ஷாங்காய் மாஸ்டர்ஸ் டென்னிஸ்: ஜோகோவிச், பெடரர் அதிர்ச்சி தோல்வி

ஷாங்காய்,

ஷாங்காய் மாஸ்டர்ஸ் டென்னிஸ் போட்டி சீனாவில் நடந்து வருகிறது. இதில் நேற்று நடந்த ஆண்கள் ஒற்றையர் பிரிவு கால்இறுதி ஆட்டம் ஒன்றில் நடப்பு சாம்பியனும், ‘நம்பர் ஒன்’ வீரருமான நோவக் ஜோகோவிச் (செர்பியா), தரவரிசையில் 7-வது இடத்தில் இருக்கும் ஸ்டீபனோஸ் சிட்சிபாஸ்சை (கிரீஸ்) எதிர்கொண்டார். 2 மணி 3 நிமிடம் நடந்த இந்த ஆட்டத்தில் சிட்சிபாஸ் 3-6, 7-5, 6-3 என்ற செட் கணக்கில் ஜோகோவிச்சை வீழ்த்தி அரைஇறுதிக்கு முன்னேறினார். ஜோகோவிச்சை முதல் முறையாக சாய்த்த சிட்சிபாஸ் லண்டனில் அடுத்த மாதம் நடைபெறும் ‘டாப்-8’ வீரர்கள் மட்டுமே பங்கேற்கும் ஏ.டி.பி. உலக சாம்பியன்ஷிப் போட்டிக்கு முதல்முறையாக தகுதி பெற்றார்.

மற்றொரு கால்இறுதியில் தரவரிசையில் 6-வது இடத்தில் உள்ள அலெக்சாண்டர் ஸ்வெரேவ் (ஜெர்மனி) 6-3, 6-7 (7-9), 6-3 என்ற செட் கணக்கில் 3-ம் நிலை வீரரும், முன்னாள் சாம்பியனுமான ரோஜர் பெடரருக்கு (சுவிட்சர்லாந்து) அதிர்ச்சி அளித்து அரைஇறுதிக்குள் அடியெடுத்து வைத்தார்.