வயலில் டிராக்டர் ஓட்டிய தோனி - இணையத்தில் வைரலாகும் வீடியோ

ராஞ்சி,

இந்திய கிரிக்கெட் அணியின் முன்னாள் கேப்டன் தோனி, பொதுவாக சமூக ஊடகங்களில் இருந்து விலகியே இருப்பார். எப்போதாவதுதான் தனது தனிப்பட்ட வாழ்க்கை குறித்த புகைப்படங்கள் வீடியோக்களை பகிர்வார்.

கடைசியாக தோனி தன்னுடைய இன்ஸ்டாகிராம் பக்கத்தில் கடந்த 2021-ம் ஆண்டு ஜனவரி 8-ம் தேதி தன்னுடைய பண்ணையில் இருந்து ஸ்ட்ராபெர்ரி பழங்களை பறித்து சாப்பிடும் வீடியோவை பதிவிட்டிருந்தார்.

இந்த நிலையில், தோனி நேற்று தன்னுடைய இன்ஸ்டாகிராம் பக்கத்தில் ஒரு வீடியோவை பகிர்ந்துள்ளார். அந்த வீடியோவில், தோனி டிராக்டர் ஓட்டி தன்னுடைய பண்ணையில் வயலை உழும் காட்சிகள் இடம்பெற்றுள்ளன.

அந்த பதிவில் அவர், 'புதிதாக ஒன்றைக் கற்றுக்கொண்டதில் மகிழ்ச்சி. ஆனால் வேலையை முடிக்கத்தான் அதிக நேரம் எடுத்தது' என்று குறிப்பிட்டுள்ளார். விவசாயியாக மாறிய தோனியின் இந்த வீடியோ தற்போது வைரலாகி வருகிறது.

நேற்று மாலையில் தோனி வீடியோவை பகிர்ந்த நிலையில், 29 லட்சத்துக்கும் அதிகமான லைக்குகள் குவிந்துள்ளன.