சர்வதேச ஆக்கி: இறுதிப்போட்டியில் இந்திய அணி

டோக்கியோ, 

ஜப்பான் தலைநகர் டோக்கியோவில் ஒலிம்பிக் டெஸ்ட் பந்தயம் என்ற பெயரில் சர்வதேச ஆக்கி போட்டி நடைபெற்று வருகிறது. இதில் ஆண்கள் மற்றும் பெண்கள் பிரிவில் தலா 4 அணிகள் பங்கேற்றுள்ளன. ஆண்கள் பிரிவில் நேற்று நடந்த ஆட்டம் ஒன்றில் இந்திய அணி, போட்டியை நடத்தும் ஜப்பானை எதிர்கொண்டது. இதில் அபாரமாக ஆடிய இந்திய அணி 6-3 என்ற கோல் கணக்கில் ஜப்பானை வீழ்த்தி 2-வது வெற்றியை சுவைத்தது. இந்திய அணியில் நீலகண்ட ஷர்மா 3-வது நிமிடத்திலும், நீலம் ஜெஸ் 7-வது நிமிடத்திலும், மன்தீப் சிங் 9-வது, 29-வது மற்றும் 30-வது நிமிடத்திலும் (ஹாட்ரிக்), குர்ஜந்த் சிங் 41-வது நிமிடத்திலும் கோல் அடித்தனர். இந்த வெற்றியின் மூலம் புள்ளி பட்டியலில் 2-வது இடத்தை பெற்று இறுதிப்போட்டிக்கு முன்னேறிய இந்திய அணி, இந்திய நேரப்படி இன்று காலை 8.30 மணிக்கு நடக்கும் இறுதி சுற்றில் நியூசிலாந்தை எதிர்கொள்கிறது.

பெண்கள் பிரிவில் தனது கடைசி லீக்கில் சீனாவுடன் டிரா (0-0) கண்ட இந்திய அணி புள்ளி பட்டியலில் முதலிடத்தை (5 புள்ளி) பிடித்தது. இன்று நடக்கும் இறுதி ஆட்டத்தில் இந்திய அணி, ஜப்பானுடன் பலப்பரீட்சை நடத்துகிறது.