பஞ்சாப்பின் கனவை தகர்க்கும் முனைப்பில் சென்னை

அஸ்வின் தலைமையிலான பஞ்சாப் அணி 6 வெற்றி, 7 தோல்வி என்று 12 புள்ளிகளுடன் 7-வது இடம் வகிக்கிறது. இன்றைய ஆட்டத்தில் இமாலய வெற்றி பெற்று, ரன்ரேட்டிலும் முன்னேற்றம் அடைந்தால் மட்டுமே அந்த அணியின் ‘பிளே-ஆப்’ கனவு நனவாகும். அது மட்டுமின்றி பஞ்சாப்புக்கு வாய்ப்பு உருவாக மும்பை அணி டெல்லியிடம் தோல்வியடைய வேண்டும்.

பஞ்சாப் அணியில் தொடக்க ஆட்டக்காரர் லோகேஷ் ராகுலின் (652 ரன்) பேட்டிங்கும், ஆண்ட்ரூ டைவின் பந்து வீச்சும் (24 விக்கெட்) மட்டும் சீராக இருக்கிறது. நட்சத்திர வீரர்கள் அடங்கிய பஞ்சாப் அணியில் ஒருங்கிணைந்த ஆட்டம் இல்லாததே ஊசலாட்டத்துக்கு காரணமாகும். ரன்ரேட்டை கணக்கில் கொள்ள ‘டாஸ்’ ஜெயித்தால் அந்த அணி 2-வது பேட் செய்வதையே விரும்பும்.

அதே சமயம் இவ்விரு அணிகளும் சந்தித்த முந்தைய லீக்கில் 4 ரன் வித்தியாசத்தில் சென்னை அணி தோற்று இருந்தது. அதற்கு பதிலடி கொடுக்கும் வகையில் அவர்களை போட்டியை விட்டு வெளியேற்றும் முனைப்புடன் சென்னை அணி வியூகங்களை தீட்டி வருகிறது.