தங்கம் விலை மாற்றமின்றி இன்று விற்பனை செய்யப்படுகிறது. அதன்படி, சென்னையில் இன்று 22 கேரட் ஆபரண தங்கத்தின் விலையில் மாற்றமின்றி ஒரு கிராம் ரூ.8,510-க்கும், ஒரு சவரன் ரூ.68,080-க்கும் விற்பனையாகி வருகிறது.

கச்சத்தீவை மீட்க கோரும் தீர்மானம் சட்டசபையில் இன்று கொண்டு வரப்படுகிறது. தமிழக முதல்-அமைச்சர் மு.க.ஸ்டாலின் இதனை முன்மொழிகிறார்.

இலங்கைக்கு அரசு முறை பயணம் மேற்கொள்ளும் பிரதமர், அந்நாட்டு அரசுடன் பேசி, அங்கு சிறையில் வாடும் தமிழக மீனவர்களையும், அவர்களின் படகுகளையும் நல்லெண்ண அடிப்படையில் விடுவிக்க செய்து, மீட்டுக்கொண்டு வரவேண்டும் என்று அந்த தீர்மானத்தில் முதல்-அமைச்சர் மு.க.ஸ்டாலின் வலியுறுத்துகிறார்.

இந்த தீர்மானத்தில் சட்டமன்ற கட்சியினர் விவாதித்த பிறகு, குரல் வாக்கெடுப்பிற்கு விடப்பட்டு தீர்மானம் நிறைவேற்றப்படும்.

நீலகிரி, கொடைக்கானலில் புதிய கட்டுப்பாடுகளுடன் இ-பாஸ் நடைமுறை நேற்று காலை முதல் அமலுக்கு வந்தது. ஒவ்வொரு நாளும் விண்ணப்பிக்கும் சுற்றுலா பயணிகளின் வாகனங்களுக்கு குறிப்பிட்ட எண்ணிக்கையில் மட்டுமே இ-பாஸ் வழங்கப்பட்டு அனுமதிக்கப்படுகிறது.

இந்நிலையில், இ-பாஸ் முறையை ரத்து செய்யக்கோரி நீலகிரி மாவட்டத்தில் இன்று கடையடைப்பு போராட்டம் நடைபெறும் என்று தமிழ்நாடு வணிகர் சங்கங்களின் பேரமைப்பு தெரிவித்துள்ளது. இதேபோல் வணிகர் சங்கங்களின் பேரமைப்பு சார்பிலும் நீதிமன்றத்தில் மேல்முறையீடு செய்யப்படும் என தகவல் தெரிவிக்கின்றது.

கச்சத்தீவை மீட்க கோரும் தீர்மானம்: சட்டசபையில் இன்று முதல்-அமைச்சர் மு.க.ஸ்டாலின் முன்மொழிகிறார்

கோவை மாவட்டம் இருகூர் ரெயில் நிலையத்தில் தண்டவாளம் பராமரிப்பு பணியால் குறிப்பிட்ட ரெயில் சேவைகளில் மாற்றம் செய்யப்பட்டுள்ளது. எர்ணாகுளம்-டாடாநகர் எக்ஸ்பிரஸ் (வண்டி எண்.18190) இன்று (புதன்கிழமை) போத்தனூர்-கோவை-இருகூர் வழியாக இயக்கப்படும். ஆலப்புழா-தன்பாத் எக்ஸ்பிரஸ் (13352) இன்று 25 நிமிடங்கள் வசதியான இடத்தில் நிறுத்தப்படும்.

திருச்சி-பாலக்காடு எக்ஸ்பிரஸ் (16843) வருகிற 4 மற்றும் 6-ந் தேதிகளில் சூலூரில் இருந்து பாலக்காடுக்கு முன்பதிவு செய்யப்படாத சிறப்பு ரெயிலாக இயக்கப்படும். இந்த தகவலை சேலம் ரெயில்வே கோட்ட அதிகாரி மரியா மைக்கேல் தெரிவித்துள்ளார்.

நீலகிரி, ராமநாதபுரம், தூத்துக்குடி ஆகிய 3 மாவட்டங்களில் காலை 10 மணி வரை இடி, மின்னலுடன் கூடிய மிதமான மழைக்கு வாய்ப்பு உள்ளது என சென்னை வானிலை ஆய்வு மையம் தெரிவித்து உள்ளது.