அமெரிக்க ஓபன் டென்னிஸ்: செரீனா, டொமினிக் திம் அரைஇறுதிக்கு முன்னேற்றம்


அமெரிக்க ஓபன் டென்னிஸ்: செரீனா, டொமினிக் திம் அரைஇறுதிக்கு முன்னேற்றம்
x
தினத்தந்தி 10 Sep 2020 11:03 PM GMT (Updated: 10 Sep 2020 11:03 PM GMT)

அமெரிக்க ஓபன் டென்னிஸ் போட்டியில் முன்னாள் நம்பர் ஒன் வீராங்கனை செரீனா வில்லியம்ஸ், ஆஸ்திரிய வீரர் டொமினிக் திம் அரைஇறுதிக்கு முன்னேறினார்கள்.

நியூயார்க்,

‘கிராண்ட்ஸ்லாம்’ போட்டிகளில் ஒன்றான அமெரிக்க ஓபன் டென்னிஸ் போட்டி நியூயார்க் நகரில் நடந்து வருகிறது. இதில் 10-வது நாளில் நடந்த ஆண்கள் ஒற்றையர் கால்இறுதி ஆட்டம் ஒன்றில் உலக தரவரிசையில் 3-வது இடத்தில் இருக்கும் ஆஸ்திரிய வீரர் டொமினிக் திம், 28-வது இடத்தில் உள்ள அலெக்ஸ் டி மினாரை (ஆஸ்திரேலியா) சந்தித்தார்.

இதில் தொடக்கம் முதலே அதிரடியாக விளையாடிய டொமினிக் திம் 6-1, 6-2, 6-4 என்ற நேர்செட்டில் அலெக்ஸ் டி மினாரை வீழ்த்தி முதல்முறையாக அரைஇறுதிக்குள் அடியெடுத்து வைத்தார். இந்த வெற்றியை பெற அவருக்கு 2 மணி 4 நிமிடம் தேவைப்பட்டது. அத்துடன் 27 வயதான டொமினிக் திம் அமெரிக்க ஓபன் வரலாற்றில் அரைஇறுதியை எட்டிய முதல் ஆஸ்திரிய வீரர் என்ற பெருமையையும் தனதாக்கினார்.

மற்றொரு கால்இறுதியில் தரவரிசையில் 5-வது இடத்தில் உள்ள ரஷிய வீரரான டேனில் மெட்விடேவ் 7-6 (8-6), 6-3, 7-6 (7-5) என்ற நேர்செட்டில் சக நாட்டு வீரர் ஆந்த்ரே ருப்லெவை தோற்கடித்தார். அரைஇறுதியில் மெட்விடேவ், டொமினிக் திம்மை எதிர்கொள்கிறார்.

பெண்கள் ஒற்றையர் பிரிவில் நடந்த கால் இறுதி ஆட்டம் ஒன்றில் முன்னாள் நம்பர் ஒன் வீராங்கனையும், 23 கிராண்ட்ஸ்லாம் பட்டம் வென்றவருமான செரீனா வில்லியம்ஸ் (அமெரிக்கா) 4-6, 6-3, 6-2 என்ற செட் கணக்கில் பல்கேரிய வீராங்கனை பிரோன்கோவாவை வீழ்த்தி 14-வது முறையாக அரைஇறுதிக்குள் நுழைந்தார். 38 வயதான செரீனா தொடர்ந்து 3 ஆட்டங்களில் ஒரு செட்டை பறிகொடுத்து அதன் பிறகு போராடி மீண்டு வந்திருப்பது குறிப்பிடத்தக்கது.

முன்னாள் நம்பர் ஒன் வீராங்கனையான விக்டோரியா அஸரென்கா (பெலாரஸ்) தன்னை எதிர்த்த எலிசி மெர்டென்சை (பெல்ஜியம்) 6-1, 6-0 என்ற நேர்செட்டில் துவம்சம் செய்தார். இந்த ஆட்டம் 73 நிமிடங்கள் மட்டுமே நடந்தது.

2013-ம் ஆண்டுக்கு பிறகு கிராண்ட்ஸ்லாம் போட்டி ஒன்றில் முதல்முறையாக அரைஇறுதிக்குள் வந்துள்ள அஸரென்கா அடுத்து செரீனாவுடன் பலப்பரீட்சை நடத்துகிறார். இருவரும் நேருக்கு நேர் சந்திக்க இருப்பது இது 23-வது முறையாகும். இதுவரை நடந்த மோதல்களில் செரீனா 18 முறையும், அஸரென்கா 4 தடவையும் வெற்றி பெற்று உள்ளனர்.

Next Story