துளிகள்

* சையது முஸ்தாக் அலி கோப்பைக்கான மும்பை அணி அறிவிக்கப்பட்டுள்ளது. ரஹானே தலைமையிலான அந்த அணியில், ஆஸ்திரேலிய பயணத்தின் போது கணுக்காலில் காயம் அடைந்த இளம் வீரர் பிரித்வி ஷா இடம் பெற்றுள்ளார்.

* இந்தியன் சூப்பர் லீக் (ஐ.எஸ்.எல்.) கால்பந்து போட்டியில் நேற்றிரவு ஜாம்ஷெட்பூரில் நடந்த 78-வது லீக் ஆட்டத்தில் புனே சிட்டி அணி 4-1 என்ற கோல் கணக்கில் ஜாம்ஷெட்பூரை ஊதித்தள்ளி, 5-வது வெற்றியை சுவைத்தது. இன்று இரவு 7.30 மணிக்கு நடக்கும் ஆட்டத்தில் பெங்களூரு எப்.சி.- டெல்லி டைனமோஸ் அணிகள் சந்திக்கின்றன.

* ஐ.-லீக் கால்பந்து தொடரில் ஸ்ரீநகரில் இன்று நடக்க இருந்த ரியல் காஷ்மீருக்கு எதிரான ஆட்டத்தில் விளையாட நடப்பு சாம்பியன் மினர்வா பஞ்சாப் அணி மறுத்தது. தங்கள் அணியில் அங்கம் வகிக்கும் வெளிநாட்டு வீரர்கள், பயங்கரவாத தாக்குதல் காரணமாக காஷ்மீருக்கு செல்ல மறுப்பதாகவும், இந்த ஆட்டத்தை வேறு இடத்துக்கு மாற்ற வேண்டும் என்றும் மினர்வா நிர்வாகம் வேண்டுகோள் விடுத்தது. இதை ஏற்றுக்கொள்ள மறுத்த இந்திய கால்பந்து சங்கம் இந்த ஆட்டத்தில் மினர்வா அணி தோற்றதாக கணக்கிடப்படும் என்று கூறியுள்ளது.