கனடா சர்வதேச டென்னிஸ்: கமிலா, மெட்விடேவ் ‘சாம்பியன்’

மான்ட்ரியல்,

கனடாவின் மான்ட்ரியல் நகரில் பெண்களுக்கான சர்வதேச டென்னிஸ் போட்டி நடந்தது. இதில் ஒற்றையர் இறுதிஆட்டத்தில் உலக தரவரிசையில் 71-வது இடம் வகிக்கும் கமிலா ஜியார்ஜி (இத்தாலி) 6-3, 7-5 என்ற நேர் செட்டில் 6-ம் நிலை வீராங்கனை கரோலினா பிளிஸ்கோவாவுக்கு (செக்குடியரசு) அதிர்ச்சி அளித்து கோப்பையை தட்டிச் சென்றார். அவருக்கு இது 3-வது பட்டமாகும். ரூ.1½ கோடி பரிசுத்தொகையும் பெற்றார்.

கனடாவின் டொரோன்டோ நகரில் நடந்த ஆண்களுக்கான மாஸ்டர்ஸ் டென்னிசின் இறுதி ஆட்டத்தில் உலகின் 2-ம் நிலை வீரர் டேனில் மெட்விடேவ் (ரஷியா) 6-4, 6-3 என்ற நேர் செட்டில் அமெரிக்காவின் ரீலி ஒபெல்காவை வீழ்த்தி வாகை சூடினார். இந்த பட்டத்தை ரஷிய வீரர் ஒருவர் வெல்வது 2000-ம் ஆண்டுக்கு பிறகு இதுவே முதல்முறையாகும். 25 வயதான மெட்விடேவுக்கு இது 12-வது சர்வதேச கோப்பையாகும். வெற்றி பெற்ற அவருக்கு ரூ.2¾ கோடி பரிசுத்தொகையும், ஆயிரம் தரவரிசை புள்ளிகளும் கிடைத்தது.

இதைத் தொடர்ந்து நேற்று வெளியிடப்பட்ட புதிய தரவரிசை பட்டியலில் மெட்விடேவ் மாற்றமின்றி 2-வது இடத்திலும், செர்பியாவின் நோவக் ஜோகோவிச் ‘நம்பர் ஒன்’ இடத்திலும் நீடிக்கிறார்கள். ஜோகோவிச் மொத்தம் 334 வாரங்கள் ‘நம்பர் ஒன்’ இடத்தை ஆக்கிரமித்து இருப்பது குறிப்பிடத்தக்கது.