கேரளாவிலிருந்து டன் கணக்கில் அபாயகரமான மருத்துவக் கழிவுகள் கொட்டப்பட்டு எரிக்கப்படும் அவலம் தொடர்கதையாகி வருகிறது. இது குறித்து தமிழக பாஜக தலைவர் நயினார் நாகேந்திரன் தனது எக்ஸ் தள பதிவில் கூறியிருப்பதாவது:-

மருத்துவக் கழிவுகள்

தென்காசி மாவட்டத்தின் விவசாய நிலங்களிலும் திறந்தவெளிகளிலும், அண்டை மாநிலமான கேரளாவிலிருந்து டன் கணக்கில் கொண்டுவரப்படும் அபாயகரமான மருத்துவக் கழிவுகள் கொட்டப்பட்டு எரிக்கப்படும் அவலம் தொடர்கதையாகி வருகிறது. 'கேரள மாநில விற்பனைக்கு மட்டும்' என்று அச்சிடப்பட்ட பாட்டில்களும் நச்சுக் கழிவுகளும் கண்முன்னே ஆதாரமாகக் கிடந்தும், எல்லையோரச் சோதனைச் சாவடிகளைக் கண்காணிக்கத் திராணியின்றி விஜய் தலைமையிலான தவெக அரசு கும்பகர்ண தூக்கத்தில் ஆழ்ந்துள்ளது.

தவெக அரசு அலட்சியம்

இதேபோன்று ஒரு குண்டூசி அளவிலான கழிவுப் பொருளைக்கூடத் தமிழகத்திலிருந்து கொண்டுபோய்க் கேரள எல்லைக்குள் கொட்டிவிட முடியுமா? அங்கு அந்த அளவிற்குச் சோதனைகளும் கண்காணிப்பும் மிகக் கடுமையாக உள்ள சூழலில், அண்டை மாநிலத்தின் நச்சுக் கழிவுகளை இங்கு கொட்டும் அளவிற்குத் தமிழகக் காவல்துறையும், தவெக அரசும் இத்தனை அலட்சியமாக இருக்கிறது! இது தென்காசியில் மட்டுமல்ல, ஒட்டுமொத்த எல்லையோர மாவட்டங்களிலும் தொடர்கிறது. பசுமையான நிலங்களை நஞ்சாக்கித் தமிழகத்தைக் கேரளாவின் குப்பைத் தொட்டியாக மாற்றும் இந்த ஆட்சியில், இன்னும் என்னென்ன கூத்துகளும் அவலங்களும் அரங்கேறப் போகின்றனவோ தெரியவில்லை!

கடுமையான நடவடிக்கை

எனவே, இனியாவது இந்த மெத்தனப் போக்கைக் கைவிட்டு, கேரள முதல்வரிடம் பேசி இந்த விவகாரத்திற்கு முதல்அமைச்சர் விஜய் உடனடியாக ஒரு முற்றுப்புள்ளி வைக்க வேண்டும். எல்லையோரச் சோதனைச் சாவடிகளில் கண்காணிப்பைத் தீவிரப்படுத்தி, கேரளக் கழிவுகளைத் தமிழகத்திற்குள் கடத்திவரும் வாகனங்களை உடனடியாகப் பறிமுதல் செய்வதோடு, மக்களின் சுகாதாரத்தோடு விளையாடும் சமூக விரோதிகள் மீது குண்டர் சட்டத்தின் கீழ் வழக்குப் பதிவு செய்து கடுமையான நடவடிக்கை எடுக்க வேண்டும் என வலியுறுத்திக் கேட்டுக்கொள்கிறேன்.

இவ்வாறு அதில் கூரியுள்ளார்.

அம்பத்தூர் அத்திப்பட்டு ஐ.சி.எப் காலனியைச் சேர்ந்தவர் ஹரிபிரசாத் (வயது 25). இவர் பட்டரைவாக்கத்தில் உள்ள தனியார் தொழிற்சாலை ஒன்றில் பணியாற்றி வந்தார். நேற்று இரவு 12 மணி அளவில் பணி முடிந்ததும் வீட்டிற்குச் செல்லாமல், அம்பத்தூர் தொழிற்பேட்டையிலிருந்து மதுரவாயல் பைபாஸ் சர்வீஸ் சாலை வழியாக நூம்பல் நோக்கித் தனது இருசக்கர வாகனத்தில் சென்று கொண்டிருந்தார். அந்தச் சாலையில் மழைநீர் வடிகால்வாய் அமைப்பதற்காகப் பள்ளம் தோண்டப்பட்டு, தடுப்புகள் ஏதுமின்றி திறந்த நிலையில் இருந்தது. இருள் சூழ்ந்த அந்தப் பகுதியில் சாலையோர மின்விளக்குகளும் இல்லாத நிலையில் வேகமாக வந்த ஹரிபிரசாத், பள்ளம் இருப்பதை அறியாமல் இருசக்கர வாகனத்துடன் உள்ளே விழுந்துள்ளார்.

சம்பவ இடத்திலேயே உயிரிழப்பு

இதில், கட்டுமான பணிகளுக்காக நடப்பட்டிருந்த இரும்புக் கம்பிகள் அவரது தலையில் ஆழமாக குத்தியதால் ரத்த வெள்ளத்தில் துடிதுடித்து சம்பவ இடத்திலேயே உயிரிழந்தார். இந்நிலையில் அவரது பின்னால் இருசக்கர வாகனத்தில் வந்தவர் இதை பார்த்து அதிர்ச்சியடைந்தார். இதுகுறித்துத் போலீசாருக்கு தகவல் தெரிவித்ததால் சம்பவ இடத்திற்கு விரைந்து வந்த அம்பத்தூர் தொழிற்பேட்டை போலீசார் தீயணைப்பு துறைக்கு தகவல் தெரிவித்து அங்கிருந்து வந்த மீட்பு படையினர் ஏணி மூலம் பள்ளத்தில் இறங்கி ரத்த வெள்ளத்தில் இருந்த ஹரிபிரசாத் உடலை மீட்டு மேலே கொண்டு வந்து 108 ஆம்புலன்ஸ்க்கு தகவல் தெரிவித்தனர்.

சம்பவ இடத்திற்கு வருகை தந்த மருத்துவர்கள் அவரை பரிசோதித்து அவர் இறந்து அரை மணி நேரத்துக்கு மேல் ஆகிவிட்டது என்று தெரிவித்தனர். பின்னர் உடலை கைப்பற்றி பிரேத பரிசோதனைக்காக கீழ்ப்பாக்கம் அரசு பொது மருத்துவமனைக்கு அனுப்பி வைத்தனர். இச்சம்பவம் குறித்து அண்ணா நகர் போக்குவரத்துப் புலனாய்வுப் பிரிவு போலீசார், வழக்கு பதிவு செய்து விசாரித்து வருகின்றனர்.

தமிழகத்தில், 'ஹுவாஸின் ஆட்டோமோட்டிவ் இந்தியா'(Hwashin Automotive India), 'சியோன் இ -ஹுவா சம்மிட் ஆட்டோ மோட்டிவ் இந்தியா'(Seoyon E-hwa Summit Automotive India) ஆகிய நிறுவனங்கள், 1,370 கோடி ரூபாய் மதிப்பிலான புதிய முதலீடுகளை மேற்கொள்வதற்கான விருப்ப கடிதங்களை, தொழில் துறை அமைச்சர் கீர்த்தனாவிடம், சென்னையில் நேற்று வழங்கின. இது தொடர்பாக வெளியிடப்பட்டுள்ள செய்திக்குறிப்பில் கூறப்பட்டுள்ளதாவது;-

தொழில் முதலீடுகள்

“தமிழகத்திற்கு வேண்டிய வர புதிய தொழில் முதலீடுகள், ஆந்திர மாநிலத்திற்கு செல்வதாக சமூக ஊடகங்களில் தகவல் பகிரப்பட்டு வருகிறது. இத்தகவல் முற்றிலும் உண்மைக்கு புறம்பானது.

2 நிறுவனங்கள்

காஞ்சிபுரம் மாவட்டம் இருங்காட்டுக்கோட்டை, 'சிப்காட்' நிறுவனத்தின் தொழில் பூங்காவில் செயல்பட்டு வரும், ஹுவாஸின் ஆட்டோமோட்டிவ் இந்தியா நிறுவனம், தமிழகத்தில் அடுத்த 5 ஆண்டுகளில், 850 கோடி ரூபாய் முதலீடு செய்ய முன்வந்துள்ளது.

இந்த முதலீடு ஆராய்ச்சி மற்றும் மேம்பாடு, உள்நாட்டு உற்பத்தி, திறன் மேம்பாடு, புதிய திட்ட மேம்பாடு ஆகியவற்றுக்கு பயன்படுத்தப்பட உள்ளது. காஞ்சிபுரம், செங்கல்பட்டு மாவட்டங்களில் செயல்பட்டு வரும், சியோன் இ-ஹுவா சம்மிட் ஆட்டோமோட்டிவ் இந்தியா நிறுவனம், தமிழகத்தில் அடுத்த 5 ஆண்டுகளில், 520 கோடி ரூபாய் முதலீடு செய்ய முன் வந்துள்ளது.”

இவ்வாறு அதில் தெரிவிக்கப்பட்டுள்ளது.

தமிழகத்தில் பத்திரப்பதிவு பணிகள், ‘ஆன்லைன்’ முறைக்கு மாற்றப்பட்டு வருகின்றன. இதற்கு ஆவண எழுத்தர்கள் எதிர்ப்பு தெரிவித்து, போராட்டத்தில் ஈடுபட்டனர்.

சார் பதிவாளர் அலுவலம்

முன்னதாக பதிவுத்துறை வெளியிட்டிருந்த அறிவிப்பில் கூறப்பட்டிருந்ததாவது:-

தமிழகத்தில் வீடு, மனை வாங்குவோர் அதற்கான பத்திரங்களை தயாரிக்க சார் பதிவாளர் அலுவலகத்தில் பத்திரங்கள் தாக்கல் செய்வதை தாங்களே மேற்கொள்ளலாம். ஆவண எழுத்தர்களுக்காக காத்திருக்காமல் பொது மக்கள் இந்த பணிகளை நேரடியாக மேற்கொள்ளலாம்.

தகவல்கள் உள்ளீடு

பதிவுத்துறையின் www.tnreginet.gov.in என்ற இணையதளத்தில் குடி மக்களுக்கான நுழைவு ஏற்படுத்தப்பட்டுள்ளது. பொது மக்கள் இந்த நுழைவில் அடிப்படை தகவல்கள் அளித்து தங்கள் பெயரில் ‘லாக் இன், பாஸ்வேர்ட்’ உருவாக்க வேண்டும்.

இதையடுத்து பதிவு செய்ய வேண்டிய ஆவண வகையை தேர்வு செய்து அடுத்தடுத்து நான்கு நிலைகளில் தேவையான தகவல்களை உள்ளீடு செய்தால் போதும்.

அடையாள எண்

பதிவுக்கு ஏற்ற வரைவு பத்திரம் தயாராகி விடும். இதன் அடுத்த கட்டங்களில் இணையதளத்தில் தேவையான விபரங்களை அளித்தால் அடையாள எண் உருவாகும். அதைத் தொடர்ந்து அடுத்த கட்டத்தில் பத்திரப்பதிவுக்கான நாள், நேரம் ஒதுக்கி ‘டோக்கன்’ ஆன்லைன் முறையில் கிடைத்துவிடும். இதை எடுத்துக் கொண்டு சம்பந்தப்பட்ட சார் பதிவாளர் அலுவலகத்துக்கு நேரில் சென்றால் பத்திரப்பதிவு செய்யலாம்.

இவ்வாறு, அதில் கூறப்பட்டுள்ளது.

தமிழகத்தில் தீபாவளி பண்டிகையையொட்டி நடைபெற்ற சில கொலைச் சம்பவங்கள் மற்றும் சட்டம்-ஒழுங்கு நிலவரம் குறித்து மத்திய உள்துறை அமைச்சகம், தமிழக கவர்னர் ஆர். அர்லேகரிடம் அறிக்கை கேட்டுள்ளதாக தகவல்கள் வெளியாகின. இந்த நிலையில், கவர்னர் அர்லேகர் டெல்லியில் மத்திய உள்துறை மந்திரி அமித்ஷாவை சந்திக்க உள்ளார்.

சட்டம்-ஒழுங்கு குறித்து அறிக்கை

தமிழகத்தில் தீபாவளி பண்டிகையின்போது நடைபெற்ற சில கொலைச் சம்பவங்கள் மற்றும் மாநிலத்தின் சட்டம்-ஒழுங்கு நிலவரம் தொடர்பாக மத்திய உள்துறை அமைச்சகம் கவர்னரிடம் அறிக்கை கேட்டதாக தகவல்கள் வெளியாகின. இதனால் கவர்னரின் டெல்லி பயணம் முக்கியத்துவம் பெற்றுள்ளது.

இருப்பினும், இந்தச் சந்திப்பு வழக்கமான நிர்வாக ரீதியிலான சந்திப்பு என்றும், விரிவான அறிக்கைகளை மின்னஞ்சல் மூலமாகவே அனுப்ப முடியும் என்பதால், இது ஏற்கனவே திட்டமிடப்பட்ட சந்திப்பு என்றும் கவர்னர் மாளிகை வட்டாரங்கள் தெரிவிக்கின்றன.

அமித்ஷாவுடன் சந்திப்பு

இதற்கிடையே, தமிழக கவர்னர் ஆர். அர்லேகர் டெல்லியில் மத்திய உள்துறை மந்திரி அமித்ஷாவை சந்திக்க உள்ளார். இந்தச் சந்திப்பைத் தொடர்ந்து அவர் ஜம்மு செல்ல திட்டமிட்டுள்ளதாக தகவல் வெளியாகி உள்ளது.

கவர்னரின் பயணத் திட்டம்

கவர்னர் அர்லேகரின் பயணத் திட்டத்தின்படி, டெல்லியில் அமித்ஷாவை சந்தித்துவிட்டு நவம்பர் 13-ந்தேதி ஜம்மு செல்கிறார். அங்கு தனது நிகழ்ச்சிகளை முடித்த பின்னர் நவம்பர் 14-ந்தேதிக்கு பிறகு மீண்டும் டெல்லி திரும்புகிறார். தொடர்ந்து நவம்பர் 15-ந்தேதி சென்னைக்கு வருவார் எனத் தெரிகிறது.

முதல்-அமைச்சர் ஆலோசனை

இதற்கிடையே, தமிழகத்தில் நிலவும் சட்டம்-ஒழுங்கு நிலவரம் குறித்து முதல்-அமைச்சர் விஜய் தலைமையில் உயர்மட்ட ஆலோசனைக் கூட்டமும் நடைபெற்றுள்ளது. மாநிலத்தின் தற்போதைய சூழல் குறித்து இந்தக் கூட்டத்தில் ஆலோசிக்கப்பட்டதாக தகவல்கள் தெரிவிக்கின்றன.

தமிழகத்தில் சட்டம்-ஒழுங்கு நிலவரம் தொடர்பாக மத்திய உள்துறை அமைச்சகம் அறிக்கை கேட்டதாக வெளியாகியுள்ள தகவல், கவர்னரின் டெல்லி பயணம் மற்றும் அமித்ஷாவுடனான சந்திப்பு ஆகியவை அரசியல் வட்டாரத்தில் கவனம் பெற்றுள்ளன.

கந்தசஷ்டி திருவிழாவை முன்னிட்டு வருகிற 15-ந் தேதி திருச்செந்தூர்-நெல்லை இடையே இயக்கப்படும் சிறப்பு ரெயில்கள் நின்று செல்லும் இடங்களை தெற்கு ரெயில்வே அறிவித்துள்ளது.

கந்தசஷ்டி

திருச்செந்தூர் சுப்பிரமணிய சுவாமி கோவில் கந்த சஷ்டி திருவிழா நேற்று முன்தினம் தொடங்கி நடந்து வருகிறது. முக்கிய நிகழ் வான சூரசம்ஹாரம் வருகிற 15-ந் தேதி மாலை நடக்கிறது. இதில் லட்சக்கணக் கான பக்தர்கள் கலந்து கொள்வார்கள். இந்த பக்தர்களின் வசதிக்காக 15-ந் தேதி திருச்செந்தூர் - நெல்லை இடையே இரண்டு சிறப்பு ரெயில்களை தெற்கு ரெயில்வே இயக்குகிறது.

சிறப்பு ரெயில்

அதன்படி வருகிற 15-ந் தேதி (ஞாயிற்றுக்கிழமை) மதியம் 3.20 மணிக்கு நெல்லை சந்திப்பு ரெயில் நிலையத்தில் இருந்து புறப்படும் முன்பதிவில்லா சிறப்பு ரெயில் (06001), மாலை 5 மணிக்கு திருச்செந்தூர் வந்தடையும்.மறு மார்க்கத்தில் இரவு 7:30 மணிக்கு திருச்செந்தூரில் இருந்து புறப்படும் சிறப்பு ரயில் (06002), 8:50 மணிக்கு நெல்லை சந்திப்பு ரெயில் நிலையம் சென்றடை யும். மற்றொரு சிறப்பு ரெயில் (06004), இரவு 9:30 மணிக்கு திருச்செந்தூரில் இருந்து புறப்பட்டு இரவு 10:45 மணிக்கு நெல்லை சந்திப்பு ரெயில் நிலையம் சென்றடையும். மறு மார்க்கத்தில் இரவு 11:30 மணிக்கு நெல்லை சந்திப்பு ரெயில் நிலையத்தில் இருந்து புறப்படும் சிறப்பு ரெயில் (06003), நள்ளிரவு 12:45 மணிக்கு திருச்செந்தூர் வந்தடையும்.இந்த ரெயில்கள் ஆறுமுகநேரி, நாசரேத், ஸ்ரீவைகுண்டம், செய்துங்கநல்லுார், பாளையங்கோட்டை ஆகிய ரெயில்நிலையங்களில் நின்று செல்லும். இந்த சிறப்பு ரெயில்கள் 10 பொதுப் பெட்டிகள், 2 சரக்கு பெட்டிகளுடன் இயக்கப் படும்.இந்த தகவல் தெற்கு ரெயில்வே வெளியிட்டுள்ள செய்திக்குறிப்பில் தெரிவிக்கப்பட்டு உள்ளது.

ஆட்டோக்களில் புதிய கட்டணத்துக்கு ஏற்ப, மீட்டர்களை திருத்தி அமைத்தால் மட்டுமே. எப்.சி., எனப்படும், தகுதிச் சான்று வழங்கப்படும்' என, தமிழக போக்குவரத்து ஆணையரகம் தெரிவித்துள்ளது.

கால அவகாசம்

இது குறித்து, தமிழக போக்குவரத்து ஆணையரக அதிகாரிகள் கூறுகையில், “தமிழகத்தில் ஓடும் ஆட்டோக்களுக்கு, 13 ஆண்டுகளுக்குப் பின், கடந்த மாதம் 28-ந்தேதி முதல், ஆட்டோ கட்டணம் மாற்றி அமைக்கப்பட்டுள்ளது. அதற்கேற்ப, தமிழகம் முழுதும் இயங்கும், 4.20 லட்சம் ஆட்டோக்களின் மீட்டர்களை திருத்தி அமைக்க, 6 மாதங்கள் கால அவகாசம் அளிக்கப்பட்டுள்ளது. அதற்கேற்ப கூடுதல் தொழில்நுட்பப் பணியாளர்களை ஈடுபடுத்தி, மீட்டர் திருத்தும் பணியை விரைந்து முடிக்க திட்டமிடப்பட்டு உள்ளது.

திருத்தப்பட்ட மீட்டர்

தற்போது ஓடும் பழைய ஆட்டோக்களை தொடர்ந்து இயக்க, 2 ஆண்டுகளுக்கு ஒரு முறை, எப்.சி. எனப்படும் தகுதிச்சான்று பெற வேண்டும். அதன்படி, வட்டார போக்குவரத்து அலுவலகங்களுக்கு வரும், பழைய ஆட்டோக்களில், புதிய கட்டணத்துடன் திருத்தப்பட்ட மீட்டர், கட்டாயம் இருக்க வேண்டும்.

'மீட்டர் இல்லா விட்டால், எப்.சி., வழங்கக் கூடாது என, வட்டாரப் போக்குவரத்து அலுவலர்களுக்கு உத்தரவிடப்பட்டுள்ளது. ஆட்டோவில் அதிக கட்டணம் வசூலிப்பு உள்ளிட்ட விதிமீறல்களைக் கண்காணிக்க, தமிழகம் முழுதும் வட்டாரப் போக்குவரத்து அலுவலகங்களில், சிறப்புக் குழுக்கள் அமைக்கப்பட்டுள்ளது” என்று தெரிவித்துள்ளனர்.

தமிழகத்தில் பண்டிகை நாட்களில் சட்டம்-ஒழுங்கு பிரச்சினைகள் ஏற்படுவதைத் தடுக்கும் வகையில், டாஸ்மாக் மதுபானக் கடைகளுக்கு பண்டிகை நாட்களிலும், அதற்கு முந்தைய நாளிலும் விடுமுறை அளிக்க அரசு முடிவு செய்துள்ளதாக தகவல் வெளியாகி உள்ளது.

டாஸ்மாக் கடை

தமிழக அரசின் டாஸ்மாக் நிறுவனம், சில்லறை விற்பனைக் கடைகள் மூலம் மதுபானங்களை விற்பனை செய்து வருகிறது. தற்போது திருவள்ளுவர் தினம், குடியரசு தினம், ராமலிங்கர் நினைவு நாள், மகாவீர் ஜெயந்தி, மே தினம், சுதந்திர தினம், நபிகள் நாயகம் பிறந்த நாள், காந்தி ஜெயந்தி ஆகிய 8 நாட்கள் மட்டும் டாஸ்மாக் கடைகளுக்கு விடுமுறை அளிக்கப்படுகிறது.

பண்டிகை நாட்களில் விடுமுறை

இந்த நிலையில், முதல்-அமைச்சர் விஜய் தலைமையில் நடைபெற்ற ஆலோசனைக் கூட்டத்தில், பண்டிகை நாட்களில் சட்டம்-ஒழுங்கு பிரச்சினைகள் ஏற்படுவதைத் தடுக்கும் நோக்கில் புதிய முடிவு எடுக்கப்பட்டதாகக் கூறப்படுகிறது.

அதன்படி, இனி பண்டிகை நாட்களிலும், அதற்கு முந்தைய நாளிலும் டாஸ்மாக் கடைகளுக்கு விடுமுறை அளிக்க திட்டமிடப்பட்டுள்ளதாக தகவல் வெளியாகி உள்ளது.

இதற்கான அதிகாரப்பூர்வ அறிவிப்பு வெளியாகும்பட்சத்தில், டாஸ்மாக் கடைகளுக்கு விடுமுறை அளிக்கப்படும் நாட்களின் எண்ணிக்கை அதிகரிக்கும்.

தமிழ்நாட்டில் 5 மாவட்டங்களில் காலை 10 மணி வரை மிதமான மழைக்கு வாய்ப்புள்ளதாக சென்னை வானிலை ஆய்வு மையம் தகவல் தெரிவித்துள்ளது.

காற்றழுத்த தாழ்வு பகுதி

சுமார் 5.8 கிமீ உயரம் வரை தெற்கு அந்தமான் மற்றும் அதனை ஒட்டிய கடல் பகுதிகளின் மேல் ஒரு வளிமண்டல சுழற்சி நிலவுகிறது இதன் காரணமாக நாளை (நவம்பர் 13-ம் தேதி) தென்கிழக்கு வங்கக்கடல் பகுதியில் ஒரு காற்றழுத்த தாழ்வு பகுதி உருவாகக்கூடும் என்றும், இது வடமேற்கு திசையில் நகர்ந்து, அதற்கடுத்த 24 மணி நேரத்தில் ஆழ்ந்த காற்றழுத்த தாழ்வு பகுதியாக மாறக்கூடும் என்றும், சுமார் 0.9 கிமீ உயரத்தில் மன்னார் வளைகுடா மற்றும் அதனை ஒட்டிய பகுதிகளின் மேல் ஒரு வளிமண்டல சுழற்சி நிலவுகிறது என்றும் சென்னை வானிலை மையம் தெரிவித்திருந்தது.

மழை

இந்நிலையில் தமிழகத்தின் 5 மாவட்டங்களில் காலை 10 மணி வரை மிதமான மழைக்கு வாய்ப்புள்ளதாக தகவல் தெரிவிக்கப்பட்டுள்ளது. இதன்படி ராமநாதபுரம், மயிலாடுதுறை, தூத்துக்குடி, நெல்லை மற்றும் குமரி மாவட்டத்தின் மேற்குத் தொடர்ச்சி மலையை ஒட்டிய பகுதிகளில் மழைக்கு வாய்ப்பு என வானிலை மையம் தெரிவித்துள்ளது.

தேவை அதிகரிப்பு, வரத்து குறைவு மற்றும் சாகுபடி பரப்பு குறைந்துள்ளதால் மஞ்சள் விலை தொடர்ந்து உயர்ந்து வருகிறது. இதன் காரணமாக ஒரு குவிண்டால் மஞ்சள் விலை ரூ.1,000-க்கும் மேல் அதிகரித்துள்ளது.

ஈரோட்டில் கடந்த அக்டோபர் 9-ந்தேதி ஒரு குவிண்டால் மஞ்சள் ரூ.19,851-க்கு விற்பனையானது. தொடர்ந்து அக்டோபர் 13-ந்தேதி ரூ.22,999-க்கு விற்பனை செய்யப்பட்டது.

மஞ்சள் விலை உயர்வு

இந்த நிலையில், தொடர் பண்டிகைகள் காரணமாக மஞ்சளுக்கான தேவை அதிகரித்துள்ளது. இதனால் நேற்று ஈரோடு ஒழுங்குமுறை விற்பனைக் கூடம் மற்றும் செம்மாம்பாளையத்தில் மஞ்சள் விலை உயர்ந்து காணப்பட்டது.

இதில் ஒரு குவிண்டால் விரலி மஞ்சள் குறைந்தபட்சம் ரூ.16,599 முதல் அதிகபட்சம் ரூ.24,211 வரையிலும், கிழங்கு மஞ்சள் ரூ.15,600 முதல் ரூ.21,577 வரையிலும் விற்பனையானது.

மஞ்சள் விலை தொடர்ந்து உயர்ந்து வருவது விவசாயிகள் மத்தியில் மகிழ்ச்சியை ஏற்படுத்தியுள்ளது.

தனியார் நிறுவனங்கள் மூலம் பத்திரப் பதிவு பணிகளை மேற்கொள்ள எதிர்ப்பு தெரிவித்து. தமிழகம் முழுவதும் பத்திர எழுத்தர்கள் போராட்டத்தில் ஈடுபட்டுள்ளனர். நேற்று 2-வது நாளாக இந்த போராட்டம் நீடித்தது. இதனால் பல இடங்களில் பத்திரப் பதிவு பணியில் தொய்வு ஏற்பட்டது.

புதிய திட்டம்

பத்திரப்பதிவு செய்வதற்காக சார்-பதிவாளர் அலுவலகங்களில் பொதுமக்கள் நீண்ட நேரம் காத்திருப்பதைத் தவிர்க்கவும். பத்திரப்பதிவில் நடைபெறும் முறைகேடுகளை கட்டுப்படுத்தவும், தமிழக பத்திரப்பதிவுத் துறையில் ஸ்டார் 3.0 என்ற மேம்படுத்தப்பட்ட புதிய திட்டத்தை செயல்படுத்த அரசு நடவடிக்கை எடுத்து வருகிறது.

இதன் ஒரு பகுதியாக நவீன வசதிகளுடன் கூடிய இ-ஹப் சேவை மையங்கள் அமைக்க திட்டமிடப்பட்டுள்ளது. இந்த சேவை மையங்கள் மூலம் பொதுமக்கள் சார்-பதிவாளர் அலுவலகங்களுக்கு நேரில் செல்லாமலேயே ஆன்லைன் வழியாக பத்திரப்பதிவு செய்துகொள்ள முடியும்.

டிஜிட்டல் டோக்கன் வசதி. அதிவேக வை-பை உள்ளிட்ட நவீன வசதிகளும் இந்த மையங்களில் இடம்பெற உள்ளன. முதல்கட்டமாக சென்னை, செங்கல்பட்டு, கோவை உள்ளிட்ட 5 இடங்களில் தனியார் நிறுவனங்கள் மூலம் மாதிரி பத்திரப்பதிவு மையங்களை செயல்படுத்த அரசு திட்டமிட்டுள்ளது.

தமிழகம் முழுவதும் போராட்டம்

அரசின் இந்த முடிவுக்கு எதிர்ப்பு தெரிவித்து தமிழகம் முழுவதும் பத்திர எழுத்தர்கள், பத்திரம் தொடர்பான பணியில் ஈடுபட்டு வரும் வக்கீல்கள், பத்திர எழுத்தர் அலுவலகங்களில் பணியாற்றி வரும் கணினி ஆபரேட்டர்கள். பத்திர விற்பனையாளர்கள் போராட்டத்தில் ஈடுபட்டுள்ளனர்.

கடந்த 2 நாட்களாக அவர்கள் போராட்டத்தில் ஈடுபட்டுள்ளதால் பத்திரப்பதிவு பணியில் கடும் தொய்வு ஏற்பட்டுள்ளது. குறிப்பாக முகூர்த்த நாளான நேற்று ஏராளமானோர் பத்திரம் பதிவு செய்ய முடியாமல் தவித்தனர்.

இந்த போராட்டம் குறித்து தமிழ்நாடு பத்திரம் நகல் எழுதுவோர் சங்கத்தின் கோவை மாவட்ட தலைவர் ஈஸ்வரன் கூறும்போது, 'ஆன்லைன் மூலம் பத்திரப்பதிவு செய்யும்போது அதிக மோசடி நடப்பதற்கு வாய்ப்பு உள்ளது. பத்திர எழுத்தர்கள் மூலம் இந்த பணிகளை செய்யும்போது மட்டுமே மோசடியை தடுக்க முடியும்.

வாழ்வாதாரம் பாதிக்கப்படும்

இ-ஹப் மையங்களை நடத்துவதற்கான ஒப்பந்தத்தைப் பெறுவதற்கு பெரும் தொகை தேவைப்படும். தனியார் நிறுவனங்களால் மட்டுமே இந்த மையத்தை நடத்த முடியும். இதனால் பல தலைமுறைகளாக பத்திரம் எழுதும் தொழிலில் ஈடுபட்டு வரும், பத்திர எழுத்தர்கள், வக்கீல்கள், பத்திர விற்பனையாளர்களின் வாழ்வாதாரம் பாதிக்கப்படும். பத்திரம் தயாரிக்கும் பணியை தனியாரிடம் ஒப்படைத்தால் கட்டணங்கள் அதிகரிக்க வாய்ப்பு உள்ளது. இதனால் சொத்துகளைப் பதிவு செய்ய வரும் சாமானிய மக்கள் பாதிக்கப்படுவார்கள்.

எனவே, தனியாரிடம் பத்திரம் தயாரிக்கும் பணியை ஒப்படைக்கும் முடிவை அரசு கைவிட வேண்டும். தொழில்நுட்ப வளர்ச்சிக்கேற்ப பத்திரப்பதிவுத் துறையில் மாற்றங்கள் வருவது அவசியம் என்றாலும், பல தலைமுறைகளாக இந்த தொழிலை நம்பி வாழும் ஆயிரக்கணக்கான குடும்பங்களின் எதிர்காலத்தையும் அரசு கவனத்தில் கொள்ள வேண்டும். பொதுமக்களுக்கு பயன் கிடைப்பதுடன், ஏற்கனவே இந்த தொழிலில் இருப்பவர்களின் வாழ்வாதாரமும் பாதிக்கப்படாத வகையில் அரசு தீர்வுகாண வேண்டும்' என்றார்.

கோவில்பட்டி அருகே கிராம மக்களை தரையில் அமர வைத்து லத்தியுடன் போலீஸ் இன்ஸ்பெக்டர் விசாரிக்கும் காட்சிகள் சமூக வலைதளங்களில் பரவி பரபரப்பை ஏற்படுத்தி உள்ளது.

இருதரப்பு மோதல்

தூத்துக்குடி மாவட்டம் கோவில்பட்டி அருகே மந்தித்தோப்பு கிராமம் ராஜகோபால் நகரில் நரிக்குறவர் காலனி உள்ளது. அங்கு தீபாவளி அன்று மதுப்பிரியர்கள் ஒன்றாக அமர்ந்து மது குடித்தனர்.

அப்போது, அவர்களுக்குள் வாக்குவாதம் ஏற்பட்டு இருதரப்பாக மோதிக் கொண்டனர். இதில், அந்த பகுதியைச் சேர்ந்த மூக்கையா, கணேசன், சரவணன், மாரி ஆகியோர் காயமடைந்து கோவில்பட்டி அரசு ஆஸ்பத்திரியில் சிகிச்சை பெற்றனர். இதுகுறித்து கோவில்பட்டி மேற்கு போலீசார் வழக்குப்பதிந்து விசாரணை நடத்தி, அந்த பகுதியைச் சேர்ந்த மாவீரன் (வயது 41), ரவி (39) ஆகிய 2 பேரை கைது செய்தனர். குமார், ரஞ்சித் ஆகியோரை தேடி வருகின்றனர்.

லத்தியால் விசாரணை

இந்த சம்பவங்களை தொடர்ந்து கோவில்பட்டி மேற்கு போலீஸ் இன்ஸ்பெக்டர் வானமாமலை அங்கு விசாரணை நடத்த சென்றார்.

அப்போது அவர். அங்குள்ள மக்கள் சிலரை தரையில் அமர வைத்து, கையில் லத்தியுடன் விசாரணை நடத்தியதுடன் தாக்க முயன்றதாக கூறப்படுகிறது. இதுதொடர்பான வீடியோ காட்சிகள் சமூக வலைதளங்களில் வைரலாகி பரபரப்பை ஏற்படுத்தி உள்ளது.

போலீசார் விளக்கம்

இந்த சம்பவம் குறித்து போலீசாரிடம் கேட்டபோது. இருதரப்புக்கு இடையே கைகலப்பு ஏற்பட்டு 4 பேர் காயம் அடைந்தனர்.

இதையடுத்து இன்ஸ்பெக்டர், இருதரப்புக்கு இடையே மீண்டும் தகராறு ஏற்பட்டு விடக்கூடாது என அவர்களிடம் பேசிக் கொண்டிருந்தார். அவர்களின் பாதுகாப்பு தான் முக்கியமாக இருந்தது. மற்றபடி யாரும் மிரட்டப்படவில்லை என்றனர்.

தஞ்சாவூர், திருவாரூர், மயிலாடுதுறை உள்ளிட்ட 9 மாவட்டங்களில் இன்று மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

காற்றழுத்த தாழ்வு பகுதி

இதுதொடர்பாக வெளியிடப்பட்டிருந்த செய்திக்குறிப்பில் கூறப்பட்டிருந்ததாவது:-

சுமார் 5.8 கிமீ உயரம் வரை தெற்கு அந்தமான் மற்றும் அதனை ஒட்டிய கடல் பகுதிகளின் மேல் ஒரு வளிமண்டல சுழற்சி நிலவுகிறது இதன் காரணமாக நாளை (நவம்பர் 13-ம் தேதி) தென்கிழக்கு வங்கக்கடல் பகுதியில் ஒரு காற்றழுத்த தாழ்வு பகுதி உருவாகக்கூடும். இது வடமேற்கு திசையில் நகர்ந்து, அதற்கடுத்த 24 மணி நேரத்தில் ஆழ்ந்த காற்றழுத்த தாழ்வு பகுதியாக மாறக்கூடும்.

சுமார் 0.9 கிமீ உயரத்தில் மன்னார் வளைகுடா மற்றும் அதனை ஒட்டிய பகுதிகளின் மேல் ஒரு வளிமண்டல சுழற்சி நிலவுகிறது.

இதன் காரணமாக இன்று (12-11-2026): தஞ்சாவூர், திருவாரூர், மயிலாடுதுறை, நாகப்பட்டினம், புதுக்கோட்டை, இராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்களில் ஓரிரு இடங்களிலும், காரைக்கால் பகுதிகளிலும் இடி மின்னலுடன் கூடிய மிதமான மழை பெய்யக்கூடும். மேற்கு தொடர்ச்சி மலை மாவட்டங்கள் மற்றும் ஏனைய வட கடலோர தமிழகத்தில் ஓரிரு இடங்களிலும், புதுவையிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.

மழை

13-11-2026: மேற்கு தொடர்ச்சி மலை மாவட்டங்கள் மற்றும் வட கடலோர தமிழகத்தில் ஓரிரு இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.

14-11-2026: தஞ்சாவூர், திருவாரூர், மயிலாடுதுறை, நாகப்பட்டினம், புதுக்கோட்டை, ராமநாதபுரம், தூத்துக்குடி, திருநெல்வேலி, கன்னியாகுமரி மாவட்டங்களில் ஒருசில இடங்களிலும், காரைக்கால் பகுதிகளிலும் மிதமான மழை பெய்யக்கூடும். வட கடலோர தமிழகத்தில் ஒருசில இடங்களிலும், புதுவையிலும் மிக லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.

15-11-2026: இராமநாதபுரம், விருதுநகர், தேனி, தென்காசி, தூத்துக்குடி, திருநெல்வேலி, கன்னியாகுமரி மாவட்டங்களில் ஒருசில இடங்களில் மிதமான மழை பெய்யக்கூடும். மேற்கு தொடர்ச்சி மலை மாவட்டங்கள், டெல்டா மாவட்டங்கள் மற்றும் வட கடலோர தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் லேசான மழை பெய்யக்கூடும். ஏனைய தமிழகத்தில் பொதுவாக வறண்ட வானிலை நிலவக்கூடும்.

16-11-2026: சென்னை, திருவள்ளூர், செங்கல்பட்டு, காஞ்சிபுரம் மற்றும் ராணிப்பேட்டை மாவட்டங்களில் ஓரிரு இடங்களில் மிதமான மழை பெய்யக்கூடும். தென் தமிழகத்தில் ஓரிரு இடங்களில் லேசான மழை பெய்யக்கூடும். ஏனைய தமிழகம், புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.

17-11-2026: சென்னை, திருவள்ளூர், செங்கல்பட்டு, காஞ்சிபுரம் மற்றும் ராணிப்பேட்டை மாவட்டங்களில் ஓரிரு இடங்களில் மிதமான மழை பெய்யக்கூடும். தெற்கு கடலோர தமிழகத்தில் ஓரிரு இடங்களில் லேசான மழை பெய்யக்கூடும். ஏனைய தமிழகம் புதுவை மற்றும் காரைக்கால் பகுதிகளில் பொதுவாக வறண்ட வானிலை நிலவக்கூடும்.

அதிகபட்ச வெப்பநிலை பற்றிய முன்னறிவிப்பு:

24 மணி நேர அதிகபட்ச வெப்பநிலை மாறுதல்:

12-11-2026 முதல் 15-11-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் குறிப்பிடத்தக்க மாற்றதிற்கான வாய்ப்பு குறைவு, எனினும் சற்று உயரக்கூடும்.

இயல்பு நிலையிலிருந்து அதிகபட்ச வெப்ப அளவின் வேறுபாடு:

12-11-2026 முதல் 15-11-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டி இருக்கக்கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு:

இன்று (12-11-2026) வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் மிக லேசான மழை பெய்ய வாய்ப்புள்ளது. அதிகபட்ச வெப்பநிலை 31-32° செல்சியஸை ஒட்டியும், குறைந்தபட்ச வெப்பநிலை 24-25° செல்சியஸை ஒட்டியும் இருக்கக்கூடும்.

மீனவர்களுக்கான எச்சரிக்கை:

தமிழக கடலோரப்பகுதிகள் & அரபிக்கடல் பகுதிகள்: எச்சரிக்கை ஏதுமில்லை.

வங்கக்கடல் பகுதிகள்:

இன்று (12-11-2026): அந்தமான் கடல் பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்.

13-11-2026 மற்றும் 14-11-2026: அந்தமான் கடல் பகுதிகள் மற்றும் தென்கிழக்கு வங்கக்கடலின் அநேக பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்.

15-11-2026: தென்கிழக்கு வங்கக்கடலின் சில பகுதிகள் மற்றும் அதனை ஒட்டிய மத்தியகிழக்கு வங்கக்கடல் பகுதிகளில் சூறாவளிக்காற்று மணிக்கு 45 முதல் 55 கிலோ மீட்டர் வேகத்திலும் இடையிடையே 65 கிலோ மீட்டர் வேகத்திலும், அந்தமான் கடல் பகுதிகள் மற்றும் இதர தென்கிழக்கு வங்கக்கடலின் சில பகுதிகள் மற்றும் அதனை ஒட்டிய மத்தியகிழக்கு வங்கக்கடல் பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்.

மேற்குறிப்பிட்ட நாட்களில் மீனவர்கள் இப்பகுதிகளுக்கு செல்ல வேண்டாமென்று அறிவுறுத்தப்படுகிறார்கள்.

இவ்வாறு அதில் தெரிவிக்கப்பட்டுள்ளது.

கள்ளக்குறிச்சி மாவட்ட கலெக்டர் பத்மஜாவுக்கு கள்ளக்குறிச்சி தவெக எம்.எல்.ஏ. அருள்விக்னேஷ், தனது செல்போனில் இருந்து சர்ச்சைக்குரிய வகையில் ஆபாச குறுஞ்செய்தி அனுப்பியதாக புகார் எழுந்தது. இந்த தகவல் சமூக வலைத்தளங்களில் வைரலாகி பரபரப்பை ஏற்படுத்தி உள்ளது. இதற்கு பல்வேறு அரசியல் கட்சியினரும் எதிர்ப்பு தெரிவித்து, கண்டனங்களை பதிவு செய்து வருகின்றனர்.

இந்த நிலையில் கல்வராயன்மலையில் உள்ள கிளாக்காடு பழங்குடியினர் உண்டு உறைவிட மேல்நிலைப்பள்ளியில் வருவாய் மற்றும் பேரிடர் மேலாண்மை துறை சார்பில் நேற்று கள்ளக்குறிச்சி மாவட்ட கலெக்டர் பத்மஜா தலைமையில் மக்கள் தொடர்பு திட்ட முகாம் நடைபெறும் என மாவட்ட நிர்வாகம் அறிவித்திருந்தது. மேலும் அதற்கான முன்னேற்பாடு பணிகளும் நடைபெற்றன.

ஆனால் நேற்று நடந்த முகாமில் மாவட்ட கலெக்டர் பத்மஜா பங்கேற்கவில்லை. அவருக்கு பதிலாக மாவட்ட வருவாய் அலுவலர் ஜீவா கலந்து கொண்டு நலத்திட்ட உதவிகளை வழங்கினார். கலெக்டர் பத்மஜா நேற்று கலெக்டர் அலுவலகத்திற்கும் செல்லவில்லை. மாறாக தனது முகாம் அலுவலகத்திலேயே இருந்து அலுவலக பணிகளை மேற்கொண்டார்.

தமிழகத்தில் மேற்கொள்ளப்பட உள்ள வாக்காளர் பட்டியல் திருத்தப் பணிகளை முன்னிட்டு இன்று வரைவு வாக்காளர் பட்டியல் வெளியிடப்படுகிறது.

வாக்காளர் எண்ணிக்கை

தமிழக சட்டமன்ற தேர்தலுக்கு முன்பு இறுதி வாக்காளர் பட்டி யல் 23.2.2026 அன்று வெளியிடப்பட்டது. 15.3.2026 நிலவரப்படி தமிழ்நாட்டில் மொத்தம் 5 கோடியே 69 லட்சத்து 17 ஆயிரத்து 979 (ஆண் வாக்காளர்கள் 2.78 கோடி, பெண் வாக்காளர்கள் 2.90 கோடி, மூன்றாம் பாலினத்தவர் 7,656). அதன் பின்னரும் வாக்காளர்கள் தொடர்ந்து சேர்க்கப்பட்டு வருகின்றனர்.

தமிழகத்தில் வாக்காளர் பட்டியல் தீவிர சிறப்பு திருத்தப்பணிகள் (எஸ்.ஐ.ஆர்.) முடிந்து, அதன் அடிப்படையில் கடந்த சட்டமன்ற தேர்தல் நடைபெற்றது. அடுத்ததாக, ஒவ்வொரு ஆண்டும் நடக்கும் வாக்காளர் பட்டியல் சிறப்பு சுருக்கமுறை திருத்தப்பணிகள் (எஸ்.எஸ்.ஆர்.) தொடங்கப்பட உள்ளன. இதற்கான அறிவிப்பை தேர்தல் கமிஷன் ஏற்கனவே வெளியிட்டு உள்ளது.

அதன்படி, 1.1.2027 தேதியை வாக்காளராக தகுதியேற்படுத்தும் நாளாக கொண்டு வாக்காளர் பட்டியல் திருத்தப்பணிகள் நடைபெறவுள்ளன. அதன்படி, வாக்குச்சாவடிகளை திருத்தி அமைத்தல் மற்றும் மறுசீரமைத்தல் பணிகள் கடந்த 2-ந்தேதி முடிவடைந்துவிட்டன. புதிய வாக்குச்சாவடிகளின் பட்டியலும் வெளியிடப்பட்டுவிட்டது.

இறுதிப்பட்டியல்

அதைத்தொடர்ந்து ஒருங்கிணைந்த வரைவு வாக்காளர் பட்டியல் இன்று (வியாழக்கிழமை) வெளியிடப்பட உள்ளன. அது பற்றிய விவரங்களை தமிழக தலைமை தேர்தல் அதிகாரி அர்ச்சனா பட்நாயக் வெளியிடுவார். சென்னையில் மாநகராட்சி கமிஷனரும் மற்ற இடங்களில் மாவட்ட கலெக்டர்களும் வரைவு வாக்காளர் பட்டியலை வெளி யிடுவார்கள். இன்று காலை 10 மணிக்கு மேல் வரைவுப் பட்டியல் வெளியிடப்பட உள்ளது.

காலஅவகாசம்

வரைவுப் பட்டியலில் வெளியானதும் வாக்காளர் ஒவ்வொருவரும் தங்களின் பெயர் இருக்கிறதா? சரியாக இருக்கிறதா? என்பது போன்ற அனைத்து விவரங்களையும் சரிபார்க்கலாம். அதோடு, புதிதாக பெயர் சேர்த்தல், இடம் மாற்றம், பெயர் நீக்குதல் போன்றவற்றுக்காக விண்ணப்பிக்கலாம். அதற்கு டிசம்பர் 11-ந்தேதி வரை காலஅவகாசம் வழங்கப்பட்டுள்ளது. இந்த விண்ணப்பங்கள் மீது டிசம்பர் 28-ந்தேதிக்குள் முடிவு எடுக்கப்படும். அடுத்த ஆண்டு ஜனவரி 4-ந்தேதி இறுதி வாக்காளர் பட்டியல் வெளியிடப்படும் என்று தெரிவிக்கப்பட்டுள்ளது.

தமிழ்நாட்டில் உள்ள தனியார் பள்ளிகளுக்கு நிரந்தர அங்கீகா ரம் உள்ளிட்ட அனுமதிகளை பெற்றுத்தருவதாகக்கூறி கட்சி நிதி என்ற பெயரில் பல கோடி ரூபாய் லஞ்சமாக பெற்றதாக தி.மு.க. முன்னாள் அமைச்சர் அன்பில் மகேஷ் மீது வழக்குப்பதிவு செய்யப்பட்டது. இந்த வழக்கில் பி.டி.அரசகுமார் என்பவர் ஏற்கனவே கைது செய்யப்பட்டார். முன்னாள் எம்.எல்.ஏ. முத்துக் குமார், சரவணன் ஆகியோர் சரணடைந்துள்ளனர்.

இந்த வழக்கில் கைதாகி சிறையில் இருக்கும் அன்பில் மகேஷ் ஜாமின் மனுவை லஞ்ச ஒழிப்பு வழக்குகளை விசாரிக்கும் சிறப்பு கோர்ட்டு தள்ளுபடி செய்துள்ளது. இதையடுத்து, ஜாமின் கேட்டு சென்னை ஐகோர்ட்டில் அன்பில் மகேஷ் மனு தாக்கல் செய்துள்ளார். இந்த மனுவை அவசர வழக்காக விசாரிக்கக் கோரி ஐகோர்ட்டு நீதிபதி வி.லட்சுமிநாராயணனிடம், அன்பில் மகேஷ் தரப்பில் மூத்த வக்கீல் பி.வில்சன் ஆஜராகி கோரிக்கை விடுத்தார்.

அதற்கு நீதிபதி, ஜாமின் கோரும் மனுவுக்கு எண்ணிடும் பணிகள் முடிந்தால் இன்று (வியாழக்கிழமை) விசாரணைக்கு எடுக்கப்படும் என்றார். அதேபோல, அன்பில் மகேஷ் மீதான வழக்கை ரத்து செய்யக்கோரி அவர் தாக்கல் செய் துள்ள மனு மீதான விசாரணையை தள்ளி வைக்க வேண்டும் என்று மூத்த வக்கீல் கோரிக்கை விடுத்தார். இதை ஏற்றுக் கொண்ட நீதிபதி, வழக்கு விசாரணையை வருகிற 30-ந்தேதிக்கு தள்ளி வைத்து உத்தரவிட்டார்.

அகில இந்திய ஒதுக்கீட்டில் வரும் எம்.பி.பி.எஸ். உள்ளிட்ட மருத்துவ படிப்புகளுக்கு மருத்துவ கலந்தாய்வுக்குழு கலந்தாய்வு மூலம் இடங்களை நிரப்பி வருகிறது. அந்த வகையில் நடப்பாண்டுக்கான மருத்துவ கலந்தாய்வை 4 சுற்றுகளாக நடத்த வேண்டும் என்று சுப்ரீம் கோர்ட்டு மருத்துவ கலந்தாய்வுக் குழுவுக்கு உத்தரவிட்டிருந்தது.

அவ்வாறு 4 சுற்று கலந்தாய்வை நடத்தி முடித்த நிலையிலும், 948 எம்.பி.பி.எஸ். இடங்கள் காலியாக இருந்ததாக தகவல்கள் வெளியாகி இருந்தன. இந்த இடங்களை நிரப்ப வேண்டும் என்பதை கருத்தில் கொண்டு 5-வது சிறப்புச் சுற்று கலந்தாய்வை நடத்த, மருத்துவ கலந்தாய்வுக் குழு முடிவு செய்தது. அதன்படி, காலியாக இருந்த 948 இடங்களில் தகுதியான மாணவ-மாணவிகளை சேர்க்க ஏதுவாக சிறப்புச் சுற்று கலந்தாய்வு நடத்தப்பட்டது.

அந்த கலந்தாய்வு முடிவில் 537 இடங்கள் ஒதுக்கப்பட்டன. இந்த நிலையில் சிறப்புச் சுற்று கலந்தாய்வு நடத்தி முடிக்கப்பட்ட சூழலிலும், தற்போது 411 இடங்கள் நிரப்பப்படாமல் காலியாக இருப்பதாக சொல்லப்படுகிறது. கடந்த ஆண்டில் அனைத்து சுற்று கலந்தாய்வு நிறைவில் 60 முதல் 70 எம்.பி.பி.எஸ். இடங் கள் காலியாக இருந்தது. ஆனால் நடப்பாண்டில் அதனைவிட கூடுதலாக இடங்கள் காலியாக இருக்கின்றன.

இன்றைய நவீன உலகில் சமூக வலைதளங்கள் மனிதர்க ளின் அன்றாட வாழ்க்கையில் தவிர்க்க முடியாத ஒன்றாகிவிட்டன. நண்பர்களுடன் தொடர்புகொள்வது. புதிய நபர்களுடன் அறிமுகமாவது, கருத்துகளை பகிர்வது என பல்வேறு தேவைகளுக்காக இன்ஸ்டாகிராம், முகநூல் உள்ளிட்ட சமூக வலைதளங்களை மக்கள் பயன்படுத்தி வருகின்றனர். ஆனால், தொழில்நுட்ப வளர்ச்சிக்கு ஏற்ப சமூக வலைதளங்களை தவறான நோக்கங்களுக்கு பயன்படுத்தும் செயல்களும் அதிகரித்து வருவது கவலை அளிக்கிறது.

அரங்கேறும் விபரீதம்

குறிப்பாக, தனிப்பட்ட முன்விரோதம் காரணமாக ஒருவரை பழிவாங்குவது, பெண்களிடம் நெருங்கிப் பழகுவது. குடும்ப உறவுகளுக்குள் குழப்பத்தை ஏற்படுத்துவது போன்ற செயல்களுக்கு போலி சமூக வலைதளக் கணக்குகள் பயன்படுத்தப்படுகின்றன. பெண்களின் புகைப்படங்களைப் பயன்படுத்தி போலியாகக் கணக்குகளை தொடங்குவது, மற்றவர்களிடம் பெண் பேசுவதுபோல் நடிப்பது. தனிப்பட்ட புகைப்படங்கள் மற்றும் குறுஞ்செய்திகளை பெற்று, பின்னர் அவற்றையே ஆயுதமாகப் பயன்படுத்துவது போன்ற விபரீதங்கள் அரங்கேறுகின்றன.

பழிவாங்க பயன்படுத்திய போலி கணக்கு

இதற்கு உதாரணமாக, நெய்வேலி பகுதியில் கடந்த சில வாரங்களுக்கு முன்பு ஒரு சம்பவம் நடந்துள்ளது. அப்பகுதியை சேர்ந்த வாலிபர் ஒருவருக்கும். அவரது பக்கத்து வீட்டில் வசிக்கும் நபருக்கும் இடையே முன்விரோதம் இருந்து வந்துள்ளது. இதனால் அவரை பழிவாங்க திட்டமிட்ட வாலிபர். புதிய சிம் கார்டு வாங்கி, முன்விரோதம் கொண்ட நபரின் பெயரில் இன்ஸ்டாகிராமில் போலி கணக்கை தொடங்கினார்.

தொடர்ந்து, அந்த நபரின் புகைப்படத்தை ஆபாசமாக சித்தரித்து, அவரது உறவினர்களுக்கு தவறான குறுஞ்செய்திகளை அனுப்பியுள்ளார். இதன் மூலம் சம்பந்தப்பட்ட நபரின் நற்பெ யருக்கு களங்கம் ஏற்படுத்த முயன்றுள்ளார். தனிப்பட்ட முன் விரோதத்தை தீர்த்துக்கொள்ள சமூக வலைதளத்தை பயன்படுத்திய இந்த சம்பவம் அதிர்ச்சியை ஏற்படுத்தியுள்ளது.

குடும்பத்தில் குழப்பத்தை ஏற்படுத்திய வாலிபர்

இதேபோல் கடலூர் பகுதியில் மற்றொரு சம்பவம் நடந்துள்ளது. கடலூரில் வேலை பார்க்கும் இளம்பெண் ஒருவரிடம் நெருங்கிப் பழக வேண்டும் என்ற நோக்கத்தில், அவரது கணவரை இன்ஸ்டாகிராம் மூலம் தொடர்புகொண்ட வாலிபர் ஒருவர், இளம்பெண் பேசுவதுபோல் நடித்து பழகி வந்துள்ளார்.

அப்போது இருவரும் புகைப்படங்களை பகிர்ந்துள்ளனர். இதில் அந்த வாலிபர் வேறொரு பெண்ணின் புகைப்படத்தை அனுப்பியுள்ளார். பின்னர் அந்த குறுஞ்செய்திகள் மற்றும் புகைப்படங்களை இளம்பெண்ணிடம் காண்பித்து, அவரது கணவர் வேறொரு பெண்ணுடன் பழகி வருவதாக கூறி நம்ப வைத்துள்ளார். இதனை உண்மை என நம்பிய இளம்பெண், தனது கணவரிடம் பேசுவதைத் தவிர்த்தார்.

பின்னர் அந்த வாலிபர் வீசிய காம வலையில் சிக்கி அவருடன் நெருங்கிப் பழகினார். மேலும், தனது குழந்தையையும் அந்த வாலிபருடன் சேர்ந்து துன்புறுத்தியதாக புகார் எழுந்தது. இதனால் கணவன், மனைவிக்கு இடையே கருத்து வேறுபாடு ஏற்பட்டு, இருவரும் தற்போது பிரிந்து வாழும் நிலை உருவாகியுள்ளது. இந்த விவகாரம் போலீஸ் நிலையம் வரை சென்றுள்ளது.

எச்சரிக்கை தேவை

இவ்வாறு ஒருவரை பழிவாங்குவதற்கும், மற்றொருவரின் குடும்ப வாழ்க்கையில் குழப்பத்தை ஏற்படுத்துவதற்கும் போலி சமூக வலைதள கணக்குகள் பயன்படுத்தப்படுவது சமூகத்தில் புதிய அச்சத்தை ஏற்படுத்தியுள்ளது. சமூக வலைதளங்களில் அறிமுகமாகும் நபர்களின் உண்மையான அடையாளம் தெரியாமல் அவர்களை நம்புவது பல்வேறு பிரச்சினைகளுக்கு வழிவகுக்கும்.

குறிப்பாக, தனிப்பட்ட புகைப்படங்கள், குடும்ப விவரங்கள், அந்தரங்க தகவல்கள் மற்றும் குறுஞ்செய்திகளை பகிர்வதில் மிகுந்த எச்சரிக்கை அவசியம். போலி கணக்குகள் மூலம் ஒருவரின் நம்பிக்கையை பெற்று, பின்னர் அதனை பழிவாங்கும் கருவியாகப் பயன்படுத்துவது தனிநபரின் நற்பெயரை மட்டுமின்றி குடும்ப உறவுகளையும் சிதைத்துவிடும்.

எனவே, சமூக வலைதளங்களில் புதிதாக அறிமுகமாகும் நபர்களிடம் எச்சரிக்கையுடன் பழக வேண்டும். போலி கணக்குகள் மூலம் மிரட்டல், அவதூறு அல்லது புகைப்படங்களை தவறாக பயன்படுத்தும் செயல்கள் நடந்தால் சம்பந்தப்பட்ட ஆதாரங்களை பாதுகாத்து சைபர் கிரைம் போலீசாரிடம் புகார் அளிக்க வேண்டும் என போலீசார் அறிவுறுத்தி உள்ளனர்.

திண்டுக்கல், செம்பட்டி, வத்தலக்குண்டு, தேனி மாவட்டம் தேவதானப்பட்டி, பெரியகுளம், தேனி, சின்னமனூர், உத்தமபாளையம், கம்பம், கூடலூர் வழியாக கேரள மாநிலம் குமுளிக்கு கடந்த 16 ஆண்டுகளுக்கு முன்பு நான்கு வழிச்சாலை அமைக்க திட்டமிடப்பட்டு நிலம் கையகப்படுத்தப்பட்டது.

138 கி.மீட்டர் தூரம் உள்ளதால் வாகன போக்குவரத்து குறைவாக இருப்பதாக கூறி, தேசிய நெடுஞ்சாலை ஆணையம் அகலப்படுத்தப்பட்ட இருவழிச்சாலையாக உருவாக்கியது. அப்போது திண்டுக்கல்லில் இருந்து வத்தலக்குண்டு வரை உள்ள 35 கி.மீட்டர் தூரமுள்ள சாலையை அமைக்க 4 ஆண்டுகள் ஆனது. அதன் பின்னர் பெரியகுளம், தேனி வீரபாண்டி, உத்தமபாளையம், கம்பம் ஆகிய இடங்களில் புறவழிச்சாலை பணிகள் 10 ஆண்டுகளுக்கும் மேலாகி நடந்து முடிந்தது.

திண்டுக்கல்- குமுளி சாலையில் கொடைக்கானல் சீசன் காலம், கேரள மாநில சபரிமலை அய்யப்பன் கோவில் சீசன், மூணாறு, தேக்கடி போன்ற சுற்றுலா இடங்களுக்கு அதிகளவில் வாகனங்கள் சென்று வருகின்றன. இதனால் போக்குவரத்து நெரிசல் மிகுந்து காணப்படுகிறது.

மேலும் விபத்துகள் அதிகம் நடைபெறுகிறது. எனவே நான்கு வழிச்சாலையாக மாற்ற மாவட்ட நிர்வாகம் மற்றும் திண்டுக்கல் எம்.பி., தேனி எம்.பி., ஆகியோர் தீவிர கவனம் செலுத்தி நான்கு வழிச்சாலையாக மாற்ற நடவடிக்கை எடுக்க வேண்டும் என்று வாகன ஓட்டிகளின் எதிர்பார்ப்பாக உள்ளது.

தமிழ்நாடு விவசாயிகள் சங்கத்தின் தெற்கு மாவட்டக்குழு (இந் திய கம்யூனிஸ்டு கட்சி சார்பு) நிர்வாகிகள் கூட்டம் தஞ்சையில் நடந்தது. கூட்டத்திற்கு மாவட்ட தலைவர் ராமச்சந்திரன் தலைமை தாங்கினார். மாவட்ட செயலாளர் பாஸ்கர், இந்திய கம்யூனிஸ்டு கட்சி மாவட்ட செயலாளர் சக்திவேல் ஆகியோர் கலந்துகொண்டு பேசினர்.

கூட்டத்தில் பயிர்க்காப்பீடு செய்வதற்காக கிராம நிர்வாக அலுவலர்கள் பல்வேறு நிபந்தனைகளை விதித்து வருகின்றனர். எனவே விவசாயிகளின் நலன் கருதி எவ்வித நிபந்தனைகளும் இன்றி பயிர்க்காப்பீடு செய்வதற்கான சான்றிதழ்களை கிராம நிர்வாக அலுவலர்கள் வழங்க நடவடிக்கை எடுக்க வேண்டும். தஞ்சை மாவட்டத்தை வறட்சி மாவட்டமாக அறிவித்து, பாதிக்கப்பட்ட விவசாயிகளுக்கு ஏக்கர் ஒன்றுக்கு ரூ.35 ஆயிரம் நிவாரணம் வழங்க வேண்டும்.

பயிர்க்காப்பீடு செய்வதற்கான காலக்கெடுவை நவம்பர் 30-ந்தேதி வரை நீட்டிக்க வேண்டும் என்பன உள்பட பல்வேறு தீர்மானங்கள் நிறைவேற்றப்பட்டன. இதில் மாநில நிர்வாக குழு உறுப்பினர் பன்னீர்செல்வம், மாவட்ட பொருளாளர் சவுந்தரராஜன் மற்றும் பலர் கலந்து கொண்டனர்.

தமிழகத்தில் கேரள மருத்துவ கழிவுகளை மர்ம நபர்கள் கொட்டிச்சென்ற சம்பவம் நடந்துள்ளது.

தென்காசிக்கு உட்பட்ட சங்கரன்கோவில் பகுதியில் விவசாய நிலங்களுக்கு அருகே கேரளாவில் இருந்து கொண்டு வரப்பட்ட டன் கணக்கிலான மருத்துவ கழிவுகளை மர்ம நபர்கள் கொட்டிச்சென்றனர். அந்த கழிவுகளுக்கு தீ வைத்ததால் எழுந்த நச்சுப்புகையால் விவசாய பணியில் ஈடுபட்டிருந்த விவசாயிகள் கடும் அவதியடைந்துள்ளனர்.

கேரளாவில் இருந்து மருத்துவ கழிவுகளை கொண்டு வந்து கொட்டும் சம்பவங்கள் கடந்த காலங்களிலும் நடந்தன. அதற்கு அப்போது கடும் எதிர்ப்பு கிளம்பியது. இதற்கு தடையும் விதிக்கப்பட்டது. மீறி கொண்டு வரப்படும் கழிவுகள் திருப்பி அனுப்பப்பட்ட நிகழ்வுகளும் நடந்தன.

இந்த சூழலில், மீண்டும் இதுபோன்ற சம்பவங்கள் தொடர்ந்து நடைபெறுவதாக சமூக ஆர்வலர்கள் வேதனை தெரிவித்து உள்ளனர்.

அதில் தரைத்தளத்தில் மாற்றுத்திறனாளிகளுக்கான நூலகம், விண்வெளி கோளரங்கம், முதல்தளத்தில் கண்காட்சி அரங்கம், வரவேற்பு மையம், 2-ம் தளத்தில் குழந்தைகளுக்கான நூலகம், 3-வது தளத்தில் போட்டி தேர்வுகளுக்கு தயாராகும் மாணவர்களுக்கு நூலகம், 4-ம் தளத்தில் தமிழ், வரலாற்று நூல்கள் மற்றும் பருவ இதழ்கள் பிரிவுகள் உள்ளன. 5 மற்றும் 6-வது தளத்தில் ஆங்கில நூல்கள் பிரிவு, 7-ம் தளத்தில் டிஜிட்டல் நூலகம் ஆகியவை உள்ளன.

மீண்டும் குற்றச்சாட்டு

இந்த நூலகத்தில் 4-வது தளத்தில் அகல்விளக்கு, பீனிக்ஸ் ஆகிய பதிப்பகத்தில் இருந்து வாங்கிய புத்தகங்களில் முறைகேடுகள் நடந்ததாக குற்றச்சாட்டு எழுந்ததை தொடர்ந்து அங்கு இருந்த 1500-க்கும் மேற்பட்ட புத்தகங்கள் அகற்றப்பட்டன. தற்போது அந்தப்பகுதியில் வேறு புத்தகங்கள் அடுக்கி வைக்கப்பட்டு உள்ளன. இந்த முறைகேடுகள் தொடர்பாக நேற்று பெரியார் அறிவுலகத்தில் லஞ்ச ஒழிப்புத்துறை போலீசாரும் விசாரணை நடத்தினர். இந்த விவகாரத்தில் லஞ்ச ஒழிப்பு போலீசார் வழக்குப்பதிவு செய்யாதது ஏன் என ஐகோர்ட் மதுரைக்கிளை கேள்வி எழுப்பி இருந்தது. இந்நிலையில், நூலகங்களில் நடந்த சோதனையில் கிடைத்த ஆவணங்களின்படி, முறைகேடு தொடர்பாக லஞ்ச ஒழிப்புத்துறை போலீசார் வழக்குப்பதிவு செய்தனர்.

சென்னையிலுள்ள 19 மண்டலங்களில் 14-ந்தேதி பொது விநியோகத்திட்ட மக்கள் குறைதீர் முகாம் நடைபெற உள்ளது.

பொது விநியோகத்திட்டத்தின் பயன்களை குடிமக்கள் எளிதில் பெறும் வகையில் தமிழ்நாடு முழுவதும் ஒவ்வொரு வட்டத்திலும் மக்கள் குறைதீர் முகாம் பிரதி மாதமும் நடத்தப்படும் என அரசு அறிவித்துள்ளது. அதன்படி நவம்பர் 2026 மாதத்திற்கான மாதாந்திர பொது விநியோகத்திட்ட மக்கள் குறைதீர் முகாம் சென்னையில் உள்ள உணவுப்பொருள் வழங்கல் மற்றும் நுகர்வோர் பாதுகாப்புத்துறையின் 19 மண்டல உதவி ஆணையாளர் அலுவலகங்களில் 14.11.2026 சனிக்கிழமை காலை 10 மணி முதல் மதியம் 1 மணி வரை நடைபெறவுள்ளது.

அங்கீகார சான்று

குடும்ப அட்டைகளில் பெயர் சேர்த்தல், பெயர் நீக்கம், முகவரி மாற்றம், கைபேசி எண் பதிவு / மாற்றம் செய்தல் உள்ளிட்ட பொது விநியோகத்திட்டம் தொடர்பான சேவைகள் இம்முகாமில் மேற்கொள்ளப்படும். மேலும், நியாய விலைக்கடைகளில் பொருள் பெற நேரில் வருகை தர இயலாத மூத்த குடிமக்கள் உள்ளிட்டோருக்கு அங்கீகார சான்றும் வழங்கப்படும்.

பொது விநியோக நியாய விலைக்கடைகளின் செயல்பாடுகள், தனியார் சந்தையில் விற்கப்படும் பொருட்கள் அல்லது சேவைகளில் குறைபாடுகள் குறித்த புகார்கள் ஏதேனும் இருப்பின் அவற்றை பொதுமக்கள் இம்முகாமில் தெரிவித்தால், குறைகளுக்கு விரைந்து தீர்வு காண செய்ய உரிய நடவடிக்கை மேற்கொள்ளப்படும். இச்சேவைகள் பதிவு செய்யப்பட்ட கைபேசி எண்களில் பெறப்படும் கடவுச்சொல் வழியாக (OTP) மட்டுமே மேற்கொள்ளப்படும் என்பதால் குடும்ப அட்டைதாரர்கள் பதிவு செய்யப்பட்ட கைபேசியுடன் மண்டல அலுவலகத்தை தொடர்பு கொள்ள வேண்டும்.

சென்னையிலுள்ள 19 மண்டல அலுவலக பகுதிகளில் உள்ள குடும்ப அட்டைதாரர்கள் இச்சேவையினை பயன்படுத்தி கொள்ளுமாறு கேட்டு கொள்ளப்படுகிறார்கள்.

சென்னை கே.கே.நகரை சேர்ந்தவர் அருண்ராஜ் (வயது 42). இவர் கட்டிட 'கான்ட்ராக்ட் நிறுவனம்' நடத்தி வருகிறார். 9 லாரிகளும் இவருக்கு சொந்தமாக உள்ளது. இவர் தனது மனைவி மற்றும் குடும்பத்தினரோடு சென்னை போலீஸ் கமிஷனர் அலுவலகம் வந்து பரபரப்பு புகார் மனு ஒன்றை கொடுத்தார். அந்த புகார் மனுவில் கூறியிருப்பதாவது:- எனது சொந்த ஊர் அரியலூர் ஆகும். நான் தற்போது சென்னை கே.கே.நகரில் வசித்து வருகிறேன். தி.மு.க. முன்னாள் அமைச்சர் சிவசங்கரை, சிவநேசன் என்பவர் எனக்கு அறிமுகம் செய்து வைத்தார். சிவசங்கர், அவரோடு சேர்ந்து 'கான்ட்ராக்ட் தொழில்' செய்ய என்னை கேட்டுக்கொண்டார். சிவசங்கர் கல்குவாரி தொழிலில் ஈடுபட்டார். அதற்கு எனக்கு சொந்தமான 9 லாரிகளையும் பயன்படுத்திக்கொண்டார். சிவசங்கரின் தேர்தல் செலவிற்காக ரூ.25 லட்சம் கொடுத்தேன்.

சட்ட நடவடிக்கை எடுக்க வேண்டும்

அதன் பிறகு கொஞ்சம் கொஞ்சமாக ரூ.3.35 கோடி வரை அவருக்காக செலவு செய்தேன். அதில் ரொக்கமாக ரூ.1.35 கோடி சிவநேசன் மூலமாக கொடுத்தேன். சிவசங்கர் செய்த தொழிலில் எனக்கு எந்தவித லாபத் தொகையையும் தரவில்லை. இதனால் நான் செலவு செய்த ரூ.3.35 கோடி பணத்தையும் திருப்பி கேட்டேன். திருப்பி தருவதாக சிவசங்கர் சொல்லி வந்தார்.

சமீபத்தில் கூட தீபாவளி பண்டிகைக்கு முன்பாக நான் கொடுத்த பணத்தை திருப்பி தருவதாக கூறினார்கள். ஆனால் திருப்பி தரவில்லை. முன்னாள் அமைச்சர் சிவசங்கர் மீதும், அவருக்கு பினாமியாக செயல்படும் சிவநேசன் மீதும் சட்டபூர்வ நடவடிக்கை எடுத்து எனக்கு தர வேண்டிய ரூ.3.35 கோடி பணத்தையும் வசூலித்து தருமாறு கேட்டுக்கொள்கிறேன். இவ்வாறு அந்த புகார் மனுவில் கூறப்பட்டுள்ளது.

பயத்தால் புகார் கொடுக்கவில்லை

புகார் மனு கொடுத்த பிறகு அருண்ராஜ், செய்தியாளர்களுக்கு அளித்த பேட்டியில் கூறியதாவது: "நான் சிவசங்கரிடம் கொடுத்த பணம் அனைத்தையும் ரொக்கமாகக் கொடுத்தேன். சிவநேசன் எனது பெயரில் இருந்த சொத்துகளை எல்லாம் விற்றுவிட்டார். நான் போய்க் கேட்டால் லாரியை ஏற்றிக் கொன்று விடுவதாக மிரட்டுகிறார். முன்னாள் அமைச்சர் சிவசங்கர் பின்னணியில் இருப்பதால் இதுபோன்ற செயல்களில் ஈடுபடுகிறார்கள். போன ஆட்சியில் புகார் கொடுத்திருக்கலாம். ஆனால், பயத்தால் நாங்கள் புகார் கொடுக்கவில்லை.எங்களிடம் ஆடியோ, வீடியோ ஆதாரங்கள், வாட்ஸ்அப் உரையாடல்கள், கால் ரெக்கார்டிங் மற்றும் நான் அவர்களுடன் இருந்த புகைப்படங்கள் அனைத்தும் இருக்கின்றன. அவற்றை காவல் துறையிடம் அளிக்கத் தயாராக இருக்கிறேன். முன்னாள் அமைச்சர் சிவசங்கரிடம் வாட்ஸ்அப் மூலம் உரையாடியிருக்கிறேன். காவல்துறை உரிய நடவடிக்கை எடுத்து எங்கள் பணத்தை மீட்டு தர வேண்டும்" என்று தெரிவித்தார்.

முன்னாள் அமைச்சர் சிவசங்கர் மீது ஏற்கனவே சென்னை மத்திய குற்றப்பிரிவு போலீசில் ஒரு வழக்கு நிலுவையில் உள்ளது. அந்த வழக்கு தொடர்பாக அவர் சென்னை மத்திய குற்றப்பிரிவு போலீசில் நேரடியாக ஆஜர் ஆனார் என்பது குறிப்பிடத்தக்கது.

தமிழ்நாடு நகர்ப்புற வாழ்விட மேம்பாட்டு வாரியம் அடுக்குமாடி குடியிருப்பு திட்டப்பகுதிகளில் அடிப்படை உட்கட்டமைப்பு வசதிகளை மேம்படுத்த ரூ.261.85 கோடி நிதி ஒதுக்கீடு குறித்து தமிழ்நாடு அரசு அரசாணை வெளியிட்டுள்ளது.

ரூ.261.85 கோடி நிதி ஒதுக்கீடு

இது தொடர்பாக, தமிழக அரசு வெளியிட்டுள்ள செய்திக்குறிப்பில் தெரிவித்திருப்பதாவது;-

வீட்டு வசதி மற்றும் நகர்ப்புற வளர்ச்சித் துறை அமைச்சரால் 28.08.2026 அன்று சட்டமன்றத்தில் அடுக்குமாடி குடியிருப்பு திட்டப்பகுதிகளில் அடிப்படை உட்கட்டமைப்பு வசதிகளை ரூ.355 கோடி திட்ட மதிப்பீட்டில் மேம்படுத்தப்படும் என அறிவிக்கப்பட்டது.

அதனை தொடர்ந்து, தமிழ்நாடு நகர்ப்புற வாழ்விட மேம்பாட்டு வாரியத்தின் கீழ் தமிழ்நாடு முழுவதும் பல்வேறு பகுதிகளில் அமைந்துள்ள அடுக்குமாடிக் குடியிருப்புகளில் வசிக்கும் பொதுமக்களின் அடிப்படை வசதிகளை மேம்படுத்தும் நோக்கில், குடிநீர் விநியோகம், கழிவுநீர் அகற்றம், மற்றும் இதர அத்தியாவசிய உட்கட்டமைப்பு வசதிகளை மேம்படுத்துவதற்காக ரூ.261.85 கோடி நிதி ஒதுக்கீடு செய்து தமிழ்நாடு அரசு நிர்வாக மற்றும் நிதி ஒப்புதல் வழங்கி அரசாணை எண். G.O.(4D) No.42, நாள் 06.11.2026-ன் மூலம் வெளியிட்டுள்ளது.

திட்டத்தின் முக்கிய அம்சங்கள்:

தமிழ்நாடு நகர்ப்புற வாழ்விட மேம்பாட்டு வாரியத்தால் தமிழ்நாடு முழுவதும் பராமரிக்கப்பட்டு வரும் அடுக்குமாடிக் குடியிருப்புகளில், குடிநீர் விநியோகம், கழிவுநீர் மேலாண்மை, சாலை மற்றும் மழைநீர் வடிகால் வசதிகள், மின்சார வசதிகள், தெருவிளக்குகள், பூங்காக்கள் உள்ளிட்ட அடிப்படை கட்டமைப்பு வசதிகள் ஏற்படுத்தப்பட்டுள்ளன.

இருப்பினும், சில குடியிருப்புகளில் குடிநீர் விநியோகம் மற்றும் கழிவுநீர் அகற்றும் கட்டமைப்புகளில் ஏற்பட்டுள்ள குறைபாடுகள், பழுதடைந்த ஆழ்துளைக் கிணறுகள், மேல்நிலை நீர்த்தேக்கத் தொட்டிகள், கழிவுநீர் சுத்திகரிப்பு நிலையங்கள் மற்றும் இதர உட்கட்டமைப்பு வசதிகளை மேம்படுத்த வேண்டிய அவசியம் ஏற்பட்டுள்ளது.

குடிநீர் விநியோகம் மேம்பாடு

சென்னை பெருநகர குடிநீர் வழங்கல் மற்றும் கழிவுநீரகற்று வாரியம் மூலம் ரூ.47.81 கோடி மதிப்பீட்டில் சென்னை மாநகராட்சிப் பகுதிகளில் தமிழ்நாடு நகர்ப்புற வாழ்விட மேம்பாட்டு வாரியத்தின் கீழ் கட்டப்பட்டுள்ள குடியிருப்புத் திட்டப் பகுதிகளில் குடிநீர் விநியோகம் மற்றும் கழிவுநீர் அகற்றும் கட்டமைப்புகளை மேம்படுத்துவதற்காக 22 குடியிருப்புத் திட்டங்களில் உள்ள 28,375 குடியிருப்புகளுக்குக் குடிநீர் விநியோகக் கட்டமைப்பையும் மற்றும் தொடர்புடைய கட்டமைப்புகளை மேம்படுத்துவதற்கும், 42 குடியிருப்புத் திட்டங்களில் குறுகிய கால அடிப்படையில் கழிவுநீர் கட்டமைப்புகளை மேம்படுத்துவதற்கும், 14 குடியிருப்புத் திட்டங்களில் நீண்டகால அடிப்படையில் கழிவுநீர் கட்டமைப்புகளையும் மேம்படுத்தப்பட உள்ளன.

செம்மஞ்சேரி குடியிருப்புப் பகுதியில் ரூ.70 கோடி மதிப்பீட்டில் குடிநீர் விநியோகக் கட்டமைப்பு மேம்பாடு செம்மஞ்சேரியில் தமிழ்நாடு நகர்ப்புற வாழ்விட மேம்பாட்டு வாரியத்தால் பராமரிக்கப்பட்டு வரும் 870 தரை மற்றும் முதல் தளத்துடன் கூடிய குடியிருப்புக் கட்டடத் தொகுதிகளில் உள்ள 6,764 குடியிருப்புகளில் பொதுக் குடிநீர் குழாய்கள் (Public Fountains) மூலம் குடிநீர் விநியோகம் செய்யப்பட்டு வருகிறது. இதனால், குடியிருப்புவாசிகள் பொதுக் குடிநீர் குழாய்களிலிருந்து தண்ணீரை எடுத்துச் சென்று தங்களது குடியிருப்புகளுக்குப் பயன்படுத்த வேண்டிய நிலை உள்ளது.

764 குடும்பங்களுக்கும் சீரான குடிநீர் விநியோகம்

இதற்குத் தீர்வு காணும் வகையில், ரூ.70 கோடி மதிப்பீட்டில் தற்போது பயன்பாட்டில் உள்ள பழுதடைந்த வார்ப்பிரும்புக் குடிநீர் குழாய்கள் அனைத்தையும் அகற்றி, புதிய குடிநீர் விநியோகக் குழாய்களை அமைத்து, செம்மஞ்சேரி குடியிருப்புப் பகுதிக்கான குடிநீர் விநியோகக் கட்டமைப்பை முழுமையாக மேம்படுத்த 35 மில்லியன் லிட்டர் கொள்ளளவு கொண்ட மேல்நிலை நீர்த்தேக்கத் தொட்டி (35 MLD Overhead Tank), கீழ்நிலை நீர்த்தேக்கத் தொட்டி (Underground Tank) மற்றும் புதிய குடிநீர் விநியோகக் குழாய்கள் அமைத்தல் உள்ளிட்ட பணிகள் மேற்கொள்ளப்படவுள்ளன.

மேலும், ஒவ்வொரு குடியிருப்பிற்கும் தனித்தனியாக 300 லிட்டர் கொள்ளளவு கொண்ட HDPE குடிநீர்த் தொட்டிகளை குடியிருப்புக் கட்டடங்களின் மொட்டை மாடியில் அமைக்கவும் திட்டமிடப்பட்டுள்ளது.

இப்பணிகள் நிறைவேற்றப்படுவதன் மூலம் செம்மஞ்சேரி குடியிருப்புகளில் வசிக்கும் 6,764 குடும்பங்களுக்கும் சீரான மற்றும் பாதுகாப்பான குடிநீர் விநியோகம் செய்யப்படவுள்ளது.

ரூ.144.04 கோடியில் கட்டமைப்பு வசதிகள்

சென்னை மற்றும் இதர மாவட்டங்களில் 98 குடியிருப்புத் திட்டங்களில் ரூ.144.04 கோடி மதிப்பீட்டில் அடிப்படை கட்டமைப்பு வசதிகள் மேம்பாடு

தமிழ்நாடு நகர்ப்புற வாழ்விட மேம்பாட்டு வாரியத்தின் மூலம் சென்னை மற்றும் இதர மாவட்டங்களில் செயல்படுத்தப்பட்டு வரும் 98 குடியிருப்புத் திட்டப் பகுதிகளில் உள்ள 74,306 குடியிருப்புகளில் ரூ.144.04 கோடி மதிப்பீட்டில் குடிநீர் விநியோகத்தை மேம்படுத்துவதற்காக ஆழ்துளைக் கிணறுகள் (Bore Wells), தரைமட்ட நீர்த்தேக்கத் தொட்டிகள் (Sumps), நீரேற்று அறைகள் (Pump Rooms) உள்ளிட்ட வசதிகளை ஏற்படுத்துதல், கழிவுநீர் சுத்திகரிப்பு நிலையங்கள் (STPs), DEWATS அமைப்புகள், செப்டிக் டேங்குகள், உறிஞ்சுக் குழிகள் (Soak Pits) மற்றும் கழிவுநீர் வடிகால் கட்டமைப்புகளை ஏற்படுத்துதல் மற்றும் மேம்படுத்துதல், மின்சாரப் பகிர்மானப் பலகைகள் (Panel Boards), மின்சார உற்பத்தி ஜெனரேட்டர்கள் (Generators) மற்றும் மின்சார அறைகளில் (Electrical Rooms) தேவையான மேம்பாட்டுப் பணிகளை மேற்கொள்ளுதல் மற்றும் குடியிருப்புப் பகுதிகளில் முறையான திடக்கழிவு மேலாண்மை வசதிகளை ஏற்படுத்துதல் மற்றும் திட்டங்களின் நீடித்த பராமரிப்பிற்குத் தேவையான இதர அத்தியாவசிய உட்கட்டமைப்பு வசதிகள் மேற்கொள்ளப்பட உள்ளன.

பொதுமக்களின் வாழ்வாதாரம் மற்றும் வாழ்க்கைத் தரத்தை மேம்படுத்தும் நடவடிக்கை:

தமிழ்நாடு முழுவதும் தமிழ்நாடு நகர்ப்புற வாழ்விட மேம்பாட்டு வாரியக் குடியிருப்புகளில் வசிக்கும் மக்களுக்கு சீரான குடிநீர் விநியோகம், முறையான கழிவுநீர் அகற்றம், தடையற்ற மின்சார வசதி மற்றும் சுகாதாரமான சுற்றுப்புறச் சூழலை உறுதி செய்வதுடன், குடியிருப்புகளின் அடிப்படை கட்டமைப்பு வசதிகளை மேம்படுத்துவதற்கும், பொதுமக்களின் வாழ்க்கைத் தரத்தை உயர்த்துவதற்கும் தமிழ்நாடு அரசு மேற்கொண்டுள்ள இந்நடவடிக்கை முக்கியத்துவம் வாய்ந்ததாகும்.

இவ்வாறு அதில் தெரிவிக்கப்பட்டுள்ளது.

தமிழ்நாட்டில் ரூ. 1,370 கோடி புதிய முதலீடுகள் தொடர்பாக தொழில் துறை அமைச்சருடன் நிறுவன தலைவர்கள் சந்தித்து பேசினர்.

தமிழ்நாடு முதல்-அமைச்சர் விஜய் தலைமையிலான அரசு பொறுப்பேற்றது முதல், தமிழ்நாட்டை தொழில் துறையில் முதன்மை மாநிலமாக உயர்த்திட பல்வேறு தொழில் நிறுவனங்களுடன் புரிந்துணர்வு ஒப்பந்தம் மேற்கொண்டும், வெற்றி தமிழ்நாடு முதலீட்டாளர்கள் மாநாட்டை சென்னையில் நடத்தியும், இங்கிலாந்து நாட்டிற்கு அரசு முறைப்பயணம் மேற்கொண்டும், தமிழ்நாட்டிற்கு தொழில் முதலீடுகளை ஈர்த்து வருகிறது. மேலும், 2036-ம் ஆண்டுக்குள் தமிழ்நாட்டை 1.5 டிரில்லியன் அமெரிக்க டாலர் பொருளாதாரமாக உயர்த்த வேண்டும் என்ற தொலைநோக்குப் பார்வையோடு பல்வேறு திட்டங்களை வகுத்து செயல்படுத்தி வருகிறது.

புதிய தொழில் முதலீடுகள்

இந்நிலையில், தமிழ்நாட்டிற்கு வரவேண்டிய புதிய தொழில் முதலீடுகள் ஆந்திர பிரதேச மாநிலத்திற்கு செல்வதாக சமூக ஊடகங்களில் தகவல் பரப்பப்பட்டு வருகிறது. இத்தகவல் முற்றிலும் உண்மைக்கு புறம்பானதாகும்.

இதனை மெய்ப்பிக்கும் வகையில், காஞ்சிபுரம் மாவட்டம், இருங்காட்டுக்கோட்டை சிப்காட் தொழிற்பூங்காவில் செயல்பட்டு வரும் ஹுவாஸின் ஆட்டோமோட்டிவ் இந்தியா பிரைவேட் லிமிடெட் நிறுவனம், தமிழ்நாட்டில் அடுத்த 5 ஆண்டுகளில் சுமார் 850 கோடி ரூபாய் முதலீடு செய்ய முன்வந்துள்ளது. இம்முதலீடானது ஆராய்ச்சி மற்றும் மேம்பாடு, மேம்பட்ட உற்பத்தி தொழில்நுட்பங்கள், உள்நாட்டு உற்பத்தி, திறன் மேம்பாடு மற்றும் புதிய திட்ட மேம்பாடு ஆகியவற்றுக்காக பயன்படுத்தப்படவுள்ளது.

5 ஆண்டுகள்

அதேபோன்று, காஞ்சிபுரம் மற்றும் செங்கல்பட்டு மாவட்டங்களில் செயல்பட்டு வரும் சியோன் இ-ஹுவா சம்மிட் ஆட்டோமோட்டிவ் இந்தியா பிரைவேட் லிமிடெட் நிறுவனம், தமிழ்நாட்டில் அடுத்த 5 ஆண்டுகளில் சுமார் 520 கோடி ரூபாய் முதலீடு செய்ய முன்வந்துள்ளது. இம்முதலீடானது தொழில்நுட்ப மேம்பாடு, நவீனமயமாக்கல் மற்றும் புதிய வணிக மேம்பாட்டு திட்டங்கள் ஆகியவற்றுக்காக பயன்படுத்தப்படவுள்ளது.

ஹுவாஸின் ஆட்டோமோட்டிவ் இந்தியா பிரைவேட் லிமிடெட் மற்றும் சியோன் இ-ஹுவா சம்மிட் ஆட்டோமோட்டிவ் இந்தியா பிரைவேட் லிமிடெட் ஆகிய நிறுவனங்கள் தமிழ்நாட்டில் ரூ.1,370 கோடி புதிய முதலீடுகளை மேற்கொள்வதற்கான விருப்ப கடிதங்களை இன்று (11.11.2026) தலைமைச்செயலகத்தில், தொழில் துறை அமைச்சர் ச. கீர்த்தனா அவர்களிடம் வழங்கினார்கள். இது தமிழ்நாட்டின் மீது இந்நிறுவனங்கள் கொண்டுள்ள நீண்டகால அர்ப்பணிப்பை உறுதிப்படுத்தும் வகையில் அமைந்துள்ளன.

இந்நிகழ்வின்போது, தொழில், முதலீட்டு ஊக்குவிப்பு மற்றும் வர்த்தகத்துறை கூடுதல் தலைமைச்செயலாளர் முனைவர் ச. விஜயகுமார், இ.ஆ.ப., சிறப்புச்செயலாளர் கே. விவேகானந்தன், இ.ஆ.ப., வழிகாட்டி நிறுவனத்தின் மேலாண்மை இயக்குநர் மற்றும் தலைமைச்செயல் அலுவலர் தீபக் ஜேக்கப், இ.ஆ.ப. மற்றும் அரசு உயர் அலுவலர்கள் உடனிருந்தனர்.

விஜய் வாழ்த்துக்கடிதம்

அதில், அன்பிற்கினிய சீமான் அவர்களுக்கு, தங்களின் 08.11.2026-ஆம் தேதிய பிறந்தநாளையொட்டி, என்னுடைய இதயம் கனிந்த நல்வாழ்த்துகளைத் தெரிவித்துக் கொள்கிறேன்.தாங்கள் நல்ல உடல்நலத்துடனும், மனநிறைவுடனும், மகிழ்ச்சியுடன் வாழ்ந்திடவும், தங்கள் பொது வாழ்வில் மேலும் பல சிறப்புகளைப் பெற்று, மக்களுக்கான தங்கள் அர்ப்பணிப்பான பணிகளைத் தொடர்ந்து சிறப்புடன் ஆற்றிட என் அன்பான வாழ்த்துகளைத் தெரிவித்துக் கொள்கிறேன்.

அன்பும் நன்றியும்

இனிய பிறந்தநாள் நல்வாழ்த்துகள்”என்று பதிவிட்டுள்ளார். பிறந்த நாள் வாழ்த்து தெரிவித்த முதல் அமைச்சர் விஜய்க்கு நன்றி கூறியுள்ள சீமான், முதல் அமைச்சர் அனுப்பிய வாழ்த்து கடிதத்தையும் பகிர்ந்துள்ளார். சீமான் வெளியிட்ட பதிவில், “என்னுடைய பிறந்தநாளையொட்டி வாழ்த்துச்செய்தி அனுப்பிய முதல்வர் விஜய் அவர்களுக்கு என்னுடைய நெஞ்சம் நிறைந்த அன்பும், நன்றியும்!” என்று பதிவிட்டுள்ளார்.

தமிழ்நாடு விவசாயிகளின் கோரிக்கைகளுக்கிணங்க நடப்பு 2026-2027 ஆம் ஆண்டில், சம்பா நெற்பயிர்காப்பீட்டிற்கான காலவரம்பு 01.12.2026 வரை நீட்டிப்பு சம்பா பருவ நெற்பயிரை விவசாயிகள் நீட்டிக்கப்பட்ட காலக்கெடுவுக்குள் காப்பீடு செய்து கொள்ள வேளாண்மை உழவர் நலத்துறை அமைச்சர் ர. வினோத் வேண்டுகோள் விடுத்துள்ளார். இது தொடர்பாக, அரசு வெளியிட்டுள்ள செய்திக்குறிப்பில் தெரிவித்ததாவது:-

மேட்டூர் அணை

2026-2027 ஆம் ஆண்டில் நிலவும் எல் நினோ நிகழ்வின் தாக்கத்தால், தென்மேற்கு பருவமழை குறைவாக பெறப்பட்டதன் காரணமாக முக்கிய அணைகளில் போதிய நீர் இருப்பு மற்றும் நீர்வரத்து இல்லாத நிலை ஏற்பட்டது. எனினும், ஆகஸ்ட் மாத இறுதியில் மேட்டூர் அணையில் போதுமான நீர் வரத்து இருந்ததால், செப்டம்பர் 1ஆம் தேதி முதல் சம்பா நெல் சாகுபடிக்கு தேவையான பாசன வசதியை உறுதி செய்யும் வகையில்,தமிழ்நாடு முதல்-அமைச்சரால் மேட்டூர் அணை திறந்து வைக்கப்பட்டது.

சம்பா நெல் சாகுபடி

மேலும், வடகிழக்குப் பருவ மழை அக்டோபர் 15ஆம் தேதி முதல் பரவலாக பெய்து வருவதால், இயல்பாக ஆகஸ்ட் இரண்டாம் வாரத்திலிருந்து மேற்கொள்ளப்படும் சம்பா நெல் சாகுபடியை விவசாயிகள் செப்டம்பர் இறுதியிலிருந்து தான் முழு வீச்சில் மேற்கொண்டு வருகின்றனர்.

தேசிய பயிர் காப்பீட்டு

இந்நிலையில், மத்திய அரசின் தேசிய பயிர் காப்பீட்டு வலைதளத்திலும் விவசாயிகள் உரிய காலத்திற்குள் எளிதாக காப்பீடு செய்ய இயலாத நிலை ஏற்பட்டது. இத்தகைய சூழ்நிலையில், பெரும்பாலான மாவட்டங்களில் சம்பா நெற்பயிர் சாகுபடி தாமதமாக மேற்கொள்ளப்பட்டு வருவதை கருத்தில் கொண்டு, 2026-2027 சம்பா பருவ காப்பீட்டிற்கான காலக்கெடுவை நீட்டிக்குமாறு விவசாயிகள் அரசிடம் கோரிக்கை விடுத்தனர்.

டிசம்பர் 1-ம் தேதிக்குள் ஆவணங்களுடன் பதிவு

இக்கோரிக்கையினை ஏற்று, தமிழ்நாடு அரசால் எடுக்கப்பட்ட தொடர்முயற்சியால் சம்பா! தாளடி பிசானம் நெற்பயிர் காப்பீட்டுக்கான கடைசி தேதியை 01.12.2026 வரை நீட்டித்து மத்திய அரசு ஒப்புதல் வழங்கியுள்ளது. எனவே, அரியலூர், செங்கல்பட்டு, கடலூர், தருமபுரி, ஈரோடு, கள்ளக்குறிச்சி, காஞ்சிபுரம், கரூர், கிருஷ்ணகிரி, மதுரை, மயிலாடுதுறை, நாகப்பட்டினம், பெரம்பலூர், புதுக்கோட்டை, இராமநாதபுரம், இராணிப்பேட்டை சேலம், சிவகங்கை, தஞ்சாவூர், தேனி, திருச்சி, திருப்பத்தூர், திருப்பூர், திருவள்ளூர், திருவண்ணாமலை, திருவாரூர், வேலூர் மற்றும் விழுப்புரம் ஆகிய மாவட்டங்களில் டிசம்பர் 1-ம் தேதிக்குள் இதுவரை சம்பா நெற்பயிரை காப்பீடு செய்யாத விவசாயிகள் உரிய ஆவணங்களுடன் பதிவு செய்து பயனடையுமாறு தமிழ்நாடு அரசு கேட்டுக் கொள்கிறது.

அமைச்சர் ர.வினோத் வேண்டுகோள்

நிர்ணயம் செய்யப்பட்ட காலக்கெடுவுக்குள் ஏற்கெனவே பதிவு செய்த விவசாயிகள் மீண்டும் பதிவு செய்ய வேண்டாம் எனவும் தெரிவிக்கப்படுகிறது. விவசாயிகளின் நலனுக்காக தமிழ்நாடு அரசு செயல்படுத்திவரும் இப்பயிர்க்காப்பீட்டு திட்டத்தில் விவசாயிகள் தங்கள் மாவட்டங்களில் அறிவிக்கை செய்த பகுதிகளில் சம்பா நெற்பயிரை காப்பீடு செய்து பயனடையுமாறு வேளாண்மை உழவர் நலத்துறை அமைச்சர் ர.வினோத் வேண்டுகோள் விடுத்துள்ளார்.

இவ்வாறு அதில் தெரிவிக்கப்பட்டுள்ளது.

மணலி மண்டலத்தில் பசுமைப் பரப்பினை அதிகரிக்கும் வகையில் 450 மரக்கன்றுகள் இன்று நடப்பட்டது. இது தொடர்பாக, சென்னை மாநகராட்சி வெளியிட்டுள்ள செய்தி குறிப்பில் தெரிவித்ததாவது;-

12 லட்சம் மரக்கன்றுகள்

சென்னை மாநகராட்சியில் 12 லட்சம் மரக்கன்றுகள் நடுவதற்கு இலக்கு நிர்ணயிக்கப்பட்டு, 15 மண்டலங்களிலும் மரக்கன்றுகள் நடும் பணி தீவிரமாக மேற்கொள்ளப்பட்டு 1 லட்சத்திற்கும் மேற்பட்ட மரக்கன்றுகள் நடப்பட்டு, பராமரிக்கப்பட்டு வருகிறது. சாலை ஓரங்கள், சாலை மையங்கள், மயானபூமிகள், பூங்காக்கள், மக்கள் குடியிருப்பு பகுதிகள், குளங்கள், ஏரிகள், ஆறுகள் மற்றும் கால்வாய்க் கரைகள் உள்ளிட்ட பகுதிகளில் மரக்கன்றுகள் நடப்பட்டு வருகிறது.

மரக்கன்றுகள் நடும் பணி

மேலும், மரக்கன்றுகள் நடுவதற்கு தன்னார்வலர்கள், தன்னார்வ தொண்டு நிறுவனங்கள் மற்றும் குடியிருப்பு நலச்சங்கள் ஆகியோர் ஊக்குவிக்கப்பட்டு, மரக்கன்றுகள் நடும் பணிகள் மேற்கொள்ளப்படுகிறது.

மரக்கன்றுகள் கொள்முதல்

மரக்கன்றுகள் நடும் பணிகளுக்காக மரக்கன்றுகள் வளர்க்கும் நாற்றங்கால் பண்ணைகள் உருவாக்கப்பட்டு வளர்க்கப்பட்டு வருகிறது. மேலும், தனியாரிடமிருந்தும், வனத்துறையிடமிருந்தும் மரக்கன்றுகள் கொள்முதல் செய்தும் நடும் பணி மேற்கொள்ளப்படுகிறது.

மணலி மண்டலம்

மரக்கன்றுகள் நடும் பணிகளின் ஒரு பகுதியாக, இன்று வடக்கு வட்டாரம், மணலி மண்டலத்தில் பியூச்சுரா பிரதான சாலை, பியூச்சுரா லேஅவுட், மணலி புதுநகர் 5ஆவது பிளாக்கில் உள்ள பூங்கா, கடப்பாக்கம் ஏரி, மற்றும் இடையஞ்சாவடி மயானபூமி ஆகிய பகுதிகளில் 450 மரக்கன்றுகள் நடும் பணிகள் மேற்கொள்ளப்பட்டது.

துணை ஆணையாளர்

இதில் வடக்கு வட்டார துணை ஆணையாளர் ஸ்வேதா சுமன், வார்டு-22க்குட்பட்ட பியூச்சுரா பிரதான சாலை மற்றும் பியூச்சுரா லேஅவுட் பகுதிகளில் மரக்கன்றுகளை நட்டு, இப்பணிகளை பார்வையிட்டார்.

இவ்வாறு அதில் தெரிவிக்கப்பட்டுள்ளது.

கொடிய நோயைக் காட்டிலும் கொடூரமான இதுபோன்ற முறைகேடுகளால் வரலாறு திரிக்கப்படுகிறது, உண்மைகள் மறைக்கப்படுகிறது, கற்பவர் மனதில் தவறான தகவல்கள் பதியப்படுகிறது என வானதி சீனிவாசன் தெரிவித்துள்ளார்.

போலி புத்தகங்கள்

இது தொடர்பாக, பாஜக முன்னாள் தேசிய மகளிரணி தலைவர் வானதி சீனிவாசன் வெளியிட்டுள்ள எக்ஸ் தள பதிவில் தெரிவித்திருப்பதாவது;-

கோவை பெரியார் அறிவுலகத்தினைத் தொடர்ந்து தற்போது தென்காசி மாவட்ட மைய நூலகத்திலும் ரூ. 21 லட்சம் மதிப்பிலான 2200 அகல்விளக்கு பதிப்பக போலி புத்தகங்கள் கண்டுபிடிக்கப்பட்டு அகற்றப்பட்டுள்ளதாக செய்திகள் வெளியாகி இருப்பது மேலும் அதிர்ச்சி அடைய வைத்திருக்கிறது. இப்படி தமிழகம் முழுவதும் உள்ள நூலகங்களை ஆராய்ந்து தணிக்கை செய்து பார்த்தால் இன்னும் எத்தனை லட்சம் போலி புத்தங்கள் பரவியுள்ளது என்று நினைத்துப் பார்க்கவே இதயம் கனக்கிறது.

வெட்கித் தலைகுனிந்திருக்கிறது நூலகங்கள்

கொடிய நோயைக் காட்டிலும் கொடூரமான இதுபோன்ற முறைகேடுகளால் வரலாறு திரிக்கப்படுகிறது, உண்மைகள் மறைக்கப்படுகிறது, கற்பவர் மனதில் தவறான தகவல்கள் பதியப்படுகிறது.

அகல் விளக்கால் அறிவுச்சுடர் ஏற்ற வேண்டிய நூலகங்கள் இன்று அதே அகல்விளக்கால் தனது மாண்பினை இழந்து மவுனத்துடன் நிற்கிறது. முன்பு இருந்த மவுனத்தில் அறிவின் வாசம் வீசியது. இப்போது உள்ள மவுனத்தில் இப்படி குப்பைகளை என்னிடம் வந்து சேர்த்துவிட்டார்களே என்று வெட்கித் தலைகுனிந்திருக்கிறது நூலகங்கள்.

வச்சது புத்தகமும் இல்ல..! எழுதியது வரலாறும் இல்ல..!

இவ்வாறு அதில் தெரிவிக்கப்பட்டுள்ளது.

தூத்துக்குடி மாவட்டத்தில் 22.05.2018 மற்றும் 23.05.2018 ஆகிய நாள்களில் நடைபெற்ற ஸ்டெர்லைட் தாமிர உருக்காலை எதிர்ப்புப் போராட்டத்தின்போது உயிரிழந்த 13 நபர்களின் குடும்பங்களுக்குத் தலா ரூ. 25 லட்சமும் மற்றும் கொடுங்காயமடைந்த 40 நபர்களுக்குத் தலா ரூ. 5 லட்சமும் நிவாரண நிதியாக ஏற்கெனவே வழங்கப்பட்டது.

இந்நிலையில், இந்தப் போராட்டத்தில் பாதிக்கப்பட்ட குடும்பங்களைச் சேர்ந்தவர்கள் கூடுதல் நிவாரணம் வழங்கிடக் கோரி முதல்வரிடம் முறையிட்டதன்பேரில், அதனைக் கனிவுடன் பரிசீலனை செய்து, நீதியரசர் அருணா ஜெகதீசன் ஆணையத்தின் பரிந்துரையின்படி, இந்தப் போராட்டத்தில் உயிரிழந்தவர்களின் 13 குடும்பங்களுக்கு வழங்கவேண்டிய தலா ரூ. 50 லட்சத்தில் ஏற்கனவே வழங்கிய ரூ. 25 இலட்சம் போக மீதமுள்ள தொகையான தலா ரூ. 25 லட்சம் வீதம் ரூ. 3.25 கோடியும், கொடுங்காயமடைந்த 40 நபர்களுக்கு வழங்கவேண்டிய தலா ரூ. 10 லட்சத்தில் ஏற்கனவே வழங்கிய ரூ. 5 லட்சம் போக மீதமுள்ள தொகையான தலா ரூ. 5 லட்சம் வீதம் ரூ .2 கோடியும் என மொத்தம் ரூ. 5.25 கோடி கூடுதல் நிவாரண நிதியாக வழங்க முதல் அமைச்சர் விஜய் உத்தரவிட்டுள்ளார்” என்று தெரிவிக்கப்பட்டுள்ளது.

மேகதாது அணை விவகாரத்தில் தமிழகத்தின் உரிமைகளை புறக்கணிக்கும் கர்நாடக முதல்-மந்திரி டி.கே. சிவக்குமாரின் கருத்து ஏற்புடையதல்ல...சுப்ரீம் கோர்ட்டு தமிழக அரசு மேற்கொண்டுள்ள சட்ட நடவடிக்கைகளைத் தீவிரப்படுத்த வேண்டும் என்று இந்திய ஜனநாயகக் கட்சித் தலைவர் ரவி பச்சமுத்து வலியுறுத்தல். இது தொடர்பாக, அவர் வெளியிட்டுள்ள அறிக்கையில் தெரிவித்ததாவது:-

மேகதாது அணை

காவிரி ஆற்றின் குறுக்கே மேகதாது அணை கட்டுவதற்கு தமிழகத்தின் அனுமதி தேவையில்லை என்றும், சுப்ரீம் கோர்ட்டும் ஏற்கெனவே அனுமதி வழங்கிவிட்டதாகவும் கர்நாடக மாநில முதல்-மந்திரி டி.கே. சிவக்குமார் தெரிவித்துள்ள கருத்துகள் தமிழக விவசாயிகளிடையே பெரும் கவலையையும் அச்சத்தையும் ஏற்படுத்தியுள்ளன.

சட்டப்பூர்வ உரிமை

காவிரி என்பது கர்நாடகத்திற்கு மட்டும் சொந்தமானது அல்ல. தமிழகத்தின் டெல்டா மாவட்டங்களில் வாழும் லட்சக்கணக்கான விவசாயிகளின் உயிர்நாடியாகவும், கோடிக்கணக்கான மக்களின் குடிநீர் ஆதாரமாகவும் விளங்கி வருகிறது. காவிரி நீர் என்பது கர்நாடக அரசு தமிழகத்திற்கு வழங்கும் சலுகையல்ல, காவிரி நடுவர் மன்றத்தின் தீர்ப்பாலும் சுப்ரீம் கோர்ட்டின் உத்தரவாலும் உறுதிசெய்யப்பட்ட தமிழகத்தின் சட்டப்பூர்வ உரிமையாகும்.

சட்டப்பூர்வ நடைமுறைகள்

சுப்ரீம் கோர்ட்டு அனுமதி அளித்து விட்டதாக கர்நாடக முதல்-மந்திரி கருதுவது ஏற்புடையதல்ல. திட்டத்தின் விரிவான அறிக்கை, காவிரி மேலாண்மை ஆணையம் மற்றும் சம்பந்தப்பட்ட அதிகார அமைப்புகளின் கருத்துகள் உள்ளிட்ட சட்டப்பூர்வ நடைமுறைகள் இன்னும் முக்கியத்துவம் வாய்ந்தவையாக உள்ளன.

நிலுவையில் உள்ள வழக்கு

மேலும், காவிரிப் படுகை திட்டங்கள் தொடர்பாக மத்திய அரசு வெளியிட்ட புதிய வழிகாட்டுதல்களை எதிர்த்து, தமிழக அரசு கடந்த 03.08.2026 அன்று சுப்ரீம் கோர்ட்டில் தாக்கல் செய்துள்ள மனு நிலுவையில் இருப்பதும் குறிப்பிடத்தக்கது. இத்தகைய சூழலில், தமிழகத்தின் உரிமைகளை பாதிக்கும் வகையில் எந்தவொரு நடவடிக்கையும் மேற்கொள்ளப்படாமல் இருப்பதை உறுதிசெய்ய, சுப்ரீம் கோர்ட்டில் நிலுவையில் உள்ள வழக்கை தமிழக அரசு தீவிரமாக முன்னெடுக்க வேண்டும்.

சட்ட நடைமுறைகள்

தமிழக முதல்-அமைச்சர் பிரதமருக்கு கடிதம் எழுதியிருப்பது மட்டுமின்றி, சுப்ரீம் கோர்ட்டில் வலுவான சட்ட வாதங்களை முன்வைத்து, மேகதாது அணை திட்டத்திற்கு உரிய சட்ட நடைமுறைகள் முடிவடையும் முன்பு எந்தவித அனுமதியும் வழங்கப்படாத வகையில் நடவடிக்கை மேற்கொள்ள வேண்டும். தமிழகத்தின் நியாயமான நீர்ப்பங்கீட்டு உரிமைகளை பாதுகாக்க அரசியல் வேறுபாடுகளை கடந்து அனைத்து கட்சிகளையும், விவசாய அமைப்புகளையும் ஒருங்கிணைத்து தமிழக அரசு செயல்பட வேண்டும்.

அனைத்து கட்சி தலைவர்கள்

எனவே, மேகதாது அணை விவகாரத்தில் தமிழகத்தின் உரிமைகளை பாதுகாக்க மத்திய அரசும் உரிய நடவடிக்கைகளை மேற்கொள்ள வேண்டும் என்றும், அனைத்து கட்சி தலைவர்களுடன் ஆலோசனை நடத்தியும், உரிய அழுத்தத்தை மத்திய அரசுக்கும், கர்நாடக அரசுக்கும் வழங்க வேண்டும் என்றும், தமிழக அரசு சுப்ரீம் கோர்ட்டில் நிலுவையில் உள்ள வழக்கைத் தீவிரப்படுத்தி, தேவையான சட்டப்பூர்வ நடவடிக்கைகளைமேற்கொள்ள வேண்டும் என்றும் இந்திய ஜனநாயக கட்சியின் சார்பில் வலியுறுத்தி கேட்டுக்கொள்வதோடு, தமிழக விவசாயிகளின் வாழ்வாதாரத்தையும், காவிரி நீர்ப்பங்கீட்டு உரிமையையும் பாதுகாப்பதில் இந்திய ஜனநாயகக் கட்சி என்றும் உறுதியாக நிற்கும் என்பதையும் தெரிவித்து கொள்கிறேன்.

இவ்வாறு அதில் தெரிவிக்கப்பட்டுள்ளது.

இதையொட்டி அதிகாலை 1 மணிக்கு நடை திறக்கப்பட்டது. 1.30 மணிக்கு விசு வரூப தீபாராதனை, 2 மணிக்கு உதய மார்த்தாண்ட அபிஷேகம், தீபாராதனை நடந்தது. 3.30 மணிக்கு காலசந்தி தீபாராதனையை தொடர்ந்து சுவாமி ஜெயந்தி நாதர் வள்ளி-தெய்வானை அம்பாள்களுடன் யாகசாலைக்கு எழுந்தருளினார்.யாகசாலையில் பிரதான மூன்று கும்பங்களான சுவாமி ஜெயந்திநாதர், வள்ளி-தெய்வானை அம்பாள்கள் மற்றும் சிவன், பார்வதி உள்பட பரிவாரமூர்த்தி கும்பங்கள் என பல்வேறு கும்பங்கள் வைக்கப்பட்டு இருந்தன.

தொடர்ந்து 12 நாட்கள் விழா நடக்கின்றது. விழாவின் சிகர நிகழ்ச்சியான சூரசம்ஹாரம் 6-ம் திருநாளான 15-ந் தேதி (ஞாயிற்றுக்கிழமை) மாலை 4 மணி அளவில் நடைபெறுகிறது. 7-ம் திருநாளான 16-ந்தேதி (திங்கட்கிழமை) இரவு 11 மணி அளவில் சுவாமி குமரவிடங்க பெருமானுக்கும், தெய்வானை அம்பாளுக்கும் திருக்கல்யாணம் நடைபெறுகிறது. 8-ம் திருநாளான 17-ந்தேதி (செவ்வாய்க்கிழமை) இரவில் சுவாமி குமரவிடங்க பெருமான் தங்கமயில் வாகனத்திலும், தெய்வானை அம்பாள் பூம்பல்லக்கிலும் பட்டினப்பிரவேசம் வீதி உலா வந்து பக்தர்களுக்கு காட்சி அளிக்கின்றனர்.

9-ம் திருநாள் முதல் 11-ம் திருநாள் வரையிலும் தினமும் மாலை 6 மணி அளவில் திருக்கல்யாண மண்டபத்தில் சுவாமி-அம்பாள் ஊஞ்சல் காட்சி நடைபெறும். 12-ம் திருநாளான 21-ந்தேதி (சனிக்கிழமை) மாலை 4.30 மணிக்கு மஞ்சள் நீராட்டுதலுக்கு பின்னர் சுவாமி-அம்பாள் வீதி உலா வந்து கோவில் சேருகிறார்கள். விழாவையொட்டி திருச்செந்தூர் துணை போலீஸ் சூப்பிரண்டு மகேஷ்குமார் தலைமையில் ஏராளமான போலீசார் பாதுகாப்பு பணியில் ஈடுபட்டுள்ளனர்.

கந்த சஷ்டி விழா நாட்களில் லட்சக்கணக்கான பக்தர்கள் திருச்செந்தூருக்கு வருகை தருவார்கள் என்பதால் பக்தர்களின் வசதிக்காக சிறப்பு ரயில்கள் அறிவிக்கப்பட்டுள்ளன. இதன்படி, மதுரை ரயில்வே கோட்டம் சார்பில் நவ. 15ம் தேதி முன்பதிவில்லா சிறப்பு ரயில்கள் இயக்கப்படுகிறது. நெல்லையில் இருந்து பகல் 3.20க்கு புறப்படும் ரயில் மாலை 5 மணிக்கு திருச்செந்தூர் சென்றடையும். அதேபோல, திருச்செந்தூரில் இருந்து இரவு 7.30க்கு புறப்பட்டு இரவு 8.50-க்கு நெல்லை சென்றடையும்

சென்னையில் மாதாந்திர மின் பராமரிப்பு பணிகள் காரணமாக நாளை மறுநாள் காலை 10.00 மணி முதல் பிற்பகல் 3.00 மணி வரை கீழ்க்கண்ட பகுதிகளில் மின் விநியோகம் நிறுத்தப்படும் என தமிழ்நாடு மின் உற்பத்தி மற்றும் பகிர்மான கழகம் அறிவித்துள்ளது.

பராமரிப்பு பணிகள் முடிவடைந்தவுடன் பிற்பகல் 3.00 மணிக்கு மேல் மீண்டும் சீரான மின் விநியோகம் வழங்கப்படும் என்றும் தெரிவிக்கப்பட்டுள்ளது.

மின் தடை ஏற்படும் பகுதிகள் விவரம்

கல்லூரி சாலை துணை மின் நிலையம்

கல்லூரி லேன், நுங்கம்பாக்கம் நெடுஞ்சாலை, மூர்ஸ் சாலை, கே.என்.கே சாலை, வாலஸ் கார்டன் (1 முதல் 3-வது தெரு வரை), ரட்லேண்ட் கேட் (1 முதல் 6-வது தெரு வரை), சுப்பாராவ் அவென்யூ (1 முதல் 3-வது தெரு வரை), ஆண்டர்சன் சாலை, ஹாடோஸ் சாலை (1 மற்றும் 2-வது தெரு), நவாப் ஹபிபுல்லா அவென்யூ (1 மற்றும் 2-வது அவென்யூ), பைக்ராப்ட் கார்டன் மற்றும் அதனை சுற்றியுள்ள பகுதிகள்.

பல்லாவரம் துணை மின் நிலையம்

பழைய சந்தை, பம்மல் பிரதான சாலை, அப்துல் பாரூக் தெரு, காமராஜர் நெடுஞ்சாலை, தெய்வசிகாமணி தெரு, முத்தமிழ் நகர், கிருஷ்ணா நகர், அரங்கநாதன் தெரு, தேவராஜன் தெரு, சோழன் தெரு, இஸ்ரோ விருந்தினர் மாளிகை, ரேடியன்ஸ், ஜி.இ. நிறுவனம், ராணுவ குடியிருப்புகள், ஏர் இந்தியா, டிஆர்டிஓ, தாஜ் விமான உணவுத் தயாரிப்பு மையம், பாரத் பெட்ரோலியம் கார்ப்பரேஷன் நிறுவனம், எல்&டி, இந்துஸ்தான் பெட்ரோலியம் நிறுவனம் மற்றும் அதனை சுற்றியுள்ள பகுதிகள்.

எனவே, பொதுமக்கள் தங்களது அத்தியாவசிய தேவைகளை முன்கூட்டியே திட்டமிட்டு கொள்ளுமாறு கேட்டுக்கொள்ளப்படுகிறார்கள்

ரெயிலில் பயணம் செய்த மூதாட்டியிடம் இருந்து 50 பவுன் தங்க நகைகளை கொள்ளையடித்த வழக்கில், திண்டுக்கல்லை சேர்ந்த இன்ஸ்டாகிராம் பிரபலம் ஒருவரை போலீசார் கைது செய்துள்ளனர்.

திருமணத்திற்காக எடுத்து சென்ற நகைகள்

கேரள மாநிலம் செங்கனூரைச் சேர்ந்த மூதாட்டி ஒருவர், கடந்த 2-ம் தேதி சென்னையில் உள்ள தனது மகனின் வீட்டிலிருந்து சொந்த ஊருக்கு ரெயிலில் புறப்பட்டார். வீட்டில் நடைபெறவிருந்த திருமண விசேஷத்திற்காக, தனது பையில் 50 பவுன் தங்க நகைகளை அவர் பாதுகாப்பாக வைத்திருந்தார்.

தூங்கிய நேரத்தில் கைவரிசை

ரெயில் திருச்சூரை கடந்து சென்று கொண்டிருந்தபோது, மூதாட்டி அயர்ந்து தூங்கியுள்ளார். இதனை நோட்டமிட்ட மர்ம நபர் ஒருவர், மூதாட்டியின் பையில் இருந்த 50 பவுன் நகைகளை திருடிக்கொண்டு பாலக்காடு ரெயில் நிலையத்தில் இறங்கி தப்பியோடினார். கண்விழித்த மூதாட்டி நகைகள் திருடுபோனதை கண்டு அதிர்ச்சியடைந்து, இதுகுறித்து ரெயில்வே போலீசில் புகார் அளித்தார்.

சிசிடிவியில் சிக்கிய இன்ஸ்டா பிரபலம்

இந்த புகாரின் பேரில் வழக்குப் பதிவு செய்த ரெயில்வே போலீசார், ரெயில் நிலையங்களில் பொருத்தப்பட்டிருந்த சிசிடிவி கேமரா காட்சிகளை ஆய்வு செய்தனர். அதில் பதிவான உருவத்தை வைத்து தீவிர தேடுதல் வேட்டையில் இறங்கிய போலீசார், கொள்ளை சம்பவத்தில் ஈடுபட்டது திண்டுக்கல் மாவட்டத்தை சேர்ந்த இன்ஸ்டாகிராம் பிரபலமான பாலமுருகன் என்பதை கண்டறிந்தனர்.

கோவையில் கைது

இதனிடையே, திருடிய நகைகளை கோவையில் விற்பனை செய்வதற்காக பாலமுருகன் பதுங்கியிருப்பதாக போலீசாருக்கு ரகசிய தகவல் கிடைத்தது. இதனையடுத்து கோவை விரைந்த தனிப்படை போலீசார், பாலமுருகனை சுற்றி வளைத்து கைது செய்தனர்.

இந்த சம்பவம் அப்பகுதியில் பரபரப்பை ஏற்படுத்தியது.

எம்.எல்.ஏக்களுக்கு எச்சரிக்கை

இந்த சூழலில்தான் இன்று நடைபெற்ற தவெக எம்.எல்.ஏக்கள் ஆலோசனைக் கூட்டம் மிகுந்த முக்கியத்துவம் பெற்றது. ஆலோசனை கூட்டம் மாலை 4 மணியளவில் தொடங்கிய நிலையில் எம்.எல்.ஏக்களை தனித்தனியாக முதல் அமைச்சர் விஜய் அழைத்து பேசியதாக கூறப்படுகிறது. இந்த ஆலோசனையின் போது எம்.எல்.ஏக்களுக்கு எச்சரிக்கை விடுத்ததாகவும் கூறப்படுகிறது. இது தொடர்பாக வெளியான தகவல்கள் வருமாறு;

முழு சுதந்திரம்

தவெக எம்.எல்.ஏ.க்களை சிக்க வைக்கும் முயற்சியில் எதிர்க்கட்சிகள் ஈடுபட்டு வருகின்றன. நமக்கு எதிரிகள் அதிகமாக உள்ளனர். தவெக ஆட்சியை முடக்க திமுக தொடர்ந்து முயற்சி செய்து வருகிறது. நாம் அனைவரும் ஒற்றுமையாக இருந்து மக்கள் சேவையைத் தொடர்ந்து செய்ய வேண்டும். சட்டம்-ஒழுங்கு பிரச்சினையில் காவல்துறைக்கு முழு சுதந்திரம் வழங்கியுள்ளேன். நமது கூட்டணியில் உள்ளவர்களைத் தவிர, நமக்கு எதிர்க்கட்சிகள் அதிகமாக உள்ளன.

விரைந்து நடவடிக்கை

எனவே, எதிர்க்கட்சிகள் விரிக்கும் டிரப்பில் சிக்கிக்கொள்ளக் கூடாது. தவறான வழியில் செல்லும் எம்.எல்.ஏ.க்கள் யாராக இருந்தாலும் அவர்கள் மீது நடவடிக்கை எடுக்கப்படும். எந்த ஒரு பிரச்சினையாக இருந்தாலும் எனது கவனத்திற்கு கொண்டு வரவேண்டும்.. மக்கள் பிரச்சினைகளுக்கு விரைந்து நடவடிக்கை எடுக்க வேண்டும்.எந்த பிரச்சினை என்றாலும் எம்.எல்.ஏக்கள் என்னை நேரில் சந்திக்கலாம்” என்று முதல் அமைச்சர் விஜய் அறிவுறுத்தியதாக தகவல்கள் கூறுகின்றன.

திரு.வி.க.நகர் மண்டலத்தில் சென்னை நடுநிலைப்பள்ளி, அம்மா உணவகம் மற்றும் நியாய விலை கடைகளை மாநகராட்சி ஆணையாளர் ஜி.எஸ்.சமீரன், இன்று பார்வையிட்டு ஆய்வு செய்தார். இது தொடர்பாக, சென்னை மாநகராட்சி வெளியிட்டுள்ள செய்தி குறிப்பில் தெரிவித்ததாவது;-

ஆய்வு

இன்று மாநகராட்சி ஆணையாளர் ஜி.எஸ்.சமீரன், சென்னை மாநகராட்சி, திரு.வி.க.நகர் மண்டலம், வார்டு-70, கபிலர் தெருவில் உள்ள சென்னை நடுநிலைப்பள்ளியின் செயல்பாடுகள், சமையலறை, பள்ளி வளாகம் உள்ளிட்டவற்றை பார்வையிட்டு ஆய்வு செய்து, பள்ளி மாணவர்களுடன் கலந்துரையாடினார்.

அம்மா உணவகம்

பின்னர், ராஜா தெருவில் உள்ள அம்மா உணவகத்தினை பார்வையிட்டு, சமையலறை, பொதுமக்களுக்கு வழங்கப்படும் உணவின் தரம் மற்றும் வசதிகள் குறித்து ஆய்வு செய்து, மக்களுக்கு தரமான உணவினை வழங்கிட பணியாளர்களுக்கு அறிவுறுத்தினார்.

நியாய விலை கடைகள்

தொடர்ச்சியாக, அப்பகுதியில் உள்ள 2 நியாய விலை கடைகளை பார்வையிட்டு, பொதுமக்களுக்கு வழங்கப்படும் உணவு பொருட்களின் தரம் குறித்து ஆய்வு செய்தார். இந்த ஆய்வுகளின்போது, மத்திய வட்டார துணை ஆணையாளர் கௌஷிக், மற்றும் அலுவலர்கள் உடனிருந்தனர்.

இவ்வாறு அதில் தெரிவிக்கப்பட்டுள்ளது.

தமிழ்நாட்டில் இருந்து தேசியம் ஒருபோதும் மறையாது என்றும், தேசியம் தான் தமிழையும், தமிழ்நாட்டின் பெருமையையும் காக்கும் என்றும் துணை ஜனாதிபதி சி.பி.ராதாகிருஷ்ணன் தெரிவித்துள்ளார்.

கல்லூரி பவள விழா

தூத்துக்குடியில் உள்ள வ.உ.சிதம்பரனார் கல்லூரியின் பவள விழா மற்றும் முன்னாள் மாணவர் சந்திப்பு நிகழ்ச்சி இன்று கோலாகலமாக நடைபெற்றது. இந்த கல்லூரியின் முன்னாள் மாணவரான துணை ஜனாதிபதி சி.பி.ராதாகிருஷ்ணன், இந்நிகழ்ச்சியில் சிறப்பு விருந்தினராக கலந்து கொண்டார்.

மலரும் நினைவுகள்

கல்லூரி வளாகத்திற்கு வந்த அவர், தான் பயின்ற பழைய வகுப்பறைக்கு நேரில் சென்றார். அங்கு தனது மாணவ பருவத்து நண்பர்களை சந்தித்து, பழைய மலரும் நினைவுகளை உற்சாகத்துடன் பகிர்ந்து கொண்டார்.

பின்னர், கல்லூரியின் பவள விழா மேடையில் துணை ஜனாதிபதி சி.பி.ராதாகிருஷ்ணன் சிறப்புரையாற்றினார். அப்போது அவர் பேசியதாவது:-

“நான் படித்த இந்த வ.உ.சி கல்லூரிக்கு மீண்டும் வந்திருப்பது மிகுந்த மகிழ்ச்சி அளிக்கிறது. "நிறைய பேர் நினைப்பது போல தமிழ்நாட்டில் தேசியம் மலிந்துவிட்டதா என்று கேட்டால், அது நிச்சயம் இல்லை. இன்றைக்கு மட்டுமல்ல, சுதந்திரப் போராட்ட காலத்தில் மகத்தான தியாகிகள் சுப்பிரமணிய சிவாவாக இருக்கலாம், கப்பலோட்டிய தமிழன் வ.உ.சிதம்பரனாராக இருக்கலாம், வீரபாண்டிய கட்டபொம்மனாக இருக்கலாம், பெருந்தலைவர் காமராஜராக இருக்கலாம் இப்படி எண்ணற்ற தேசபக்தர்களை உருவாக்கிய மண் இந்த தமிழ் மண்.

தமிழ்நாட்டில் இருந்து தேசியம் ஒருபோதும் மறையாது. தேசியம் தான் தமிழை காக்கும், தமிழ்நாட்டின் பெருமையையும் காக்கும்.”

இவ்வாறு அவர் பேசினார்.

இந்நிகழ்ச்சியில் தமிழக கவர்னர் கல்லூரி நிர்வாகிகள், பேராசிரியர்கள் மற்றும் ஏராளமான முன்னாள், இந்நாள் மாணவர்கள் கலந்து கொண்டனர்.

சென்னை மாவட்டத்திற்கு உட்பட்ட 16 சட்டமன்ற தொகுதிகளை உள்ளடக்கிய வரைவு வாக்காளர் பட்டியல் நாளை (வியாழக்கிழமை) வெளியிடப்படுகிறது.

2 மாதங்களாக நடைபெற்ற சிறப்பு திருத்தப் பணிகள்

இந்திய தேர்தல் ஆணையத்தின் அறிவுறுத்தலின்படி, கடந்த 2 மாதங்களாக வாக்காளர் பட்டியலில் பெயர் சேர்த்தல், நீக்கல் மற்றும் புதிய இளம் வாக்காளர்களைச் சேர்க்கும் பணிகள் நடைபெற்றன.

இதன் அடிப்படையில், ஜனவரி 2027-க்கான வாக்காளர் பட்டியல் சிறப்பு சுருக்கத் திருத்தப் பணிகள் மேற்கொள்ளப்பட்டன. இந்தப் பணிகள் நிறைவடைந்ததைத் தொடர்ந்து, சென்னை மாவட்டத்திற்கான வரைவு வாக்காளர் பட்டியல் வெளியிடப்பட உள்ளது.

நாளை காலை 11 மணிக்கு வெளியீடு

இதற்கான நிகழ்ச்சி சென்னை ரிப்பன் மாளிகை கூட்டரங்கில் நாளை காலை 11 மணிக்கு நடைபெறுகிறது. இதில், சென்னை மாநகராட்சி ஆணையரும், தேர்தல் அதிகாரியுமான சமீரன் வரைவு வாக்காளர் பட்டியலை வெளியிடுகிறார்.

அங்கீகரிக்கப்பட்ட அரசியல் கட்சிகளின் பிரதிநிதிகள் முன்னிலையில் இந்தப் பட்டியல் வெளியிடப்பட உள்ளது. இதில் சென்னை மாவட்டத்திற்கு உட்பட்ட 16 சட்டமன்ற தொகுதிகளின் வரைவு வாக்காளர் பட்டியல் இடம்பெறுகிறது.

கோயம்புத்தூர் மாவட்டம் கதிர்நாயக்கன்பாளையம் பகுதியில் நள்ளிரவில் புகுந்த ஒற்றைக் காட்டு யானை, வீட்டை உடைத்து உள்ளே இருந்த ரேஷன் அரிசியை தின்று தீர்த்த சம்பவம் அப்பகுதி மக்களிடையே பெரும் பீதியை ஏற்படுத்தியுள்ளது.

நள்ளிரவில் யானை அட்டகாசம்

கோவை வனக்கோட்டத்திற்குட்பட்ட வனப்பகுதிகளில் இருந்து உணவு மற்றும் தண்ணீர் தேடி வெளியேறும் காட்டு யானைகள், சமீபகாலமாக குடியிருப்புப் பகுதிகளுக்குள் நுழைவது அதிகரித்துள்ளது. இந்நிலையில், நேற்று (செவ்வாய்க்கிழமை) நள்ளிரவில் குருடம்பாளையம் ஊராட்சிக்குட்பட்ட கதிர்நாயக்கன்பாளையம் பகுதிக்குள் ஒற்றைக் காட்டு யானை ஒன்று புகுந்துள்ளது.

வீடு சேதம்

அப்பகுதியைச் சேர்ந்த பூங்கோடி என்பவரது வீட்டின் அருகே சென்ற யானை, வீட்டின் சுற்றுச்சுவர், இரும்பு கேட் மற்றும் கூரை ஆகியவற்றை சேதப்படுத்தியது. பின்னர், வீட்டிற்குள் வைக்கப்பட்டிருந்த ரேஷன் அரிசியின் வாசனையை நுகர்ந்த யானை, சுவர் மற்றும் ஜன்னல் வழியாகத் தும்பிக்கையை உள்ளே விட்டு அரிசி மூட்டைகளை இழுத்துத் தின்றுள்ளது. யானையின் சத்தத்தைக் கேட்டு வீட்டிற்குள் இருந்தவர்கள் அச்சத்தில் உறைந்தனர்.

வீடியோ வைரல்

இதுகுறித்து தகவலறிந்த வனத்துறையினர் சம்பவ இடத்திற்கு விரைந்து வந்து சேதமடைந்த வீட்டைப் பார்வையிட்டு ஆய்வு செய்தனர். மேலும், யானை வீட்டை உடைத்து அரிசியை தின்னும் சிசிடிவி காட்சிகளும் வெளியாகி சமூக வலைதளங்களில் வைரலாகி வருகின்றன.

வனத்துறையினர் எச்சரிக்கை

கதிர்நாயக்கன்பாளையம் மற்றும் அதன் சுற்றுவட்டாரப் பகுதிகளில் காட்டு யானைகளின் நடமாட்டம் தொடர்ந்து கண்காணிக்கப்பட்டு வருவதாகவும், பொதுமக்கள் இரவு நேரங்களில் வீட்டை விட்டு வெளியே வர வேண்டாம் என்றும் வனத்துறையினர் எச்சரிக்கை விடுத்துள்ளனர். மேலும், சேதமடைந்த வீட்டிற்கு உரிய இழப்பீடு வழங்க வேண்டும் என அப்பகுதி மக்கள் கோரிக்கை விடுத்துள்ளனர்.