புரோ கபடி லீக்: கடைசி லீக்கில் உ.பி.யோத்தா அணி வெற்றி

நொய்டா,

12 அணிகள் இடையிலான 7-வது புரோ கபடி லீக் போட்டி கடந்த ஜூலை 20-ந் தேதி தொடங்கி நடந்து வருகிறது. இறுதிகட்டத்தை நெருங்கிவிட்ட இந்த கபடி திருவிழாவில் நேற்றிரவு நொய்டாவில் கடைசி சுற்று லீக் ஆட்டங்கள் நடந்தன. இதில் தபாங் டெல்லி- மும்பை இடையிலான பரபரப்பான ஆட்டம் 37-37 என்ற புள்ளி கணக்கில் சமனில் (டை) முடிந்தது. டெல்லி அணி வெற்றி பெறும் என்று எதிர்பார்த்த நிலையில் கடைசி ரைடில் மும்பை வீரர் அபிஷேக் சிங் ஒரு புள்ளி எடுத்து அணி சமநிலையை எட்ட உதவினார்.

அதைத் தொடர்ந்து நடந்த 132-வது லீக் ஆட்டத்தில் உ.பி.யோத்தா 45-33 என்ற புள்ளி கணக்கில் நடப்பு சாம்பியன் பெங்களூரு புல்சை வீழ்த்தி 13-வது வெற்றியை சுவைத்தது. பெங்களூரு அணியில் நட்சத்திர வீரர் பவான் செராவத் 13 புள்ளிகள் சேகரித்தும் பலன் இல்லை.