கிரிக்கெட்
இங்கிலாந்து பயணத்துக்கான இந்திய ‘ஏ’ அணியில் இருந்து சஞ்சு சாம்சன் நீக்கம்

உடல் தகுதி தேர்வில் தோற்றதால் இந்திய ‘ஏ’ அணியில் இருந்து சஞ்சு சாம்சனின் வாய்ப்பு பறிபோனது.
மும்பை,

இந்தியா, இங்கிலாந்து, வெஸ்ட்இண்டீஸ் ‘ஏ’ அணிகள் இடையிலான ஒருநாள் கிரிக்கெட் போட்டி தொடர் இங்கிலாந்தில் வருகிற 22-ந் தேதி தொடங்குகிறது. இந்த போட்டிக்கான இந்திய ‘ஏ’ கிரிக்கெட் அணி ஸ்ரேயாஸ் அய்யர் தலைமையில் நேற்று முன்தினம் இங்கிலாந்து புறப்பட்டு சென்றது. இந்த போட்டி தொடருக்கான இந்திய ‘ஏ’ அணியில் இடம் பிடித்து இருந்த 23 வயதான விக்கெட் கீப்பர் மற்றும் பேட்ஸ்மேனான சஞ்சு சாம்சன் அணியினருடன் செல்லவில்லை. அவர் அணியில் இருந்து நீக்கப்பட்டது ஏன்? என்பது குறித்த தகவல் தற்போது வெளியாகி இருக்கிறது.

சமீப காலமாக இந்திய கிரிக்கெட் அணி வீரர்கள் உடல் தகுதி தேர்வில் (யோ-யோ) தேர்ச்சி பெற்றால் மட்டுமே அணியில் சேர்க்கப்படுகிறார்கள். உடல் தகுதி தேர்வுக்காக நிர்ணயிக்கப்பட்டு இருக்கும் 16.1 புள்ளிகளுக்கு குறைவாக பெறும் எந்தவொரு வீரருக்கும் அணியில் இடம் கொடுக்கப்படுவதில்லை. பெங்களூருவில் உள்ள தேசிய கிரிக்கெட் அகாடமியில் நடத்தப்பட்ட உடல் தகுதி சோதனையில் சஞ்சு சாம்சன் தேறாததால் தான் அணியில் இருந்து நீக்கப்பட்டு இருக்கிறார் என்று தெரியவந்துள்ளது.