மீதமான சப்பாத்தி முதல் சாதம் வரை... அசத்தல் சமையல் குறிப்புகள்!

சப்பாத்தி மீந்துவிட்டால், மிக்சியில் பொடித்து அதனுடன் நெய், முந்திரி, ஏலக்காய்த்தூள் சேர்த்து உருட்டி சுவையான கோதுமை லட்டு செய்யலாம்.

காய்கறிக் கறி மீந்துவிட்டால், வாணலியில் சீரகம், தக்காளி, வெங்காயம் வதக்கி, அதனுடன் மீதமான காய்கறியையும் சேர்த்து மிக்சியில் அரைத்து துவையலாக செய்யலாம். சப்பாத்தி, இட்லியுடன் சுவையாக இருக்கும்.

குழந்தைகளுக்காக வாங்கிய பிஸ்கட்டுகள் மீதமாகி மெதுவாகிவிட்டால், அவற்றை மிக்சியில் பொடித்து, பால், சர்க்கரை, கிரீம், முந்திரி சேர்த்து குளிர்சாதனப் பெட்டியில் வைத்து குளிரவைத்து பரிமாறலாம்.

காலையில் செய்த ரவை உப்புமா மீந்துவிட்டால், அதில் சிறிது கரம் மசாலா சேர்த்து, பிரெட் துண்டுகளுக்கு இடையில் வைத்து சுட்டு சுவையான சாண்ட்விச் செய்யலாம்.

மீந்த சப்பாத்திகளை நீளமாக நறுக்கி எண்ணெயில் பொரித்து, சிறிது காரத்தூள் மற்றும் உப்பு சேர்த்து மாலை நேர சிற்றுண்டியாக பரிமாறலாம்.

மீந்த சாதத்தை வீணாக்காமல், அதில் வெங்காயம், பச்சை மிளகாய், கொத்தமல்லி, உப்பு சேர்த்து நன்றாகப் பிசைந்து சிறிய உருண்டைகளாக செய்து தோசைக்கல்லில் தட்டி சுட்டெடுக்கலாம்.

மீந்த இட்லிகளை சிறு துண்டுகளாக நறுக்கி, கடாயில் எண்ணெய், கடுகு, உளுந்தம்பருப்பு, வெங்காயம், பச்சை மிளகாய் சேர்த்து வதக்கி, இட்லித் துண்டுகளை சேர்த்து கிளறலாம்.

மீந்த சாதத்தை பயன்படுத்தி, காய்கறிகள், முட்டை மற்றும் தேவையான மசாலா சேர்த்து சுவையான கலவை சாதம் தயாரிக்கலாம்.