இங்கிலாந்து வீரர் விடுத்த சவாலில் ஜெயித்து காட்டிய ஜோகோவிச் தம்பதி


இங்கிலாந்து வீரர் விடுத்த சவாலில் ஜெயித்து காட்டிய ஜோகோவிச் தம்பதி
x
தினத்தந்தி 12 April 2020 12:21 AM GMT (Updated: 12 April 2020 12:21 AM GMT)

ஜோகோவிச் மற்றும் அவரது மனைவி ஜெலீனா இருவரும் சேர்ந்து டென்னிஸ் விளையாடி தொடர்ச்சியாக 100 ஷாட்டுகளை அடித்து இங்கிலாந்து வீரர் ஆன்டி முர்ரே விடுத்த சவாலில் ஜெயித்து காட்டினர்.

லண்டன்,

இங்கிலாந்து முன்னணி டென்னிஸ் வீரர் ஆன்டி முர்ரேவும், அவரது மனைவி கிம் சியர்சும் சிறிய இடைவெளியில் நின்றபடி டென்னிஸ் பேட்டால் இடைவிடாது 100 ஷாட்டுகள் அடித்து விட்டு அந்த வீடியோ காட்சியை சமூக வலைதளத்தில் வெளியிட்டனர். அத்துடன் இது மாதிரி தங்களது துணையுடன் இணைந்து 100 ஷாட்டுகளை அடிக்க முடியுமா? என்று ‘நம்பர் ஒன்’ டென்னிஸ் வீரர் நோவக் ஜோகோவிச் (செர்பியா), 20 கிராண்ட்ஸ்லாம் வென்ற சாதனையாளரான ரோஜர் பெடரர் (சுவிட்சர்லாந்து) ஆகியோருக்கு சவால் விட்டிருந்தார்.

இந்த சவாலை ஏற்று ஜோகோவிச் தனது மனைவி ஜெலீனாவுடன் கைகோர்த்து டென்னிஸ் மட்டையை சுழட்டினார். தங்களது வீட்டு முற்றத்தில் நின்றபடி இருவரும் தொடர்ச்சியாக 100 ஷாட்டுகளை அடித்து சவாலில் ஜெயித்து காட்டினர். அந்த வீடியோவை தங்களது டுவிட்டர் பக்கத்தில் பதிவிட்டுள்ள ஜோகோவிச், ‘100 ஷாட் சவால் ஜெலீனாவுக்கு மிகவும் எளிதாக இருந்தது. ஜாலியாக அமைந்த இந்த சவாலுக்கு வித்திட்ட முர்ரே-கிம் தம்பதிக்கு நன்றி. அவர்களிடம் இருந்து தொடர்ந்து சவாலான விஷயங்கள் வெளிவர வேண்டும்’ என்று குறிப்பிட்டுள்ளார்.

ஆனால் முர்ரேவின் சவாலை ஏற்றுக்கொள்ள பெடரர் தயங்குகிறார். தனது மனைவியும், முன்னாள் வீராங்கனையுமான மிர்கா சமூக வலைதளம் என்றாலே கூச்சப்படுவார் என்று ரசிகரின் கேள்வி ஒன்றுக்கு பெடரர் பதில் அளித்திருக்கிறார்.

Next Story