தரவரிசையில் பெடரர் முன்னேற்றம்


தரவரிசையில் பெடரர் முன்னேற்றம்
x
தினத்தந்தி 12 Sep 2017 12:00 AM GMT (Updated: 11 Sep 2017 8:44 PM GMT)

அமெரிக்க ஓபன் டென்னிஸ் முடிந்ததை தொடர்ந்து புதிய தரவரிசை பட்டியல் வெளியிடப்பட்டது.

ஆண்கள் ஒற்றையர் பிரிவில் ரபெல் நடால் முதலிடத்தில் நீடிக்கிறார். கால்இறுதியில் தோல்வியை தழுவிய ரோஜர் பெடரர் ஒரு இடம் முன்னேறி 2-வது இடத்தை பிடித்துள்ளார். காயம் காரணமாக கடைசி நேரத்தில் அமெரிக்க ஓபனில் ஆடுவதை தவிர்த்த இங்கிலாந்து வீரர் ஆன்டி முர்ரே ஒரு இடம் இறங்கி 3-வது இடத்துக்கு தள்ளப்பட்டுள்ளார். 4 முதல் 8-வது இடங்களில் முறையே அலெக்சாண்டர் ஸ்வெரேவ் (ஜெர்மனி), மரின் சிலிச் (குரோஷியா), நோவக் ஜோகோவிச் (செர்பியா), டொமினிக் திம் (ஆஸ்திரியா), வாவ்ரிங்கா (சுவிட்சர்லாந்து) ஆகியோர் உள்ளனர். இறுதி ஆட்டத்தில் தோற்ற கெவின் ஆண்டர்சன் மளமளவென 17 இடங்கள் ஏற்றம் கண்டு 15-வது இடத்தை பிடித்துள்ளார். இந்திய வீரர்களில் அதிகபட்சமாக ராம்குமார் 154-வது இடத்திலும், யுகி பாம்ப்ரி 157-வது இடத்திலும் இருக்கிறார்கள்.

பெண்கள் ஒற்றையர் 

தரவரிசையில் ஸ்பெயினின் கார்பின் முகுருஜா முதல்முறையாக ‘நம்பர் ஒன்’ அரியணையில் ஏறியிருக்கிறார். 2-வது இடத்தில் சிமோனா ஹாலெப்பும் (ருமேனியா), 3-வது இடத்தில் எலினா ஸ்விடோலினாவும் (உக்ரைன்) உள்ளனர். இதுவரை முதலிடத்தில் உள்ள கரோலினா பிளிஸ்கோவா (செக்குடியரசு) 4-வது இடத்துக்கு பின்தங்கினார். அமெரிக்க ஓபன் புதிய சாம்பியனான அமெரிக்காவின் ஸ்லோன் ஸ்டீபன்ஸ் 83-வது இடத்தில் இருந்து 17-வது இடத்துக்கு வந்துள்ளார்.

பெண்கள் இரட்டையர் 

தரவரிசையில் இந்திய வீராங்கனை சானியா மிர்சா ஒரு இடம் உயர்ந்து 8-வது இடம் வகிக்கிறார். ஆண்கள் இரட்டையர் தரவரிசையில் இந்தியாவின் ரோகன் போபண்ணா 19-வது இடத்திலும், புராவ் ராஜா 56-வது இடத்திலும், லியாண்டர் பெயஸ் 62-வது இடத்திலும் இருக்கிறார்கள்.

அதிக கிராண்ட்ஸ்லாம் வென்றவர்கள் யார்-யார்?

‘நம்பர் ஒன்’ வீரர் ரபெல் நடால் இதுவரை ஆஸ்திரேலிய ஓபன்-1, பிரெஞ்ச் ஓபன்-10, விம்பிள்டன்-2, அமெரிக்க ஓபன்-3 என்று மொத்தம் 16 கிராண்ட்ஸ்லாம் பட்டங்களை கைப்பற்றி அதிக கிராண்ட்ஸ்லாம் வென்றவர்களின் பட்டியலில் 2-வது இடம் வகிக்கிறார். அதிக கிராண்ட்ஸ்லாம் ருசித்த முதல் 5 வீரர்கள் விவரம் வருமாறு:-

1. ரோஜர் பெடரர் (சுவிட்சர்லாந்து)-19
2. ரபெல் நடால் (ஸ்பெயின்)-16
3. பீட்சாம்ப்ராஸ் (அமெரிக்கா)-14
4. ராய் எமர்சன் (ஆஸ்திரேலியா)-12
5. ஜோகோவிச் (செர்பியா)-12


Next Story