கால்பந்து

இங்கிலாந்து ரசிகர்களே நிறைய பாஸ்தா சாப்பிடுங்கள்; இத்தாலிய வீரர் கிண்டல் + "||" + UK fans eat a lot of pasta; Italian player tease

இங்கிலாந்து ரசிகர்களே நிறைய பாஸ்தா சாப்பிடுங்கள்; இத்தாலிய வீரர் கிண்டல்

இங்கிலாந்து ரசிகர்களே நிறைய பாஸ்தா சாப்பிடுங்கள்; இத்தாலிய வீரர் கிண்டல்
யூரோ இறுதி போட்டியில் நிறைய பாஸ்தா சாப்பிடுங்கள் என இங்கிலாந்து ரசிகர்களை நோக்கி கூறி இத்தாலிய வீரர் கிண்டல் செய்து கடுப்பேற்றினார்.


லண்டன், 

16வது ஐரோப்பிய கால்பந்து சாம்பியன்ஷிப் (யூரோ) போட்டி கடந்த மாதம் 11ந்தேதி தொடங்கியது. 24 அணிகள் பங்கேற்ற இந்த கால்பந்து திருவிழாவில் லீக் மற்றும் நாக்-அவுட் சுற்று முடிவில் இத்தாலி மற்றும் இங்கிலாந்து அணிகள் இறுதிப்போட்டிக்கு முன்னேறின.

தோல்வியே சந்திக்காமல் இறுதிசுற்றை எட்டிய இவ்விரு அணிகளில் சாம்பியன் கோப்பை யாருக்கு என்பதை நிர்ணயிக்கும் இறுதிஆட்டம் லண்டன் வெம்ப்லி ஸ்டேடியத்தில் நடைபெற்றது.

ஆட்டத்தில் முதல் பாதியில் இங்கிலாந்து அணி ஒரு கோலுடன் முன்னிலை வகித்தது. அதில் இங்கிலாந்து அணி வீரர் லூக் ஷாவின் கோல் 1 நிமிடம் 57 வது வினாடியில் அடிக்கப்பட்டது. இது யூரோ சாம்பியன்ஷிப்பின் இறுதி போட்டியில் அடித்த வேகமான கோல் ஆகும்.

இதனைத்தொடர்ந்து நடந்த 2வது பாதி ஆட்டத்தின் 67வது நிமிடத்தில் இத்தாலி அணி வீரர் லியோனர்டோ போனுக்சி கோல் அடித்து அசத்தினார். இதனால் ஆட்டம் 1-1 என்ற கோல் கணக்கில் சமநிலைக்கு வந்தது. தொடர்ந்து நடந்த ஆட்டத்தில் இரு அணிகளும் கோல் அடிக்க எடுத்துக்கொண்ட முயற்சிகள் பலனளிக்காமல் போனது. 

இதனைத்தொடர்ந்து அளிக்கப்பட்ட அதிகப்படியான நேரத்திலும் இரு அணிகளும் கோல் அடிக்கவில்லை. பின்னர் பெனாலிட்டி ஷூட் அவுட் முறையில் வெற்றியை தீர்மானிக்க முடிவு செய்யப்பட்டது. அதில் இத்தாலி அணி 3 கோல்களும், இங்கிலாந்து அணி 2 கோல்களும் அடித்தன. இதன் அடிப்படையில் இத்தாலி அணி வெற்றி பெற்று இரண்டாவது முறையாக சாம்பியன் பட்டத்தை கைப்பற்றியது.

முன்னதாக 4 முறை உலக சாம்பியனான இத்தாலி அணி இதற்கு முன்பு ஒரே ஒரு முறை யூரோ கோப்பையை (1968-ம் ஆண்டு) வென்றுள்ளது. களத்தில் அதிரடியான தாக்குதல் பாணியை கையாளுவதில் கில்லாடியான இத்தாலி அணி இந்த தொடரில் மட்டும் 12 கோல்களை போட்டிருந்தது குறிப்பிடத்தக்கது.

மகுடம் சூடியுள்ள இத்தாலி அணிக்கு ரூ.89 கோடி பரிசுத்தொகையாக வழங்கப்படுகிறது. போட்டி கட்டணம், லீக் சுற்று, நாக்-அவுட் சுற்று வெற்றிகள் எல்லாவற்றையும் சேர்த்தால் மொத்தத்தில் கிட்டத்தட்ட ரூ.300 கோடியை இத்தாலி அணி பரிசாக அள்ளியது.

போட்டியின் 67வது நிமிடத்தில் இத்தாலி அணி வீரர் போனுக்சி அடித்த கோல் ஆட்டத்தில் திருப்பு முனையாக அமைந்து வெற்றியை நிர்ணயித்தது.  யூரோ இறுதி போட்டியில் மிக வயது முதிர்ந்த (34 வயது) கோல் அடித்தவரான போனுக்சி, யூரோ இறுதி போட்டி வரலாற்றில் அதிகளவில் (18 முறை) பங்கேற்றவர் என்ற பெருமை கொண்டவர்.

அவர் போட்டியின் நடுவில் இங்கிலாந்து ரசிகர்களை நோக்கி நிறைய பாஸ்தா சாப்பிட வேண்டும்.  நிறைய பாஸ்தா சாப்பிட வேண்டிய அவசியம் ஏற்பட்டு உள்ளது என கிண்டலாக கூறினார்.  அதன்பின்னர், கேமிரா ஒன்றின் முன்னால் வந்து, கோப்பை ரோம் நகருக்கு வந்து கொண்டிருக்கிறது என்றும் கூறி இங்கிலாந்து ரசிகர்களை கடுப்பேற்றினார்.

யூரோ கோப்பையை ஜெர்மனி (3 முறை), ஸ்பெயின் (3 முறை) மற்றும் பிரான்ஸ் (2 முறை) ஆகியவற்றுக்கு அடுத்து அதிக முறை வென்ற பட்டியலில் இத்தாலி 4வது இடம் பிடித்து உள்ளது.  53 ஆண்டு இடைவெளிக்கு பின் இந்த சாதனை ஏற்படுத்தப்பட்டு உள்ளது.