பிற விளையாட்டு

தேசிய சீனியர் கைப்பந்து தமிழக அணிகள் கால்இறுதிக்கு முன்னேற்றம் + "||" + National Senior Cmd Team Tamilnadu teams are progressing forward

தேசிய சீனியர் கைப்பந்து தமிழக அணிகள் கால்இறுதிக்கு முன்னேற்றம்

தேசிய சீனியர் கைப்பந்து தமிழக அணிகள் கால்இறுதிக்கு முன்னேற்றம்
தமிழக ஆண்கள் மற்றும் பெண்கள் அணி கால்இறுதிக்கு முன்னேறியது.
கோழிக்கோடு,

தேசிய சீனியர் கைப்பந்து போட்டியில் தமிழக ஆண்கள் மற்றும் பெண்கள் அணி கால்இறுதிக்கு முன்னேறியது.

66-வது தேசிய சீனியர் கைப்பந்து சாம்பியன்ஷிப் போட்டி கோழிக்கோட்டில் நடந்து வருகிறது. இதில் 3-வது நாளான நேற்று நடந்த பெண்களுக்கான ‘ஏ’ பிரிவு கடைசி லீக் ஆட்டத்தில் தமிழக அணி, மேற்கு வங்காளத்தை எதிர்கொண்டது. விறுவிறுப்பான இந்த ஆட்டத்தில் தமிழக அணி 25-21, 25-23, 25-10 என்ற நேர்செட்டில் மேற்கு வங்காளத்தை வீழ்த்தியது. தமிழக அணியில் ராஜஸ்ரீ, உத்கர்ஷா, ஆர்யா, சரண்யா ஆகியோரின் ஆட்டம் அபாரமாக இருந்தது.

மற்றொரு லீக் ஆட்டத்தில் இந்தியன் ரெயில்வே அணி 25-13, 25-11, 25-17 என்ற நேர்செட்டில் ஆந்திராவை சாய்த்தது. ‘ஏ’ பிரிவில் லீக் முடிவில் 3 ஆட்டங்களிலும் வெற்றி பெற்ற இந்தியன் ரெயில்வே அணி முதலிடம் பிடித்தும், தமிழக அணி 2 வெற்றி, ஒரு தோல்வியுடன் 2-வது இடம் பெற்றும், மேற்கு வங்காள அணி ஒரு வெற்றி, 2 தோல்வியுடன் 3-வது இடம் பெற்றும் கால்இறுதிக்கு முன்னேறின.

ஆண்களுக்கான ‘ஏ’ பிரிவில் நடந்த லீக் ஆட்டம் ஒன்றில் ஆந்திரா 25-20, 25-21, 25-19 என்ற நேர்செட்டில் ராஜஸ்தானை தோற்கடித்தது. இதேபிரிவில் நடந்த மற்றொரு லீக் ஆட்டத்தில் கேரளா அணி 25-20, 25-20, 27-25 என்ற நேர்செட்டில் பஞ்சாப் அணியை பதம் பார்த்தது.

‘ஏ’ பிரிவில் 3 லீக் ஆட்டங்களிலும் வெற்றி பெற்ற கேரளா அணி முதலிடம் பிடித்தும், 2 வெற்றி, ஒரு தோல்வி கண்ட பஞ்சாப் அணி 2-வது இடம் பெற்றும், ஒரு வெற்றி, 2 தோல்வி கண்ட ஆந்திரா அணி 3-வது இடம் பெற்றும் கால்இறுதிக்கு தகுதி பெற்றன. ராஜஸ்தான் அணி 3 ஆட்டத்திலும் தோல்வி கண்டு நேரடியாக கால்இறுதிக்கு தகுதி பெறும் வாய்ப்பை பறிகொடுத்தது.

முந்தைய நாளில் ‘பி’ நடந்த ஆட்டம் ஒன்றில் தமிழக ஆண்கள் அணி 25-17, 25-19, 25-21 என்ற நேர்செட்டில் இமாச்சலபிரதேசத்தை தோற்கடித்தது. தொடர்ச்சியாக 2-வது வெற்றியை சுவைத்த தமிழக அணி கால் இறுதிக்குள் நுழைந்தது.