டெஸ்ட் தரவரிசை: ஆஸ்திரேலிய வீரர் டிராவிஸ் ஹெட் 2-வது இடத்துக்கு முன்னேற்றம்

துபாய்,

சர்வதேச கிரிக்கெட் கவுன்சில் (ஐ.சி.சி.) டெஸ்ட் கிரிக்கெட் வீரர்களின் புதிய தரவரிசை பட்டியலை நேற்று வெளியிட்டது. இதன்படி பேட்ஸ்மேன்கள் தரவரிசையில் ஆஸ்திரேலியாவின் டிராவிஸ் ஹெட் (874 புள்ளி) இரு இடம் முன்னேறி 2-வது இடத்தை பிடித்துள்ளார். இங்கிலாந்துக்கு எதிராக ஹெட்டிங்லேயில் நடந்த ஆஷஸ் 3-வது டெஸ்டில் 39 மற்றும் 77 ரன்கள் வீதம் எடுத்ததன் மூலம் இந்த ஏற்றம் கிடைத்துள்ளது. அவரது சிறந்த தரநிலை இதுவாகும். தற்போது முதலிடம் வகிக்கும் நியூசிலாந்தின் கேன் வில்லியம்சனை (883 புள்ளி) விட 9 புள்ளி மட்டுமே பின்தங்கி உள்ள டிராவிஸ் ஹெட், 4-வது டெஸ்டில் அசத்தினால் 'நம்பர் ஒன்' பேட்ஸ்மேனாக உயர்ந்து விடுவார். அதே சமயம் ஹெட்டிங்லே டெஸ்டில் சொதப்பிய ஆஸ்திரேலியாவின் ஸ்டீவன் சுமித் இரு இடம் சறுக்கி 4-வது இடத்திலும், லபுஸ்சேன் இரு இடம் சரிந்து 5-வது இடத்திலும், இங்கிலாந்தின் ஜோ ரூட் ஒரு இடம் குறைந்து 6-வது இடத்திலும் உள்ளனர். இதனால் பாகிஸ்தான் கேப்டன் பாபர் அசாம் 6-ல் இருந்து 3-வது இடத்துக்கு வந்துள்ளார். இந்திய தரப்பில் ரிஷப் பண்ட் 10-வது இடத்திலும், ரோகித் சர்மா 13-வது இடத்திலும், விராட் கோலி 14-வது இடத்திலும் உள்ளனர்.

பந்து வீச்சாளர் தரவரிசையில் இந்திய சுழல் 'சூறாவளி' அஸ்வின் (860 புள்ளி) முதலிடத்தில் நீடிக்கிறார். அவரை நெருங்கி வரும் ஆஸ்திரேலியாவின் பேட் கம்மின்ஸ் (828 புள்ளி) 2-வது இடத்தில் இருக்கிறார். ஆஸ்திரேலியாவுக்கு எதிரான 3-வது டெஸ்டில் மொத்தம் 7 விக்கெட்டுகள் வீழ்த்தி ஆட்டநாயகனாக ஜொலித்த இங்கிலாந்து வேகப்பந்து வீச்சாளர் மார்க்வுட் 9 இடம் அதிகரித்து 26-வது இடத்தை பெற்றுள்ளார். ஸ்டூவர்ட் பிராட் 4 இடங்கள் முன்னேறி 6-வது இடத்தை எட்டியுள்ளார்.