பார்முலா1 கார்பந்தயத்தில் ஹாமில்டனின் ஆதிக்கம் தொடருமா? இன்று 3-வது சுற்று நடக்கிறது

மொக்யோராட்,

இந்த ஆண்டுக்கான பார்முலா1 கார்பந்தயம் கடந்த மார்ச் மாதம் தொடங்க இருந்தது. கொரோனா அபாயத்தால் சில சுற்று போட்டிகள் ரத்து செய்யப்பட்டன. ஒரு வழியாக இந்த சீசனுக்கான பார்முலா1 கார்பந்தயம் கடந்த 5-ந்தேதி ரசிகர்கள் இன்றி ஆஸ்திரியா கிராண்ட்பிரி மூலம் தொடங்கியது. இதுவரை 10 சுற்று பந்தயம் நடத்தப்படுவது உறுதி செய்யப்பட்டு இருக்கிறது. இவற்றில் 2 சுற்று முடிந்து விட்டது.

இந்த நிலையில் 3-வது சுற்றான ஹங்கேரி கிராண்ட்பிரி அங்குள்ள மொக்யோராட் ஓடுதளத்தில் இன்று (ஞாயிற்றுக்கிழமை) நடக்கிறது. 306.63 கிலோமீட்டர் இலக்கை நோக்கி வழக்கம் போல் 10 அணிகளைச் சேர்ந்த 20 வீரர்கள் சீறிபாய்வார்கள். முதலாவது சுற்றில் வால்டெரி போட்டாசும் (பின்லாந்து), 2-வது சுற்றில் 6 முறை சாம்பியனான லீவிஸ் ஹாமில்டனும் (இங்கிலாந்து) வெற்றி கண்டனர். இன்றைய பந்தயத்திலும் இவர்களே ஆதிக்கம் செலுத்த அதிக வாய்ப்பு உள்ளது.

நேற்று நடந்த தகுதி சுற்றில் ஹாமில்டன் 90-வது முறையாக முதலிடத்தை பிடித்து சாதனை படைத்தார். இதனால் இன்றைய போட்டியில் அவரது கார் முதல்வரிசையில் இருந்து புறப்படும். இந்திய நேரப்படி மாலை 6.40 மணிக்கு தொடங்கும் இந்த போட்டியை ஸ்டார் ஸ்போர்ட்ஸ் செலக்ட்2 சேனல் நேரடி ஒளிபரப்பு செய்கிறது.