ஷங்கர் இயக்கத்தில் கமல்ஹாசன் நடித்த இந்தியன் 2 படத்துக்கு கதாநாயகியாக காஜல் அகர்வாலை ஒப்பந்தம் செய்து 2019-ல் படப்பிடிப்பை தொடங்கியது.

விபத்து காரணமாக படப்பிடிப்பு நிறுத்தப்பட்ட நிலையில் விரைவில் படப்பிடிப்பை தொடங்குவோம் என தகவல் வெளியானது.

காஜல் அகர்வாலுக்கு திருமணம் முடிந்து தற்போது குழந்தை பிறந்துள்ளது.

இந்நிலையில் இந்தியன் 2 படத்தில் இருந்து அவர் விலகி விட்டதாகவும் அவருக்கு பதிலாக இந்தி நடிகைகள் தீபிகா படுகோனே அல்லது கத்ரினா கைப் நடிக்க வாய்ப்பு உள்ளது என்றும் தகவல் பரவியது.

இதையடுத்து இன்ஸ்டாகிராம் பக்கத்தில் ரசிகர்களுடன் கலந்துரையாடிய காஜல் அகர்வாலிடம் இது குறித்து கேள்வி எழுப்பினர்.

அதற்கு பதில் அளித்த காஜல் அகர்வால் “இந்தியன் 2 படத்தில் இருந்து நான் விலகியதாக யார் சொன்னது? அந்த படத்தில் இருந்து நான் விலகவில்லை. நாங்கள் இந்தியன் 2 படப்பிடிப்பை செப்டம்பர் மாதம் 13-ந்தேதி மீண்டும் தொடங்கப் போகிறோம்” என்றார்.

இதையடுத்து இந்தியன் 2-ல் காஜல் அகர்வால் என்ற ஹேஷ்டேக்கை ரசிகர்கள் டிரெண்டிங் செய்து கொண்டாடி வருகிறார்கள்.