கோபா அமெரிக்கா கால்பந்து: பிரேசில் அணி இறுதிப்போட்டிக்கு தகுதி 1-0 கோல் கணக்கில் பெருவை வீழ்த்தியது

ரியோடிஜெனீரோ,

47-வது கோபா அமெரிக்கா கால்பந்து போட்டி பிரேசிலில் நடந்து வருகிறது. இதில் நேற்று முன்தினம் இரவு நடந்த முதலாவது அரைஇறுதி ஆட்டத்தில் நடப்பு சாம்பியன் பிரேசில் அணி, முன்னாள் சாம்பியனான பெருவை எதிர்கொண்டது. இரு அணிகளும் சமபலத்துடன் மல்லுக்கட்டியதால் ஆட்டம் தொடக்கம் முதலே விறுவிறுப்பாக நகர்ந்தது. பிரேசில் வீரர்கள் கேஸ்மிரோ, நெய்மார், ரிச்சர்லிசன் ஆகியோர் ஆரம்பத்தில் கோலை நோக்கி அடித்த அதிரடியான ஷாட்களை பெரு அணியின் கோல்கீப்பர் பெட்ரோ கேலஸ் அபாரமாக தடுத்து முறியடித்தார்.

35-வது நிமிடதில் பிரேசில் அணி கோல் அடித்தது. நெய்மார் பின்கள வீரர்களை லாவகமாக ஏமாற்றி பக்கவாட்டில் கடத்தி கொடுத்த பந்தை சக வீரர் லூகாஸ் பக்யூட்டா இடது காலால் உதைத்து கோல் வலைக்குள் அனுப்பினார். பிற்பாதியில் பதில் கோல் திருப்ப போராடிய பெரு அணியின் முயற்சிகளை பிரேசில் கோல்கீப்பர் எடெர்சன் முறியடித்தார். முடிவில் பிரேசில் 1-0 என்ற கோல் கணக்கில் பெருவை வீழ்த்தி இறுதிப்போட்டிக்கு முன்னேறியது.

வருகிற 10-ந் தேதி நடைபெறும் இறுதிப்போட்டியில் பிரேசில் அணி, அர்ஜென்டினா-கொலம்பியா அணிகள் இடையிலான 2-வது அரைஇறுதியில் வெற்றி பெறும் அணியுடன் மோதும். இறுதிப்போட்டியில் அர்ஜென்டினாவை சந்திக்க விரும்புகிறோம் என்று பிரேசில் அணியின் நட்சத்திர வீரர் நெய்மார் தனது ஆசையை வெளிப்படுத்தி இருக்கிறார்.