அட்டகாசமான இறால் இறால் பெப்பர் ப்ரை வீட்டிலேயே செய்வது எப்படி.!

இந்த ரெசிபி இறால் பிரியர்களுக்கு மிகவும் பிடிக்கும். இப்போது கேரளா ஸ்டைல் இறால் பெப்பர் ப்ரை செய்வது எப்படி என்று பார்க்கலாம்.

தேவையான பொருட்கள் : இறால், பச்சை மிளகாய், இஞ்சி, பூண்டு, வெங்காயம், கறிவேப்பிலை, மிளகு தூள், மிளகாய் தூள், மஞ்சள் தூள், தேங்காய் எண்ணெய், உப்பு - தேவையான அளவு, கொத்தமல்லி ஆகியவை.

செய்முறை : முதலில் இறாலை நன்றாக சுத்தம் செய்து கொள்ளவும்.

அடுத்து சுத்தம் செய்த இறாலை ஒரு பாத்திரத்தில் போட்டு, மிளகாய் தூள், மஞ்சள் தூள், மிளகு தூள் மற்றும் உப்பு சேர்த்து கலந்து ஊற வைக்க வேண்டும்.

கொத்தமல்லியை பொடியாக நறுக்கி கொள்ளவும். இஞ்சி, பூண்டை தோல் உரித்து அதனுடன் பச்சை மிளகாய் சேர்த்து மிக்சியில் போட்டு அரைத்து தனியாக வைத்துக் கொள்ள வேண்டும்.

ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், கறிவேப்பிலை மற்றும் வெங்காயம் சேர்த்து பொன்னிறமாக வதக்கி விட வேண்டும்.

பின்னர் அதில் இஞ்சி கலவையை சேர்த்து, நன்கு மணம் வரும் வரை வதக்க வேண்டும்.

அடுத்து அதில் ஊற வைத்துள்ள இறாலை சேர்த்து, தேவையான அளவு உப்பு தூவி, பொன்னிறமாகும் வரை 5 நிமிடம் நன்கு பிரட்டி விட வேண்டும். இறால் அளவுக்கு அதிகமாக வெந்துவிடக்கூடாது.

இறுதியில் கொத்தமல்லி தழை சேர்த்து பிரட்டினால், கேரளா ஸ்டைல் இறால் பெப்பர் ப்ரை ரெடி.