டோக்கியோ ஒலிம்பிக் போட்டிக்கு தடகளத்தில் மேலும் 3 இந்தியர்கள் தகுதி

ராஞ்சி, 

தேசிய ஓபன் நடைப்பந்தய சாம்பியன்ஷிப் போட்டி ஜார்கண்ட் மாநிலம் ராஞ்சியில் நேற்று நடந்தது. இதில் ஆண்களுக்கான 20 கிலோ மீட்டர் தூர நடைப்பந்தயத்தில் அரியானாவை சேர்ந்த சந்தீப்குமார் 1 மணி 20 நிமிடம் 16 வினாடியில் பந்தய தூரத்தை கடந்து புதிய தேசிய சாதனை படைத்ததுடன் முதலிடம் பிடித்தார். மற்றொரு அரியானா வீரரான ராகுல் 1:20:26 வினாடியில் கடந்து 2-வது இடம் பெற்றார். பெண்களுக்கான 20 கிலோ மீட்டர் தூர நடைப்பந்தயத்தில் உத்தரபிரதேசத்தை சேர்ந்த பிரியங்கா கோஸ்வாமி 1 மணி 28 நிமிடம் 45 வினாடியில் பந்தய தூரத்தை அடைந்து புதிய தேசிய சாதனை படைத்ததுடன் முதலிடத்தை தனதாக்கினார். இந்த 3 பேரும் வருகிற ஜூலை மற்றும் ஆகஸ்டு மாதத்தில் நடைபெறும் டோக்கியோ ஒலிம்பிக் போட்டிக்கு தகுதி பெற்றனர். இந்த போட்டியில் ஆண்கள் பிரிவில் 1 மணி 21 நிமிடமும், பெண்கள் பிரிவில் 1 மணி 31 நிமிடமும் ஒலிம்பிக் போட்டிக்கான தகுதி இலக்காகும். இதன் மூலம் நடைப்பந்தயத்தில் தகுதி பெற்று இருக்கும் இந்தியர்களின் எண்ணிக்கை 5 ஆக அதிகரித்துள்ளது. ஏற்கனவே கே.டி.இர்பான் (ஆண்களுக்கான 20 கிலோ மீட்டர்), பாவனா ஜாட் (பெண்களுக்கான 20 கிலோ மீட்டர்) ஆகியோர் தகுதி பெற்றுள்ளனர்.