பிரிக்ஸ் கால்பந்து போட்டி: தென்னாப்பிரிக்கா அணி வெற்றி

ஜோகன்னர்ஸ்பர்க்,

பிரிக்ஸ் நாடுகளுக்கு இடையிலான 17 வயதுக்குட்பட்ட மகளிர் கால்பந்து போட்டிகள் தற்போது நடைபெற்று வருகின்றன. இதில் ரஷியா, சீனா, பிரேசில், இந்தியா, தென்னாப்பிரிக்கா ஆகிய அணிகள் பங்கேற்றுள்ளன.

இந்நிலையில் நேற்று நடைபெற்ற இந்திய அணிக்கு எதிரான ஆட்டத்தில் 1-5 என்ற கோல் கணக்கில் தென்னாப்பிரிக்கா அணி வெற்றிபெற்றது.

பரபரப்பாக நடைபெற்ற முதல் பாதி ஆட்டத்தில் 1-1 என்ற கோல் கணக்கில் இரு அணிகளும் சமனில் இருந்தன. அதை தொடர்ந்து நடைபெற்ற இரண்டாவது பாதியில் தென்னாப்பிரிக்க அணி ஆதிக்கம் செலுத்தியது.

இரண்டாவது பாதியில் தென்னாப்பிரிக்க அணி 4 கோல்களை அடித்தது. முன்னதாக இந்திய அணி சார்பில் வன்லால்ரியாத்ரி ஒரு கோலடித்தார்.

அடுத்து நடைபெற உள்ள இரண்டாவது ஆட்டத்தில் இந்திய அணி ரஷியாவை எதிர்கொள்கிறது.