ஆண்கள் ஆக்கியில் 41 ஆண்டுக்கு பிறகு அரைஇறுதிக்கு முன்னேறியது இந்தியா

டோக்கியோ, 

டோக்கியோ ஒலிம்பிக் ஆண்கள் ஆக்கி போட்டியில் நேற்று நடந்த கால்இறுதி ஆட்டம் ஒன்றில் லீக் ஆட்டங்களில் அசத்தியதன் மூலம் (4 வெற்றி, ஒரு தோல்வி) தரவரிசையில் சிறந்த நிலையாக 3-வது இடத்துக்கு முன்னேறிய இந்திய அணி, 6-வது இடத்தில் உள்ள இங்கிலாந்தை எதிர்கொண்டது.

பரபரப்பான இந்த ஆட்டத்தில் இந்திய அணி தொடக்கம் முதலே தாக்குதல் பாணியை தொடுத்து ஆதிக்கம் செலுத்தியது. 7-வது நிமிடத்தில் இந்திய வீரர் தில்பிரீத் சிங் முதல் கோல் அடித்தார். 16-வது நிமிடத்தில் மற்றொரு இந்திய வீரர் குர்ஜந்த் சிங் கோல் போட்டார்.

45-வது நிமிடத்தில் இங்கிலாந்து வீரர் சாமுவேல் இயான் வார்ட் பெனால்டி கார்னர் வாய்ப்பை பயன்படுத்தி பதில் கோல் திருப்பினார். இதைத் தொடர்ந்து 57-வது நிமிடத்தில் இந்திய வீரர் ஹர்திக் சிங் 3-வது கோலை அடித்து மிரட்டினார். அவர் அடித்த பந்து இங்கிலாந்து கோல் கீப்பர் ஆலிவர் பெய்னி காலால் தடுத்து திரும்பியது. அதனை தன்வசப்படுத்திய ஹர்திக் மீண்டும் வலைக்குள் அனுப்பினார்.

முன்னதாக இந்திய அணியின் கேப்டன் மன்பீரித் சிங் 54-வது நிமிடத்திலும், இங்கிலாந்து வீரர் லியாம் அன்செல் 59-வது நிமிடத்திலும் நடுவரால் மஞ்சள் அட்டை காண்பிக்கப்பட்டு வெளியேற்றப்பட்டனர். இதனால் அதன் பிறகு இரு அணியினரும் 10 வீரர்களின் விளையாட வேண்டிய நெருக்கடி ஏற்பட்டது. முடிவில் இந்திய அணி 3-1 என்ற கோல் கணக்கில் இங்கிலாந்தை வீழ்த்தியது.

இந்த வெற்றியின் மூலம் இந்திய அணி ஒலிம்பிக்கில் 41 ஆண்டுக்கு பிறகு அரைஇறுதிக்குள் அடியெடுத்து வைத்துள்ளது. 8 முறை சாம்பியனான இந்திய அணி 1980-ம் ஆண்டு ஒலிம்பிக்கில் தங்கப்பதக்கம் வென்ற பிறகு தொடர்ந்து தடுமாற்றத்தை சந்தித்து வந்தது. அதன் பிறகு தற்போது தான் அரைஇறுதியை எட்டிப்பிடித்து பதக்க வாய்ப்பை நெருங்கி இருக்கிறது.

மற்றொரு கால்இறுதியில் தரவரிசையில் 4-வது இடத்தில் இருக்கும் ஜெர்மனி அணி 3-1 என்ற கோல் கணக்கில் ஒலிம்பிக் சாம்பியன் அர்ஜென்டினாவுக்கு அதிர்ச்சி அளித்தது.

இன்னொரு கால்இறுதியில் நம்பர் ஒன் அணியான ஆஸ்திரேலியா-நெதர்லாந்து அணிகள் இடையிலான ஆட்டம் 2-2 என்ற கோல் கணக்கில் சமனில் முடிந்தது. இதையடுத்து கடைபிடிக்கப்பட்ட பெனால்டி ஷூட்-அவுட்டில் ஆஸ்திரேலியா 3-0 என்ற கோல் கணக்கில் நெதர்லாந்தை விரட்டியடித்து அரைஇறுதிக்கு முன்னேறியது. இதே போல் பெல்ஜியம் அணி 3-1 என்ற கோல் கணக்கில் ஸ்பெயினை தோற்கடித்தது.

நாளை (செவ்வாய்க்கிழமை) நடைபெறும் அரைஇறுதி ஆட்டத்தில் இந்திய அணி, உலக சாம்பியனான தரவரிசையில் 2-வது இடத்தில் இருக்கும் பெல்ஜியத்தை எதிர்கொள்கிறது. காலை 7 மணிக்கு நடைபெறும் இந்த போட்டியை சோனி டென் 4 சேனல் நேரடி ஒளிபரப்பு செய்கிறது. மற்றொரு அரைஇறுதியில் ஆஸ்திரேலியா-ஜெர்மனி அணிகள் பலப்பரீட்சை நடத்துகின்றன.