கால்பந்து
கண்டங்களுக்கான கால்பந்து கோப்பை இறுதிப்போட்டியில் கென்யாவை வீழ்த்தி இந்தியா வெற்றி

கண்டங்களுக்கான கால்பந்து கோப்பை இறுதிப்போட்டியில் கென்யாவை வீழ்த்தி இந்தியா அணி சாம்பியன் பட்டம் வென்றது. #IntercontinentalCup
மும்பை, 

கண்டங்களுக்கு இடையிலான சர்வதேச கால்பந்து தொடர் மும்பையில் நடந்து வருகிறது. 4 அணிகள் பங்கேற்ற இந்த போட்டியில் லீக் ஆட்டங்கள் முடிவில் இந்தியா, கென்யா, நியூசிலாந்து ஆகிய அணிகள் தலா 2 வெற்றி, ஒரு தோல்வியுடன் சமநிலை வகித்தன. இதையடுத்து கோல் வித்தியாசம் அடிப்படையில் முதல் 2 இடங்களை பிடித்த இந்தியா, கென்யா அணிகள் இறுதிப்போட்டிக்கு முன்னேறின. 

ஏற்கனவே கென்யாவுக்கு எதிரான லீக் ஆட்டத்தில் 3–0 என்ற கோல் கணக்கில் வென்று இருந்த இந்திய அணி மீண்டும் கென்யாவை இறுதிப்போட்டியில் வெல்ல முனைப்புடன் இருந்தது. இதையடுத்து இன்று இரவு 8 மணிக்கு நடைபெற்ற இறுதிப்போட்டியில் இரு அணிகளும் பலப்பரீட்சையில் ஈடுபட்டன.

இந்நிலையில் பரபரப்பாக நடந்த இறுதிப்போட்டியில் இந்திய அணி 2-0 என்ற கோல் கணக்கில் கென்யாவை வீழ்த்தி சாம்பியன் பட்டம் வெற்றி பெற்றது. இந்திய அணியின் கேப்டன் சுனில் சேத்ரி 2 கோல்களை அடித்து வெற்றிக்கு வித்திட்டார். மேலும் இந்த போட்டியில் தொடரில் சுனில் சேத்ரி மொத்தம் 8 கோல்கள் அடித்து சிறப்பான ஆட்டத்தை வெளிபடுத்தியுள்ளார் என்பது குறிப்பிடத்தக்கது.