வளமான வாழ்வு தரும் புரட்டாசி மாத ராசி பலன்கள்..

உழைப்பின் மூலமே உன்னத வாழ்வை அடைய முடியுமென்று சொல்லும் மேஷ ராசி நேயர்களே! உங்கள் ராசிநாதன் செவ்வாய் தன ஸ்தானத்திலும், விரயாதிபதி குரு விரய ஸ்தானத்திலும் இருப்பதால் தேவைக்கேற்ற பணம் வந்துசேரும்.

மற்றவர்களின் உணர்வுகளை மதிக்கும் உன்னத குணம் பெற்ற ரிஷப ராசி நேயர்களே! உங்கள் ராசிநாதன் சுக்ரன், தனாதிபதி புதனோடு இணைந்து சுக ஸ்தானத்தில் சஞ்சரிக்கிறார். இதனால் ‘புத சுக்ர யோகம்’ ஏற்படுகிறது. எனவே பொருளாதார விருத்தி அதிகரிக்கும்.

எவரையும் பார்த்தவுடன் பேச்சாற்றலால் கவர்ந்திழுக்கும் மிதுன ராசி நேயர்களே! உங்கள் ராசிநாதன் புதன், சுக்ரனோடு இணைந்து ‘புத-சுக்ர யோக’த்தை உருவாக்குகிறார். எனவே எதிர்பாராத விதத்தில் நல்ல வளர்ச்சி ஏற்படும்.

வேகமும், விவேகமும் கொண்டு செயல்பட்டு வெற்றி காணும் கடக ராசி நேயர்களே! மாதத் தொடக்கத்தில் உங்கள் ராசிநாதன் சந்திரன் விரய ஸ்தானத்திலும், விரயாதிபதி புதன் தன ஸ்தானத்திலும் சஞ்சரிப்பதால் பொருளாதாரப் பற்றாக்குறை அகலும். நினைத்த காரியத்தை நினைத்தபடி செய்து முடிப்பீர்கள்.

தெருவில் செல்லும் பொழுது கும்பிட்டுப் பேசுபவர்களாக விளங்கும் சிம்ம ராசி நேயர்களே! மாதத் தொடக்கத்தில் உங்கள் ராசியிலேயே தனாதிபதி புதனும், தன ஸ்தானத்தில் ராசிநாதன் சூரியனும் பரிவர்த்தனை யோகம் பெற்றிருக்கிறார்கள். எனவே தொட்ட காரியங்களில் வெற்றி கிடைக்கும்.

அமைதியாக இருந்து கொண்டு அரிய பணிகளைச் செய்யும் கன்னி ராசி நேயர்களே! குடும்ப ஸ்தானத்தில் கேது பலம் பெற்றிருக்கிறார். 8-ல் ராகு சஞ்சரிக்கிறார். விரயாதிபதி சூரியன் உங்கள் ராசியில் சஞ்சரிப்பதால் விரயங்கள் அதிகரிக்கும்.

மற்றவர்களுக்கு உதவும் எண்ணத்தை மனதில் பதித்து வைத்துள்ள துலாம் ராசி நேயர்களே!மாதத் தொடக்கத்தில் உங்கள் ராசிநாதன் சுக்ரன் விரயாதிபதி புதனுடன் சஞ்சரிப்பதால் வருமானம் திருப்திகரமாக இருந்தாலும், செலவு இருமடங்காகும். அர்த்தாஷ்டமச் சனியின் ஆதிக்கம் இருப்பதால் எதையும் ஒருமுறைக்குப் பலமுறை யோசித்துச் செய்வது நல்லது.

நினைத்ததை நினைத்த மாத்திரத்தில் செய்து முடிக்க நினைக்கும் விருச்சிக ராசி நேயர்களே!உங்கள் ராசிநாதன் செவ்வாய் உங்கள் ராசியைப் பார்க்கிறார். தொழில் ஸ்தானாதிபதி சூரியனும், லாபாதிபதி புதனும் பரிவர்த்தனை யோகம் பெற்றிருக்கிறார்கள். எனவே நிதிநிலை உயரும். நினைத்த காரியம் நிறைவேறும்.

யாரையும் சந்தித்த உடனேயே நண்பர்களாக ஆக்கிக் கொள்ளும் தனுசு ராசி நேயர்களே!மாதத் தொடக்கத்தில் உங்கள் ராசிநாதன் குருவும், தனாதிபதி சனியும் வக்ரத்தில் இருக்கிறார்கள். இதனால் பொருளாதாரப் பற்றாக்குறை ஏற்படும்.

எதையும் ஆராய்ந்து அறிந்து அதற்கேற்ப சிறப்பாக செயல்படும் மகர ராசி நேயர்களே! உங்கள் ராசிநாதன் சனி பகவான் வக்ர இயக்கத்தில் இருக்கிறார். அஷ்டமத்தில் புதனும், சுக்ரனும் இருக்கிறார்கள். எனவே சுபவிரயங்கள் அதிகரிக்கும்.

எடுத்த கொள்கை மாறாமல் லட்சியத்தை நோக்கிப் பயணிக்கும் கும்ப ராசி நேயர்களே! மாதத் தொடக்கத்தில் உங்கள் ராசிநாதன் சனியும், தன-லாபாதிபதி குருவும் வக்ர இயக்கத்தில் இருக்கின்றனர். எனவே எதையும் திட்டமிட்டுச் செய்ய இயலாது.

உணர்வுகளை மதிக்கும் உன்னதமான குணம்பெற்ற மீன ராசி நேயர்களே! உங்கள் ராசிநாதன் குரு வக்ர இயக்கத்தில் இருக்கின்றார். வக்ரச் சனியின் பார்வையும், உங்கள் ராசியில் பதிகிறது. எனவே தடை, தாமதம் அதிகரிக்கும்.