டேபிள் டென்னிஸ் தரவரிசையில் சரத்கமல் முன்னேற்றம்

புதுடெல்லி, 

சர்வதேச டேபிள் டென்னிஸ் வீரர்களின் புதிய தரவரிசை பட்டியலில் இந்திய வீரரான தமிழகத்தை சேர்ந்த சரத்கமல் 7 இடங்கள் முன்னேறி 31-வது இடத்தை பிடித்துள்ளார். கடந்த மாதம் அவர் ஓமன் ஓபனில் பட்டம் வென்றார். அதனால் அவருக்கு இந்த ஏற்றம் கிடைத்துள்ளது. சக நாட்டவரான சத்யன் ஒரு இடம் இறங்கி 32-வது இடத்துக்கு தள்ளப்பட்டார். மற்றொரு தமிழக வீரர் அந்தோணி அமல்ராஜ் 100-வது இடம் வகிக்கிறார்.

பெண்கள் தரவரிசையில் இந்தியாவின் சிறந்த நிலையாக மனிகா பாத்ரா 63-வது இடத்தில் இருக்கிறார். சுதிர்தா முகர்ஜீ முதல் முறையாக டாப் 100-க்குள் நுழைந்துள்ளார். அவர் 14 இடங்கள் உயர்ந்து 95-வது இடத்தை பெற்றுள்ளார். கொரோனா அச்சத்தால் ஜூன் 30-ந்தேதி வரை அனைத்து டேபிள் டென்னிஸ் போட்டிகளும் தள்ளிவைக்கப்பட்டு உள்ளன. மீண்டும் போட்டி தொடங்கும் வரை தரவரிசை புள்ளிகள் அதே நிலையில் நிறுத்தி வைக்கப்படும்.