தினத்தந்தி
தமிழ்நாட்டில் அரசு ஊழியர்களுக்கு உறுதியளிக்கப்பட்ட ஓய்வூதிய திட்டம் கடந்த ஜனவரி 1ஆம் தேதி முதல் நடைமுறைக்கு வந்துவிட்டதாக தமிழக அரசு அறிவித்தது. ஆனால், அதன் பின்னரும் 3 மாதங்கள் கடந்தும் அந்த திட்டம் முழுமையாக செயல்படுத்தப்படவில்லை.
மார்ச் மாதம் முடிவடைந்து ஆயிரக்கணக்கான அரசு ஊழியர்கள் பணி ஓய்வு பெற்ற நிலையில், தகுதியுடையவர்களுக்கு உறுதியளிக்கப்பட்ட ஓய்வூதியம் வழங்குவதற்கான ஆணைகள் இன்னும் பிறப்பிக்கப்படவில்லை.
அரசு ஊழியர்களை தொடர்ந்து மூன்றாவது மாதமாக ஏமாற்றுவது கண்டிக்கத்தக்கது. அரசு ஊழியர்கள், ஆசிரியர்கள், கவுரவ விரிவுரையாளர்கள் மட்டுமின்றி அனைத்து துறையினரையும் திட்டமிட்டு ஏமாற்றியுள்ளதாக குற்றச்சாட்டு எழுகிறது. இதை அவர்கள் மறக்கவும் மன்னிக்கவும் மாட்டார்கள்.
மேலும், கஞ்சா வியாபாரிகள், போதைப்பொருள் கடத்தல்காரர்கள், பாலியல் குற்றவாளிகள் மற்றும் சட்டவிரோதமாக மது விற்பவர்கள் போன்றோர் மட்டும் ஆட்சியில் மகிழ்ச்சியாக உள்ளனர் என்ற குற்றச்சாட்டும் முன்வைக்கப்படுகிறது.
ஆட்சியாளர்களை தேர்ந்தெடுத்த பொதுமக்கள் மகிழ்ச்சியாக இல்லை என்றும், மனநிறைவும் இல்லையெனவும் கூறப்படுகிறது. இதற்கு ஆட்சியின் செயல்பாடுகளே காரணம் என விமர்சனம் செய்யப்படுகிறது.