மகேந்திர சிங் தோனி வாழ்க்கை வரலாறு: கிரிக்கெட் பயணம் முதல் சாதனைகள் வரை!

தினத்தந்தி

மகேந்திர சிங் தோனி 1981 ஜூலை 7-ஆம் தேதி ஜார்க்கண்ட் மாநிலம் ராஞ்சியில் பிறந்தார். இவரது தந்தை பான் சிங், பொதுத்துறை நிறுவனமான மெக்கானில் பணியாற்றினார். தோனிக்கு சிறுவயது முதலே விளையாட்டுகளில் அதிக ஆர்வம் இருந்தது.

பள்ளிப் பருவத்தில் தோனி கால்பந்து மற்றும் பேட்மிண்டன் விளையாட்டுகளில் ஆர்வத்துடன் பங்கேற்றார். குறிப்பாக கால்பந்தில் கோல் கீப்பராக விளையாடினார். பின்னர் கிரிக்கெட் மீது ஆர்வம் ஏற்பட்டு, விக்கெட் கீப்பராக தனது திறமையை வளர்த்துக் கொண்டார்.

கிரிக்கெட் பயணம்; 1995-ஆம் ஆண்டு கமாண்டோ கிரிக்கெட் கிளப் அணியில் விக்கெட் கீப்பராக விளையாடத் தொடங்கினார். தொடர்ந்து தனது கிரிக்கெட் திறமையை மேம்படுத்தி, உள்ளூர் மற்றும் மாநில அளவிலான போட்டிகளில் சிறப்பாக விளையாடினார். இதன் மூலம் இந்திய அணியில் இடம்பிடிக்கும் வாய்ப்பு கிடைத்தது.

2004-ஆம் ஆண்டு வங்கதேச அணிக்கு எதிரான ஒருநாள் போட்டியில் இந்திய அணிக்காக அறிமுகமானார். தொடக்கத்தில் பெரிய அளவில் ரன்கள் குவிக்கவில்லை என்றாலும், பாகிஸ்தானுக்கு எதிரான தொடரில் சிறப்பாக விளையாடி அனைவரின் கவனத்தையும் ஈர்த்தார்.

இந்திய அணியின் கேப்டனான தோனி; 2007-ஆம் ஆண்டு நடைபெற்ற டி20 உலகக் கோப்பைப் போட்டி தோனியின் கிரிக்கெட் வாழ்க்கையில் முக்கியமான திருப்புமுனையாக அமைந்தது. இளம் வீரர்களைக் கொண்ட இந்திய அணிக்குத் தலைமை தாங்கி, முதல் டி20 உலகக் கோப்பையை வென்று கொடுத்தார்.

இதனைத் தொடர்ந்து 2007-ஆம் ஆண்டு இந்திய ஒருநாள் அணியின் கேப்டனாக நியமிக்கப்பட்டார். 2011-ஆம் ஆண்டு ஒருநாள் உலகக் கோப்பையை இந்திய அணி வெல்ல முக்கியப் பங்காற்றினார். அவரது தலைமையில் 2013-ஆம் ஆண்டு சாம்பியன்ஸ் டிராபியையும் இந்திய அணி கைப்பற்றியது.

வெற்றிகளும் விருதுகளும்; ஐபிஎல் தொடரில் சென்னை சூப்பர் கிங்ஸ் அணியின் கேப்டனாக 2008-ஆம் ஆண்டு முதல் விளையாடி வருகிறார். இவரது தலைமையில் சென்னை அணி பலமுறை சாம்பியன் பட்டம் வென்று சாதனை படைத்துள்ளது. இந்திய கிரிக்கெட்டிலும் ஐபிஎல் தொடரிலும் தனக்கென தனி ரசிகர் பட்டாளத்தை உருவாக்கியுள்ளார்.

கிரிக்கெட்டில் ஆற்றிய சிறப்பான பங்களிப்பிற்காக 2008-ஆம் ஆண்டு ராஜீவ் காந்தி கேல் ரத்னா விருதைப் பெற்றார். பத்மஸ்ரீ, பத்மபூஷண் உள்ளிட்ட உயரிய விருதுகளும் இவருக்கு வழங்கப்பட்டுள்ளன. சர்வதேச கிரிக்கெட்டில் பல்வேறு சாதனைகளைப் படைத்த தோனி, சிறந்த விக்கெட் கீப்பர் மற்றும் தலைசிறந்த கேப்டன்களில் ஒருவராகப் போற்றப்படுகிறார்.

ஓய்வுக்குப் பிறகும் தொடரும் ரசிகர் பட்டாளம்; தோனியின் வாழ்க்கை மற்றும் கிரிக்கெட் சாதனைகளை மையமாகக் கொண்டு திரைப்படம் ஒன்றும் உருவாக்கப்பட்டுள்ளது. 2020-ஆம் ஆண்டு சர்வதேச கிரிக்கெட்டிலிருந்து ஓய்வு பெறுவதாக அறிவித்தார். இந்நிலையில், நேற்று (17.11.2026) வீரராகத் தனது கிரிக்கெட் பயணத்திலிருந்து ஓய்வு பெற்றுள்ளார். இதனைத் தொடர்ந்து, 2027-ஆம் ஆண்டு நடைபெறவுள்ள ஐபிஎல் தொடரில் சென்னை சூப்பர் கிங்ஸ் அணியின் ஆலோசகராகச் செயல்பட உள்ளதாகத் தெரிவிக்கப்பட்டுள்ளது.
சுயநலமான நண்பர்களிடமிருந்து விலகுவது எப்படி? மன அமைதியைக் காக்கும் 8 வழிகள்!