ஆஸ்திரேலிய ஓபன் டென்னிஸ்: நடால், ஆஷ்லி பார்ட்டி கால்இறுதிக்கு முன்னேற்றம்

மெல்போர்ன்,

‘கிராண்ட்ஸ்லாம்’ போட்டிகளில் ஒன்றான ஆஸ்திரேலிய ஓபன் டென்னிஸ் தொடர் மெல்போர்ன் நகரில் நடந்து வருகிறது. பரபரப்பான கட்டத்தை நெருங்கியுள்ள இந்த டென்னிஸ் திருவிழாவில் நேற்று ஒற்றையர் பிரிவில் 4-வது சுற்று ஆட்டங்கள் நடந்தன. இதில் ஆண்கள் பிரிவில் 21-வது கிராண்ட்ஸ்லாம் பட்டத்துக்கு குறி வைத்துள்ள 5-ம் நிலை வீரரான ரபெல் நடால் (ஸ்பெயின்), தரவரிசையில் 69-வது இடத்தில் உள்ள அட்ரியன் மனரினோவுடன் (பிரான்ஸ்) மோதினார். இதில் முதல் செட்டில் அனல் பறந்தது. டைபிரேக்கருக்கு நகர்ந்த இந்த செட்டில் நடால் 4 முறை எதிராளியின் செட் பாயிண்ட் ஆபத்தில் இருந்து தன்னை காப்பாற்றிக் கொண்டு பெரும் போராட்டத்துக்கு பிறகு முதல் செட்டை கைப்பற்றினார். முதல் செட் மட்டும் 1 மணி 21 நிமிடங்கள் நீடித்தது. ஆனால் அடுத்த இரு செட்டுகளை இதைவிட குறைந்த நேரத்தில் சிரமமின்றி வசப்படுத்திய நடால் முடிவில் 7-6 (16-14), 6-2, 6-2 என்ற செட் கணக்கில் வெற்றி பெற்று ஆஸ்திரேலிய ஓபனில் 14-வது முறையாக கால்இறுதிக்குள் கால்பதித்தார்.

மற்றொரு ஆட்டத்தில் ஒலிம்பிக் சாம்பியனும், 3-ம் நிலை வீரருமான அலெக்சாண்டர் ஸ்வெரேவ் (ஜெர்மனி) அதிர்ச்சி தோல்வி அடைந்தார். அவரை தரவரிசையில் 14-வது இடத்தில் உள்ள கனடாவின் டெனிஸ் ஷபோவலோவ் 6-3, 7-6 (7-5), 6-3 என்ற நேர் செட்டில் விரட்டியடித்து முதல்முறையாக கால்இறுதியை எட்டினார். ஷபோவலோவ் கால்இறுதியில் நடாலுடன் மல்லுகட்டுகிறார்.

மற்ற ஆட்டங்களில் பெரேட்டினி (இத்தாலி) 7-5, 7-6 (7-4), 6-4 என்ற செட் கணக்கில் காரெனோ பஸ்டாவையும் (ஸ்பெயின்), கேல் மான்பில்ஸ் (பிரான்ஸ்) 7-5, 7-6 (7-4), 6-3 என்ற செட் கணக்கில் கெக்மானோவிச்சையும் (செர்பியா) வென்றனர்.

பெண்கள் ஒற்றையர் பிரிவில் ‘நம்பர் ஒன்’ சூறாவளி ஆஷ்லி பார்ட்டி (ஆஸ்திரேலியா) தன்னை எதிர்த்த அமன்டா அனிசிமோவாவை (அமெரிக்கா) 6-4, 6-3 என்ற நேர் செட்டில் வீழ்த்தி உள்ளூர் ரசிகர்களை குதூகலப்படுத்தினார். அனிசிமோவா 3-வது சுற்றில் நடப்பு சாம்பியனான ஜப்பானின் நவோமி ஒசாகாவை தோற்கடித்தவர் என்பது நினைவு கூரத்தக்கது.

ஆஷ்லி பார்ட்டி கால்இறுதியில் மற்றொரு அமெரிக்க வீராங்கனை ஜெசிகா பெகுலாவை சந்திக்கிறார். முன்னதாக பெகுலா 4-வது சுற்றில் 7-6 (7-0), 6-3 என்ற நேர் செட்டில் மரியா சக்காரியை (கிரீஸ்) பதம் பார்த்தார். இதே போல் பிரெஞ்ச் ஓபன் சாம்பியனான பார்போரா கிரெஜ்சிகோவா(செக்குடியரசு) 6-2, 6-2 என்ற நேர் செட்டில் முன்னாள் சாம்பியன் விக்டோரியா அஸரென்காவையும் (பெலாரஸ்), மேடிசன் கீஸ் (அமெரிக்கா) 6-3, 6-1 என்ற நேர் செட்டில் பாலா படோசாவையும் (ஸ்பெயின்) வெளியேற்றி கால்இறுதியை உறுதி செய்தனர்.