ஆல் இங்கிலாந்து பேட்மிண்டன்: அரைஇறுதியில் சிந்து தோல்வி

பர்மிங்காம், 

மொத்தம் ரூ.6 கோடி பரிசுத்தொகைக்கான ஆல் இங்கிலாந்து பேட்மிண்டன் போட்டி பர்மிங்காம் நகரில் நடந்து வருகிறது. இதில் நேற்று முன்தினம் இரவு நடந்த பெண்கள் ஒற்றையர் கால்இறுதி ஆட்டம் ஒன்றில் உலக சாம்பியனும், 7-ம் நிலை வீராங்கனையுமான இந்தியாவின் பி.வி.சிந்து 16-21, 21-16, 21-19 என்ற செட் கணக்கில் முன்னாள் நம்பர் ஒன் வீராங்கனையான ஜப்பானின் அகானே யமாகுச்சியை போராடி தோற்கடித்தார். 

இதைத் தொடர்ந்து சிந்து நேற்று நடந்த அரைஇறுதியில் தரவரிசையில் 11-வது இடம் வகிக்கும் போர்ன்பவீ சோச்சுவோங்கை (தாய்லாந்து) எதிர்கொண்டார். எதிராளியின் ஆக்ரோஷமான ஷாட்டுகளுக்கு ஈடுகொடுக்க முடியாமல் திணறிய சிந்து 17-21, 9-21 என்ற நேர் செட்டில் 45 நிமிடங்களில் தோல்வியை தழுவினார். இத்துடன் இந்த போட்டியில் இந்தியாவின் சவால் முடிவுக்கு வந்தது.

புகழ்பெற்ற ஆல் இங்கிலாந்து பேட்மிண்டனில் சிந்து இதுவரை அரைஇறுதியை தாண்டியதில்லை. அந்த சோகம் இந்த முறையும் தொடருகிறது. 2019-ம் ஆண்டு உலக சாம்பியன்ஷிப்புக்கு பிறகு சிந்து எந்த பட்டமும் வெல்லவில்லை என்பது நினைவுகூரத்தக்கது.