டிசம்பர் மாதத்திற்கான ஐசிசியின் சிறந்த வீரராக அஜாஸ் படேல் தேர்வு

துபாய்:

ஒவ்வொரு மாதமும் சிறந்த கிரிக்கெட் வீரர்களை தேர்வு செய்து ஐ.சி.சி. கவுரவித்து வருகிறது. அதன்படி கடந்த 2021 டிசம்பா் மாதத்தில் சிறப்பான ஆட்டத் திறனை வெளிப்படுத்திய வீரர்களின் பரிந்துரைப் பட்டியலை ஐசிசி வெளியிட்டது.

இந்த பரிந்துரைப் பட்டியலில் நியூசிலாந்துக்கு எதிராக சதமடித்த இந்தியாவின் மயங்க் அகர்வால், இந்தியாவுக்கு எதிரான மும்பை டெஸ்டில் ஒரே இன்னிங்ஸில் 10 விக்கெட்டுகளை வீழ்த்தி சாதனை செய்த நியூசிலாந்தின் சுழற்பந்துவீச்சாளர் அஜாஸ் படேல், ஆஷஸ் தொடரில் 3 டெஸ்டுகளில் 14 விக்கெட்டுகளை வீழ்த்தி 117 ரன்கள் எடுத்த ஆஸ்திரேலிய வீரர் மிட்செல் ஸ்டார்க் ஆகியோர் இடம் பிடித்திருந்தனர்.

இந்த நிலையில், இந்தியாவுக்கு எதிரான ஆட்டத்தில் 10 விக்கெட்டுகளை வீழ்த்தி சாதனை படைத்த அஜாஸ் படேலை, டிசம்பர் மாதத்துக்கான சிறந்த வீரராக ஐசிசி அறிவித்துள்ளது.

டெஸ்ட் கிரிக்கெட்டில் இங்கிலாந்தின் ஜிம் லேகர், அனில் கும்ளேவுக்கு அடுத்ததாக 10 விக்கெட்டுகளை வீழ்த்திய 3-வது பந்துவீச்சாளர் என்ற சாதனையை அஜாஸ் படேல் நிகழ்த்தினார் என்பது குறிப்பிடத்தக்கது.