ஹாக்கி
மகளிர் ஹாக்கி: ஸ்பெயின் அணிக்கு எதிரான ஆட்டத்தில் இந்தியா வெற்றி

மகளிர் ஹாக்கி போட்டியில் ஸ்பெயின் அணிக்கு எதிரான ஆட்டத்தில் இந்தியா 4-1 என்ற கோல் கணக்கில் வெற்றிபெற்றது. #WomensHockey
மேட்ரிட்,

ஸ்பெயினுக்கு எதிரான ஹாக்கி தொடரின் 5-வது ஆட்டத்தில், இந்திய மகளிர் அணி 4-1 என அபார வெற்றி பெற்று தொடரை 2-2 என்ற கணக்கில் சமன் செய்தது.

உலகக் கோப்பை மகளிர் ஹாக்கிப் போட்டி லண்டனில் வரும் ஜூலை மாதம் நடைபெற உள்ளது. இதற்கு தயாராகும் வகையில் இந்திய மகளிர் அணி ஸ்பெயின் அணிக்கு எதிரான 5 ஆட்டங்கள் கொண்ட தொடரில் பங்கேற்றது.

முன்னதாக ஸ்பெயின் அணி இரு ஆட்டங்களிலும், இந்திய அணி ஒரு ஆட்டத்திலும் வெற்றி பெற்றிருந்தன. மற்றொரு ஆட்டம் டிராவில் முடிவடைந்தது.

இந்நிலையில் தொடரின் வெற்றியை தீர்மானிக்கும் 5-வது ஆட்டம் நேற்று நடந்தது. இதில் இந்திய கேப்டன் ராணி ராம்பால், குர்ஜித் கவுர் ஆகியோர் அற்புத ஆட்டத்தால் 4-1 என்ற கோல் கணக்கில் இந்திய அணி அபார வெற்றி பெற்றது. இந்த ஆட்டத்தில் ராணி, குர்ஜித் ஆகியோர் தலா 2 கோல்களை அடித்து அணியின் வெற்றிக்கு வித்திட்டனர். ஸ்பெயின் அணியின் சார்பில் லோலா ரியரா ஒரு கோல் அடித்தார். இந்திய அணி பெற்ற இந்த வெற்றி மூலம் ஹாக்கி தொடர் 2-2 என சமனில் முடிவடைந்தது.