அதன்படி கேரளத்தின் தொடக்க வீரர் ரோஹன் 51 ரன்கள் எடுத்தார். விஷ்ணு வினோத் 26 பந்துகளில் 7 சிக்ஸர்கள், 2 பவுண்டரிகளுடன் 65 ரன்கள் குவித்து அந்த அணியின் ஸ்கோரை வெகுவாக உயர்த்தினார். இறுதியில் கேரள அணி 20 ஓவர்களில் 4 விக்கெட் இழப்புக்கு 181 ரன்கள் எடுத்துள்ளது. தமிழக அணி தரப்பில் சஞ்சய் யாதவ் 2 விக்கெட்டுகளை வீழ்த்தினார்.

182 ரன்கள் எடுத்தால் வெற்றி என்ற இலக்குடன் களமிறங்கிய தமிழக அணி வீரர்கள் அனைவரும் அணியின் வெற்றிக்காக சிறப்பான பங்களிப்பை அளித்தனர். அதிகபட்சமாக சாய் சுதர்சன் 31 பந்துகளில் 7 பவுண்டரியுடன் 46 ரன்களை விளாசினார். இறுதியில் ஷாருக் கான் 19 ரன்கள் எடுத்து அணியை வெற்றிபெறச் செய்தார். இதன் மூலம் தமிழக அணி அரையிறுதிக்கு முன்னேறியுள்ளது.