துளிகள்

* இந்தியன் சூப்பர் லீக் (ஐ.எஸ்.எல்.) கால்பந்து தொடரில் டெல்லியில் நேற்றிரவு அரங்கேறிய 79–வது லீக் ஆட்டத்தில் டெல்லி டைனமோஸ் அணி 3–2 என்ற கோல் கணக்கில் ஏற்கனவே பிளே–ஆப் சுற்றுக்கு தகுதி பெற்று விட்ட பெங்களூரு எப்.சி.யை சாய்த்து 3–வது வெற்றியை பெற்றது. இதில் ஒரு கட்டத்தில் டெல்லி அணி 1–2 என்ற கணக்கில் பின்தங்கிய நிலையில் டேனியல் லாலிம்புயா (77 மற்றும் 81–வது நிமிடம்) அடுத்தடுத்து அடித்த கோலால் வெற்றி பெற்றது. இன்றைய ஆட்டத்தில் எப்.சி. கோவா அணி, கேரளா பிளாஸ்டர்சை (இரவு 7.30 மணி) எதிர்கொள்கிறது.

*இந்திய டென்னிஸ் வீராங்கனை சானியா மிர்சா தனது டுவிட்டர் பக்கத்தில், ‘தேசத்தை பாதுகாக்கும் ராணுவத்தினரே உண்மையான ஹீரோக்கள். அவர்களுக்கும், அவரது குடும்பத்தினருக்கும் நான் இதயபூர்வமாக துணை நிற்கிறேன். ராணுவ வீரர்கள் கொல்லப்பட்ட பிப்ரவரி 14–ந்தேதி இந்தியாவுக்கு ஒரு கருப்பு நாள். அது போன்ற தினத்தை மீண்டும் நாம் ஒரு போதும் பார்க்கமாட்டோம் என்று நம்புகிறேன்’ என்று கூறியுள்ளார்.

*இங்கிலாந்துக்கு எதிரான முதல் 2 ஒரு நாள் போட்டிக்கான வெஸ்ட் இண்டீஸ் அணியில் இவின் லீவிஸ், ரோவ்மன் பவெல் மற்றும் கீமோ பவெல் ஆகியோர் காயத்தால் அவதிப்படுவதால் அவர்களுக்கு பதிலாக கார்லஸ் பிராத்வெய்ட், ஷெல்டன் காட்ரெல், ஜான் கேம்ப்பெல் சேர்க்கப்பட்டுள்ளனர். இங்கிலாந்து–வெஸ்ட் இண்டீஸ் மோதும் முதலாவது ஒரு நாள் போட்டி நாளை மறுதினம் நடக்கிறது.