குழந்தைகளுக்கு ஆப்பிள் தோலுடன் கொடுக்கலாமா? பெற்றோர் அவசியம் தெரிந்துகொள்ள வேண்டிய தகவல்கள்!

தினத்தந்தி

குழந்தைகள் பிறந்து ஆறு மாதங்களுக்குப் பிறகு ஆப்பிள் கொடுக்கலாம். ஆப்பிளை தோல் நீக்கி, ஆவியில் வேகவைத்து, நன்கு மசித்துக் கொடுப்பதுதான் சரியான முறையாகும். ஒன்பது மாதங்களைக் கடந்த குழந்தைகளுக்கும் ஆப்பிளை தோலுடன் கொடுக்கும்போது தொண்டையில் சிக்கிக்கொள்ளும் அபாயம் இருப்பதால், தோலை நீக்கிக் கொடுப்பது பாதுகாப்பானது.

ஆப்பிளின் தோலில் மெழுகுப் பூச்சு இருப்பதால், அதை குழந்தைகளுக்குக் கொடுக்கலாமா என்ற சந்தேகம் பல பெற்றோருக்கு உள்ளது. குறிப்பாக, இறக்குமதி செய்யப்படும் ஆப்பிள்களில் பெரும்பாலும் மெழுகுப் பூச்சு இருப்பதைப் பார்க்க முடிகிறது.

FSSAI மற்றும் FDA போன்ற உணவுப் பாதுகாப்பு அமைப்புகளின் விதிகளின்படி, சில வகையான மெழுகுகள் உணவுப் பொருட்களில் பயன்படுத்த அனுமதிக்கப்படுகின்றன. இருப்பினும், ஆப்பிளின் மேல்புறத்தில் பயன்படுத்தப்பட்டுள்ள மெழுகு எந்த வகையைச் சேர்ந்தது, அது அரசால் அனுமதிக்கப்பட்டதா என்பதை சாதாரண மக்களால் உறுதி செய்வது கடினம்.

சில நேரங்களில் ஆப்பிள்களில் உரங்களின் எச்சங்களும் இருக்கலாம். எனவே, குழந்தைகளுக்கு ஆப்பிள் கொடுப்பதற்கு முன்பு அவற்றை நன்கு கழுவ வேண்டும். இரண்டு கப் தண்ணீரில் அரை டீஸ்பூன் பேக்கிங் சோடா கலந்து, அதில் ஆப்பிளைக் கழுவுவது நல்லது என்றும் சில ஆய்வுகள் கூறுகின்றன. வெதுவெதுப்பான நீரில் கழுவுவதும் ஆப்பிளின் மேல்புறத்தில் உள்ள மெழுகுப் பூச்சை அகற்ற உதவும்.

உள்ளூரில் கிடைக்கும் புதிய ஆப்பிள்கள் என்றால், மெழுகுப் பூச்சு குறித்த கவலை இல்லாமல் தோலுடன் பயன்படுத்தலாம். குறிப்பாக, இயற்கை முறையில் விளைவிக்கப்பட்ட புதிய ஆப்பிள் என்று உறுதியாகத் தெரிந்தால் மட்டுமே தோலுடன் கொடுக்கலாம். ஆப்பிள் தோலில் உள்ள நார்ச்சத்து உடலுக்கு மிகவும் நல்லது.

குழந்தைகளுக்கு ஆறு மாதங்களிலிருந்து வாழைப்பழமும் கொடுக்கலாம். அனைத்து வகையான வாழைப்பழங்களையும் குழந்தைகளுக்கு வழங்கலாம். நன்கு பழுத்த வாழைப்பழத்தை அப்படியே மசித்துக் கொடுக்கலாம். நேந்திரம்பழம் சற்று கடினமாக இருப்பதால், அதை வேகவைத்து மசித்துக் கொடுப்பது சிறந்தது.

விதைகள் உள்ள திராட்சை, தர்பூசணி போன்ற பழங்களை குழந்தைகளுக்குக் கொடுக்கும்போது, விதைகளை முழுமையாக நீக்கி, மசித்துக் கொடுக்க வேண்டும். குழந்தைகளின் வயதுக்கு ஏற்ப பழங்களின் அளவு மற்றும் கொடுக்கும் முறையிலும் கவனம் செலுத்த வேண்டும்.

அந்தந்த சீசனில் கிடைக்கும் பழங்களைக் குழந்தைகளுக்கு வழங்கினாலே போதுமான ஊட்டச்சத்துகள் கிடைக்கும். விலை உயர்ந்த வெளிநாட்டுப் பழங்களைத் தேடிச் செல்ல வேண்டிய அவசியமில்லை. ஏழாவது மாதத்திலிருந்து குழந்தைகளுக்கு நாளொன்றுக்கு 50 முதல் 60 கிராம் அளவு பழங்கள் கொடுக்கலாம். ஒரு வயதுக்குப் பிறகு சுமார் 75 கிராம் அளவு பழங்கள் வழங்கலாம்.

ஏழு முதல் பதினைந்து வயது வரை குழந்தைகளுக்கு தினமும் சுமார் 100 கிராம் பழங்களும், பதினாறு முதல் பதினெட்டு வயது வரை சுமார் 150 கிராம் பழங்களும் கொடுக்கலாம். பழங்களை ஜூஸாகக் கொடுப்பதைவிட, முழுப் பழமாகவோ அல்லது மசித்தோ கொடுப்பது சிறந்தது. ஜூஸாகக் கொடுக்கும்போது நார்ச்சத்து கிடைக்காமல் போகும் என்பதால், பழங்களாகவே கொடுப்பது சிறந்ததாகும்.

குறைந்த வயதில் பெண் குழந்தைகள் பருவமெய்துவதற்கான காரணங்கள்!