தேசிய சீனியர் கைப்பந்து கால்இறுதியில் தமிழ்நாடு-ஆந்திரா இன்று மோதல்

கோழிக்கோடு,

66-வது தேசிய சீனியர் கைப்பந்து சாம்பியன்ஷிப் போட்டி கோழிக்கோட்டில் நடந்து வருகிறது. 4-வது நாளான நேற்று நடந்த பெண்களுக்கான கால்இறுதிக்கு முந்தைய சுற்று ஆட்டம் ஒன்றில் கர்நாடக அணி 25-16, 25-17, 25-18 என்ற நேர்செட்டில் உத்தரபிரதேசத்தை தோற்கடித்து கால்இறுதிக்குள் நுழைந்தது. மற்றொரு ஆட்டத்தில் அரியானா அணி 21-25, 25-13, 25-14, 25-12 என்ற செட் கணக்கில் ஆந்திராவை வீழ்த்தி கால்இறுதிக்கு தகுதி பெற்றது.

இன்று கால்இறுதி ஆட்டங்கள் நடக்கிறது. ஆண்கள் பிரிவில் நடைபெறும் கால்இறுதி ஆட்டங்களில் தமிழ்நாடு-ஆந்திரா (பகல் 1 மணி), பஞ்சாப்-சர்வீசஸ் (பிற்பகல் 3 மணி), கேரளா-அரியானா (மாலை 5 மணி), ரெயில்வே-கர்நாடகா (இரவு 7 மணி) அணிகள் மோதுகின்றன. பெண்கள் பிரிவில் நடைபெறும் கால்இறுதி ஆட்டங்களில் ரெயில்வே-கர்நாடகம் (பகல் 1 மணி), கேரளா-அரியானா (பிற்பகல் 3 மணி), மராட்டியம்-மேற்கு வங்காளம் (மாலை 5 மணி), தமிழ்நாடு- தெலுங்கானா (இரவு 7 மணி) அணிகள் சந்திக்கின்றன.