சின்சினாட்டி மாஸ்டர்ஸ் டென்னிஸ்: அமெரிக்க வீராங்கனை மேடிசன் கீஸ் ‘சாம்பியன்’

மாசன்,

சின்சினாட்டி மாஸ்டர்ஸ் டென்னிஸ் போட்டி அமெரிக்காவில் நடந்தது. இதன் ஆண்கள் ஒற்றையர் பிரிவு இறுதிப்போட்டியில் ரஷிய வீரர் மெட்விதேவ், டேவிட் கோபினை (பெல்ஜியம்) சந்தித்தார். விறுவிறுப்பான இந்த ஆட்டத்தில் மெட்விதேவ் 7-6 (7-3), 6-4 என்ற நேர்செட்டில் டேவிட் கோபினை வீழ்த்தி சாம்பியன் பட்டத்தை கைப்பற்றினார். இந்த பட்டத்தை மெட்விதேவ் வெல்வது இதுவே முதல்முறையாகும். இந்த வெற்றியின் மூலம் மெட்விதேவ் தரவரிசையில் 8-வது இடத்தில் இருந்து 5-வது இடத்துக்கு முன்னேறினார். இது அவருடைய சிறந்த தரநிலையாகும். 2010-ம் ஆண்டுக்கு பிறகு ‘டாப்-5’ தரவரிசையில் இடம் பிடித்த முதல் ரஷிய வீரர் என்ற பெருமையை அவர் பெற்றார். இறுதிப்போட்டியில் தோல்வி கண்ட டேவிட் கோபின் 4 இடங்கள் முன்னேறி தரவரிசையில் 15-வது இடத்தை பிடித்துள்ளார்.

பெண்கள் ஒற்றையர் பிரிவின் இறுதிப்போட்டியில் அமெரிக்க வீராங்கனை மேடிசன் கீஸ், 34 வயதான ஸ்வெட்லானா குஸ்னெட்சோவாவை (ரஷியா) எதிர்கொண்டார். பரபரப்பாக அரங்கேறிய இந்த ஆட்டத்தில் மேடிசன் கீஸ் 7-5, 7-6 (7-5) என்ற நேர்செட்டில் குஸ்னெட்சோவாவை தோற்கடித்து சாம்பியன் பட்டத்தை கைப்பற்றினார். இந்த வெற்றியின் மூலம் மேடிசன் கீஸ் தரவரிசையில் 8 இடங்கள் ஏற்றம் கண்டு மீண்டும் டாப்-10 வரிசைக்குள் இடம் பிடித்தார். தோல்வி அடைந்த குஸ்னெட்சோவா 153-வது இடத்தில் இருந்து 62-வது இடத்துக்கு முன்னேறி இருக்கிறார்.