பெண்கள் பிரிமீயர் லீக்: வெற்றிக்கணக்கை தொடங்குமா பெங்களூரு...டெல்லியுடன் இன்று மோதல்...!

மும்பை,

முதலாவது பெண்கள் பிரிமீயர் லீக் (டபிள்யூ.பி.எல்) மும்பையில் நடைபெற்று வருகிறது. இதில் மும்பை இந்தியன்ஸ், டெல்லி கேப்பிடல்ஸ், உ.பி.வாரியட்ஸ், குஜராத் ஜெய்ண்ட்ஸ், பெங்களூரு ராயல் சேலஞ்சர்ஸ் உள்ளிட்ட 5 அணிகள் பங்கேற்று ஆடி வருகின்றன. இதில் ஒவ்வொரு அணியும் மற்ற அணியுடன் தலா 2 முறை மோத வேண்டும்.

லீக் சுற்றின் முடிவில் புள்ளிப்பட்டியலில் முதல் இடத்தை பிடிக்கும் அணி நேரடியாக இறுதிப்போட்டிக்கு தகுதி பெறும். 2வது மற்றும் 3வது இடங்களை பிடிக்கும் அணிகள் எலிமினேட்டர் போட்டியில் ஆடும். இதில் வெற்றி பெறும் அணி இறுதிப்போட்டிக்கு முன்னேறும்.

இந்நிலையில் இந்த தொடரின் இன்று நடைபெறும் ஆட்டத்தில் டெல்லி-பெங்களூரு அணிகள் மோத உள்ளன. டெல்லி இதுவரை 4 ஆட்டங்களில் ஆடி 3 வெற்றி, 1 தோல்வி என்ற நிலையில் புள்ளி பட்டியலில் 2வது இடத்தில் உள்ளது. அதேவேளையில் பாதி தொடர் முடிவடைந்த பின்னரும் பெங்களூரு அணி இன்னும் ஒரு வெற்றியை கூட பதிவு செய்யவில்லை. அந்த அணி ஆடிய 4 போட்டிகளிலும் தோல்வியை சந்தித்துள்ளது.

இதனால் பெண்கள் பிரிமீயர் லீக்கில் தங்களது முதலாவது வெற்றியை பதிவு செய்ய வேண்டிய கட்டாயத்தில் அந்த அணி உள்ளது. பெங்களூரு இந்த ஆட்டத்தில் தோல்வி அடைந்தால் அடுத்த சுற்றுக்கு செல்ல வாய்ப்பு மிகவும் குறைந்து விடும். இந்திய நேரப்படி ஆட்டம் இரவு 7.30 மணிக்கு தொடங்குகிறது.