உலக கோப்பை கால்பந்தில் ஐரோப்பிய அணிகள் ஆதிக்கம்

சோச்சி, 

உலக கோப்பை கால்பந்து போட்டியை பொறுத்தவரை ஐரோப்பா, தென்அமெரிக்க கண்டத்தை சேர்ந்த அணிகளே கோப்பையை மாறி மாறி வென்று வருகின்றன. இதுவரை 11 முறை ஐரோப்பிய நாடுகளும், 9 முறை தென்அமெரிக்க நாடுகளும் மகுடம் சூடியுள்ளன. இந்த முறை அரைஇறுதியை எட்டியுள்ள 4 அணிகளும் ஐரோப்பிய கண்டத்தை சேர்ந்த அணிகளாகும். உலக கோப்பை வரலாற்றில் அரைஇறுதிக்கு 4 ஐரோப்பிய அணிகள் ஒருசேர வருவது இது 5-வது நிகழ்வாகும். இதற்கு முன்பு 1934, 1966, 1982, 2006-ம் ஆண்டுகளில் இவ்வாறு நடந்துள்ளது.

இந்த உலக கோப்பையில் தென்அமெரிக்க கண்டத்தில் இருந்து பிரேசில், உருகுவே, அர்ஜென்டினா, கொலம்பியா, பெரு ஆகிய 5 அணிகள் தகுதி பெற்றிருந்தது. இந்த அணிகளின் சவால் கால்இறுதியோடு முடிந்து போனது. ஐரோப்பாவில் நடத்தப்படும் உலக கோப்பை போட்டிகளில் தென்அமெரிக்க அணி 1958-ம் ஆண்டுக்கு பிறகு உலக கோப்பையை வென்றதில்லை. பிரேசிலின் வெளியேற்றத்தின் மூலம் அந்த சோகம் இந்த முறையும் நீடிக்கிறது.