மீனவர்களின் விசைப்படகையும் இலங்கைக் கடற்படை பறிமுதல் செய்துள்ளது.இந்த நிலையில், விசைப்படகுடன் 7 பேரையும் மன்னார் கடற்படை முகாமுக்கு அழைத்துச் சென்று விசாரணை நடத்தி வருவதாகத் தகவல்கள் தெரிவிக்கின்றன.

இலங்கை கடற்படையின் அட்டூழியத்தால் வாழ்வாதாரம் பாதிக்கப்படுவதால் மத்திய மாநில அரசுகள் உரிய நடவடிக்கை எடுக்க வேண்டும் என்று மீனவர்கள் கோரிக்கை வைத்துள்ளனர்.

சென்னைக்கு 700 கி.மீ தொலைவில் வங்கக் கடலில் நிலை கொண்டுள்ள காற்றழுத்த தாழ்வு மண்டலம், ஆழ்ந்த காற்றழுத்த தாழ்வு மண்டலமாக வலுவடைந்துள்ளதாக வானிலை ஆய்வு மையம் தெரிவித்துள்ளது.

முரசு புயல்

நடப்பு வடகிழக்கு பருவமழை காலத்தில் அர்னாப் புயலுக்கு அடுத்ததாக உருவாகும் புயலுக்கு "முரசு" என்று பெயரிடப்படுகிறது. இது இந்தியா சார்பில் தமிழகத்தில் இருந்து பரிந்துரை செய்யப்பட்ட பெயர். இந்திய வானிலை ஆய்வு மையம் வெளியிட்ட தகவலின்படி, நேற்று இரவு 11.30 மணி நிலவரப்படி வங்கக்கடலின் தென்கிழக்கு பகுதியில் உருவான ஆழ்ந்த காற்றழுத்த தாழ்வு பகுதி மேற்கு - வடமேற்கில் மணிக்கு 22 கிலோமீட்டர் வேகத்தில் நகர்ந்து வருகிறது.

இன்று உருவாகும் புயல்

இந்நிலையில் சென்னைக்கு 700 கி.மீ தொலைவில் வங்கக் கடலில் நிலை கொண்டுள்ள காற்றழுத்த தாழ்வு மண்டலம், ஆழ்ந்த காற்றழுத்த தாழ்வு மண்டலமாக வலுவடைந்துள்ளதாக சென்னை வானிலை ஆய்வு மையம் தெரிவித்துள்ளது.

தொடர்ந்து மேற்கு - வடமேற்கு திசையில் நகர்ந்து அடுத்த 6 மணி நேரத்தில் புயலாக வலுப்பெறக் கூடும் என்றும், நாளை தீவிரப் புயலாக வலுப்பெறும் என்று வானிலை ஆய்வு மையம் கணித்துள்ளது. மேலும் வரும் நவம்பர் 3ஆம் தேதி அன்று தெற்கு ஆந்திராவை ஒட்டிய பகுதியில் கரையை கடக்க வாய்ப்புள்ளதாக கூறப்பட்டுள்ளது.

மணிக்கு 120 கி.மீ வேகத்தில் சூறாவளி

அப்போது மணிக்கு 100 முதல் 110 கிலோமீட்டர் வேகத்தில் சூறாவளி காற்று வீசக்கூடும். அதிகபட்சமாக 120 கிலோமீட்டர் வேகம் வரை காற்று வீசலாம்.

நெல்லூர் மற்றும் நர்சாபூர் இடையில் நவம்பர் 3-ம் தேதி காலையில் முரசு புயல் கரையை கடக்கும் என எதிர்பார்க்கப்படுகிறது.

இந்நிலையில் முரசு புயலின் மையப்பகுதி தெற்கு ஆந்திராவை நோக்கியே நகர்வதாக எல்நினோ தாக்க ஆய்வுக் குழு உறுப்பினர் பிரதீப் ஜான் தெரிவித்துள்ளார்.

தமிழகத்திற்கு மழை கிடைக்குமா?

இதுதொடர்பாக அவர் தனது எக்ஸ் வலைதளத்தில் கூறியிருப்பதாவது:-

முரசு புயல் தெற்கு ஆந்திரக் கடற்கரையை நெருங்கி வருவதால், அதன் வெளிப்புற மழைப் பட்டைகள் நாளை அதிகாலை முதல் சென்னை உட்பட, நவம்பர் 2-3 தேதிகளில் வடக்குத் தமிழ்நாட்டை நோக்கி விரிவடையும் என்று எதிர்பார்க்கப்படுகிறது. புயல் நம்மை நெருங்கி வந்து கடந்து செல்லும் போது நாம் அடிக்கடி காண்பது போல, வெப்பமான வானிலை இதமான மழை மற்றும் குளிர் நிறைந்த நாளாக மாறும்.

அடர்த்தியான மேகக் கூட்டமும், தீவிர மழையின் மையப்பகுதியும் பெரும்பாலும் கடற்பரப்பிலேயே தங்கி, தெற்கு-மத்திய ஆந்திரக் கடற்கரையை நோக்கி நகரும். இருப்பினும், இந்த அமைப்பு வடக்கு நோக்கி நகரும்போது, ​​சென்னை மற்றும் அதன் அண்டை மாவட்டங்கள் வெளிப்புற மற்றும் சுற்றியுள்ள மழைப் பட்டைகளுக்கு மிக அருகில் வந்து சிறிதளவு மழையைப் பெறக்கூடும்.

கனமழை

புயலுடன் தொடர்புடைய கனமழையை சென்னை பெறாமல் போகலாம், ஆனால் மிதமான மேகப் பட்டைகள் நகரைக் கடந்து செல்லக்கூடும், இதனால் இந்த அமைப்பு கடந்து செல்லும் போது அவ்வப்போது மழை பெய்யும். மழைப்பொழிவு விநியோகம் பின்வருமாறு இருக்கும்:

1. தெற்கு-மத்திய ஆந்திரா: கனமழை முதல் மிகக் கனமழை வரை பெருமளவில் பெய்யும் என எதிர்பார்க்கப்படுகிறது.

2. வட தமிழகம் (KTCC): இந்த புயல் அமைப்பு வடக்கு நோக்கி நகரும்போது, ​​அதன் சுற்றுப்புற மழைப் பட்டைகள் மிதமான மழையைக் கொண்டுவரக்கூடும்.

3. சென்னை: நிச்சயமாக சில மிதமான மழைப்பொழிவுகள் இருக்கும், ஆனால் தீவிர மழைப் பகுதி நகரத்திலிருந்து வெகு தொலைவில் இருக்க வாய்ப்புள்ளது. ஒருவேளை, வட சென்னையில் கடலோரப் பகுதிகளில், அதிர்ஷ்டம் இருந்தால் சில நல்ல மழை கிடைக்கலாம்.

சென்னையில் மழை

4. பொன்னேரி-குமிடிப்பூண்டி - புலிகாட் பகுதிகளைச் சுற்றியுள்ள தமிழகத்தின் வடகோடிப் பகுதிகளில், சில இடங்களில் கனமழை பெய்யக்கூடும்.

சுருக்கமாக, சென்னையில் மழை முற்றிலும் குறையாது, ஆனால் தெற்கு-மத்திய ஆந்திரக் கடற்கரைப் பகுதிகளில் மிக அதிக மழைப்பொழிவு இருக்கும் என்று எதிர்பார்க்கப்படுகிறது. புயல் சென்னையைக் கடந்து செல்லும் நேரடி ரேடாரைக் கண்காணித்து, மேகங்கள் உண்மையில் எவ்வாறு நகர்கின்றன என்பதைப் பார்ப்பது சுவாரஸ்யமாக இருக்கும். ஒரு சிறிய தாழ்வு ஏற்பட்டால்கூட, சென்னையில் குறிப்பிடத்தக்க மழை பெய்யக்கூடும். அடுத்த 2 நாட்களில் சென்னையின் சில பகுதிகளில் இந்த புயல் அமைப்பிலிருந்து 4-7 செ.மீ மழை எதிர்பார்க்கப்படுகிறது.

இவ்வாறு அதில் தெரிவிக்கப்பட்டுள்ளது.

அதிக கட்டணம் வசூலித்ததாக வந்த புகாரின்பேரில் நெல்லையில் இரவில் 50 பயணிகளுடன் சென்னை ஆம்னி பஸ்சை டிரைவர் நடுவழியில் நிறுத்தினார்.போலீஸ் எச்சரிக்கையை தொடர்ந்து மீண்டும் இயக்கினார்.

தனியார் ஆம்னி பஸ்

நெல்லை, தென்காசி, குமரி உள்ளிட்ட தென்மாவட்டங்களில் இருந்து சென்னைக்கு தனியார் ஆம்னி பஸ்கள் இயக்கப்படுவது வழக்கம். தொடர் விடுமுறையை பயன்படுத்தி இந்த பஸ்களில் அதிக கட்டணம் வசூலிக்கப்படுவதாக புகார்கள் எழுந்தன. நேற்று முன்தினம் இரவில் நாகர்கோவிலில் இருந்து நெல்லை வழியாக சென்னைக்கு ஆம்னி பஸ் புறப்பட்டு வந்தது. அந்த பஸ் நெல்லை வண்ணார்பேட்டை வடக்கு புறவழிச்சாலையில் உள்ள ரெயில்வே மேம்பாலம் அருகே வந்தபோது, டிரைவர் திடீரென பஸ்சை இருட்டிலேயே நடுவழியில் நிறுத்தினார். இதனால் பஸ்சில் இருந்த குழந்தைகள், பெண்கள், முதியவர்கள் என 50 பயணிகள் என்ன ஏதென்று தெரியாமல் தவித்தனர்.

டிரைவரிடம் வாக்குவாதம்

இதற்கான காரணம் குறித்து கேட்ட பயணிகளிடம், டிரைவர் எந்த பதிலும் சொல்லவில்லை. ஆத்திரமடைந்த பயணிகள் டிரைவரிடம் வாக்குவாதத்தில் ஈடுபட்டனர்.இதனால் அந்த பகுதியில் பெரும் பரபரப்பு ஏற்பட்டது.இதுகுறித்து அந்த வழியாக சென்ற ஒரு சிலர் நெல்லை மாநகர போலீஸ் கட்டுப்பாட்டு அறைக்கும், தச்சநல்லூர் போலீசுக்கும் தகவல் தெரிவித்தனர். தச்சநல்லூர் இன்ஸ்பெக்டர் விமலன் மற்றும் போலீசார் அங்கு விரைந்து சென்றனர்.

அதிக கட்டணம் வசூலிப்பு

நள்ளிரவில் பஸ்சை நிறுத்தியதற்கான காரணத்தை போலீசார் டிரைவரிடம் கேட்டனர். அதற்கு அவர், 'அதிக கட்டணம் வசூலித்ததாக வந்த புகாரின்பேரில் எங்கள் பஸ்களை இயக்கக்கூடாது என போக்குவரத்துத்துறை அமைச்சர் உத்தரவிட்டு உள்ளார்.இதனால் உரிமையாளர் பஸ்சை நிறுத்த சொல்லிவிட்டார். அதன் காரணமாகத் தான் நான் பஸ்சை இங்கு நிறுத்தி உள்ளேன். நீங்கள் அமைச்சரிடமோ அல்லது எங்கள் உரிமையாளரிடமோ பேசிக்கொள்ளுங்கள்' என்றார்.

இந்த பதிலை கேட்ட இன்ஸ்பெக்டர் விமலன், டிரைவரை எச்சரித்தார். 'யார் என்ன சொன்னாலும் சரி, முதலில் பஸ்சை இங்கிருந்து எடுக்க வேண்டும். பயணிகளின் பாதுகாப்புதான் மிகவும் முக்கியம். பஸ்சை எடுத்துக்கொண்டு சென் னைக்கு சென்று பயணிகளை பாதுகாப்பாக இறக்கிவிடுங்கள். அதன் பிறகு உங்கள் கட்டண பிரச்சினையை நீங்களே தீர்த்துக்கொள்ளுங்கள்' என்று கூறி டிரைவரை பஸ்சை எடுக்க கூறினார். போலீஸ் இன்ஸ்பெக்டரின் இந்த கண்டிப்பான உத்தரவை தொடர்ந்து, வேறு வழியின்றி டிரைவர் பஸ்சை இயக்கினார். இதற்கிடையே டிரைவரை, போலீஸ் இன்ஸ்பெக்டர் எச்சரிக்கும் காட்சிகள் சமூக வலைதளங்களில் வைரலாகி வருகிறது.

உரிய நடவடிக்கை

இதுகுறித்து வட்டார போக்குவரத்து ஆய்வாளர்கள் கூறுகையில், 'நெல்லையில் சிறப்பு பறக்கும் படை குழுவினர் எந்த சோதனையும் நடத்தவில்லை. ஆனால் ஆம்னி பஸ்களில் அதிக கட்டணம் வசூலிப்பதை தடுக்க நடவடிக்கை எடுத்து வருகிறோம். ஆம்னி பஸ்சை நடுரோட்டில் நிறுத்திவிட்டு டிரைவர் பஸ்சை எடுக்க மறுத்த சம்பவம் குறித்து விசாரணை நடத்தி வருகிறோம். போக்குவரத்து துறைக்கு அறிக்கை கொடுத்து உரிய நடவடிக்கை எடுக்கப்படும்' என்றனர்.

நீலகிரி மாவட்டம் ஊட்டியில் ஆண்டுதோறும் நவம்பர் மாதம் முதல் ஜனவரி மாதம் வரை பனிக்காலமாகும். கடந்த சில மாதங்களாக சீதோஷ்ண காலநிலை மாறுபாடு காரணமாக நீலகிரியில் தென்மேற்கு, வடகிழக்கு பருவமழை தாமதமாகவோ அல்லது முன்கூட்டியோ தொடங்குகிறது. இந்த ஆண்டு எதிர்பார்த்த அளவு தென்மேற்கு பருவமழை பெய்யவில்லை.

மேலும் 2 வாரங்களுக்கு முன் தொடங்கிய வடகிழக்கு பருவமழை கடந்த வாரம் வெளுத்து வாங்கியது. தற்போது மழை பெய்யவில்லை. நீலகிரியை பொருத்தவரை செப்டம்பர் மாத இறுதி அல்லது அக்டோபர் மாதத்தில் நீர் பனிப்பொழிவும், நவம்பர் மாதத்தில் உறை பனி தாக்கமும் தொடங்குவது வழக்கம். ஆனால், அக்டோபர் மாதத்தில் மழை தொடர்ந்து பெய்ததால் நீர் பனிப்பொழிவு தொடங்க வில்லை.

இந்தநிலையில் கடந்த 4 நாட்களாக நீலகிரியில் மழை குறைந்து, பகல் நேரத்தில் வெயில் அடித்து வருகிறது. தற் போது ஊட்டியில் நீர் பனிப்பொழிவு தாமதமாக தொடங்கியுள்ளது. இன்று காலை ஊட்டி நகரில் பெரும்பாலான இடங்களில் நீர் பனிப்பொழிவு காணப்பட்டது. நீர்நிலைகள் அருகே உள்ள புல்வெளி மைதானங்கள், காந்தல் பகுதி, தாவரவியல் பூங்கா, மார்க்கெட் பகுதி, பழைய குதிரை பந்தய மைதானம், அவலாஞ்சி உள்ளிட்ட இடங்களில் நீர் பனிப்பொழிவு அதிகமாக இருந்தது.

சாலைகளில் நிறுத்தி வைக்கப்பட்டு இருந்த வாகனங்கள் மீது நீர் பனிப்பொழிவு அதிக அளவில் காணப் பட்டது. தாவரவியல் பூங்காவில் உள்ள புல்வெளிகளில் நீர்த்துளிகள் வழக்கத்தை விட அதிகமாக இருந்தது. ஊட்டி நகரில் புல்வெளிகளில் நடைபயிற்சி செய்தவர்களின் காலணிகள் நீர் பனியால் நனைந்தன.

ஊட்டியில் நீர் பனிப்பொழிவு காரணமாக இரவு நேரங்களில் கடும் குளிர் நிலவுகிறது. இதனால் பொதுமக்களின் இயல்பு வாழ்க்கை பாதிக்கப்பட்டுள்ளது. ஊட்டியில் அதிகாலை நேரத்தில் 14 டிகிரி செல்சியஸ் வெப்பநிலையும், பகல் நேரத்தில் 22 டிகிரி செல்சியஸ் வெப்பநிலையும் பதிவானது. காற்றில் ஈரப்பதத்தின் அளவு 74 சதவீதம் இருந்தது. கடும் குளிர் காரணமாக மக்கள் நெருப்பு மூட்டி குளிர் காய்ந்து வருகின்றனர்.

குன்னூர் பகுதியில் கடந்த 2 நாட்களாக காலையில் நீர் பனிப்பொழிவு காணப்படுகிறது. சிம்ஸ் பூங்கா, எடப்பள்ளி, வெலிங்டன், அருவங்காடு போன்ற பகுதிகளில் நீர் பனிப்பொ ழிவு அதிகமாக இருந்தது.

விளையாட்டு மைதானங்களில் உள்ள புல்வெளிகளில் நீர் பனித்துளிகள் கோர்த்து இருப்பதால், நடைபயிற்சி மேற்கொள் பவர்கள், விளையாட்டு வீரர்கள் சிரமம் அடைந்து வருகின்றனர். நீலகிரியில் இந்த ஆண்டு உறை பனி தாக்கம் விரைவில் தொடங்கும் என்றும், அதிகமாக இருக்கக்கூடும் என்றும் எதிர்பார்க்கப்படுகிறது.

மனைவியை கொன்று புதைத்த தொழிலாளியை போலீசார் கைது செய்துள்ளனர்.

பெண் மாயம்

திண்டுக்கல் அருகே இரண்டெல்லப்பாறையைச் சேர்ந்தவர் லாரன்ஸ் (வயது 36). இவர் கூலி தொழிலாளியாக பணிபுரிந்து வந்தார். இவருக்கு கவுசல்யா ( வயது 32) என்ற மனைவியும் இருந்தார். இந்த தம்பதிக்கு 5 மற்றும் 2 வயதில் மகள்கள் உள்ளனர். வீட்டில் கணவன்- மனைவி இடையே குடும்ப பிரச்சினை காரணமாக அடிக்கடி தகராறு ஏற்பட்டு வந்ததாக கூறப்படுகிறது.

இந்த நிலையில் கடந்த ஆகஸ்ட் மாதம் வீட்டில் இருந்த கவுசல்யா திடீரென மாயமானார். கவுசல்யாவின் பெற்றோர் லாரன்சிடம் கவுசல்யாவை பற்றி கேட்டனர். அப்போது அவர் முறையாக பதில் அளிக்க வில்லை. இதையடுத்து அவர்கள், தங்கள் மகளை கண்டுபிடித்து தரக்கோரி திண்டுக்கல் தாலுகா காவல் நிலையத்தில் புகார் அளித்தனர். புகாரின் பேரில் போலீசார் லாரன்ஸை பிடித்து விசாரணை நடத்தினர்.

போலீசார் நடத்திய விசாரணையில், லாரன்ஸ், தனது மனைவியை பெற்றோர் வீட்டுக்கு அழைத்துச் செல்வதாக கூறி கூட்டிச் சென்றேன். பின்பு கல்நூத்தாம்பட்டி அருகே கவுசல்யாவின் கழுத்தை நெரித்து கொலை செய்தேன். பின்னர் உடலை ஒரு சாக்குமூட்டையில் கட்டி திண்டுக்கல் - நத்தம் சாலை பகுதியில் மணல் குவியலில் தோண்டி புதைத்து விட்டதாக கூறினார். இதைக் கேட்டு அதிர்ச்சியடைந்த போலீசார் எதற்காக கொலை செய்தாய் என விசாரித்தனர். ஆனால் அதற்கு அவர் முறையான பதில் அளிக்க வில்லை.

இதனைத்தொடர்ந்து தாலுகா போலீஸ் இன்ஸ்பெக்டர் புகழேந்தி, சப்-இன்ஸ்பெக்டர் சக்தி வேல் மற்றும் போலீசார் நேற்று சம்பவ இடத்திற்கு லாரன்சை அழைத்து சென்றனர். பின்னர் கிழக்கு தாசில்தார் பானுலட்சுமி, வருவாய் ஆய்வாளர் வினோத், அடியனூத்து கிராம நிர்வாக அலுவலர் சிவப்பிரதாப் ஆகியோர் முன்னிலையில் கவுசல்யா உடல் புதைக்கப்பட்டதாக கூறப்பட்ட 2 இடங்களில் பொக்லைன் எந்திரம் மூலம் தோண்டினர்.

பொருளாதாரத்தில் பின்தங்கிய மாணவர்கள் மத்திய அரசு கல்வி உதவித்தொகைக்கு விண்ணப்பிக்கலாம் என்று கலெக்டர் ஆனந்த் மோகன் தெரிவித்துள்ளார். இது குறித்து அவர் வெளியிட்டுள்ள செய்திக்குறிப்பில் கூறியிருப்பதாவது:-

கல்வி உதவித்தொகை

மத்திய அரசால் இதர பிற்படுத்தப்பட்டோர், பொருளாதாரத்தில் பின்தங்கியவர்கள், சீர்மரபினர் மாணவ-மாணவிகளுக்கு கல்வி உதவித்தொகை வழங்கும் வகையில் பிரதம மந்திரியின் கல்வி உதவித்தொகை திட்டம் செயல்படுத்தப்பட்டு வருகிறது.

2026-27-ம் ஆண்டிற்கு தேசிய கல்வி உதவித்தொகை இணையதளத்தில் அறிவிக்கப்பட்டுள்ள சிறந்த செயல்பாடு கல்வி நிறுவனம் பள்ளிகளில் நடப்பாண்டில் 9-ம் வகுப்பு முதல் 12-ம் வகுப்பு வரை பயிலும் தமிழகத்தைச் சேர்ந்த தகுதியான மாணவ- மாணவிகள் கல்வி உதவித்தொகை திட்டத்தில் தேசிய கல்வி உதவித்தொகை இணையதளத்தில் (https://scholarships.gov.in) விண்ணப்பிக்கலாம்.

மாணவிகளுக்கு 30 சதவீதம் ஒதுக்கீடு

இந்த திட்டத்தில் கல்விக் கட்டணம் மற்றும் விடுதிக் கட்டணமாக ஆண்டொன்றுக்கு அதிகபட்சமாக 9,10-ம் வகுப்பு படிப்பவருக்கு ரூ.75,000, மற்றும் 11, 12-ம் வகுப்பு பயில்பவருக்கு ரூ.1,25,000 வரை உதவித்தொகையாக மத்திய அரசால் வழங்கப்படும். 30 சதவீதம் மாணவிகளுக்கு இத்திட்டத்தில் ஒதுக்கீடு செய்யப்பட்டுள்ளது.

மாணவ, மாணவிகள் விண்ணப்பிக்க கடைசி நாள் வருகிற 30-ந் தேதி ஆகும். கல்வி நிறுவனங்கள் விண்ணப்பத்தினை சரிபார்க்க கடைசி நாள் 15.12.2026 .

ஆண்டு வருமானம் ரூ.2.50 லட்சம்..

மாணவ-மாணவிகள் இதர பிற்படுத்தப்பட்ட வகுப்பினர், பொருளாதாரத்தில் பின்தங்கிய வகுப்பினர் அல்லது சீர்மரபினர் பிரிவைச் சேர்ந்தவராக இருத்தல் வேண்டும். குடும்பத்தின் மொத்த ஆண்டு வருமானம் ரூ.2.50 லட்சத்திற்கு மிகாமல் இருக்க வேண்டும்.

2025-26-ம் கல்வியாண்டில் 100 சதவீதம் தேர்ச்சி பெற்று தேசிய கல்வி உதவித்தொகை இணையதளத்தில் மத்திய அரசால் வெளியிடப்பட்டுள்ள பட்டியலில் இடம் பெற்றுள்ள பள்ளிகளில் பயில்பவராக இருத்தல் வேண்டும்.

இவ்வாறு அதில் கூறப்பட்டுள்ளது.

தீபாவளி பண்டிகை வரும் நவம்பர் 8-ந்தேதி (ஞாயிற்றுக்கிழமை) கொண்டாடப்படுகிறது. அதை முன்னிட்டு, மாணவர் கள், பெற்றோர், ஆசிரியர்கள் மற்றும் அரசு அலுவலர்கள் தங்களது சொந்த ஊர்களுக்கு சென்று பண்டிகையை மகிழ்வுடன் கொண்டாடுவார்கள்.

இந்த நிலையில், தீபாவளி பண்டிகையை கொண்டாடிவிட்டு திரும்புவதற்கு ஏதுவாக பண்டிகைக்கு மறுநாளான 9-ந்தேதி (திங்கட்கிழமை) ஒருநாள் மட்டும் தமிழ்நாடு முழுவதும் உள்ள அனைத்து அரசு அலுவலகங்கள், பொதுத்துறை நிறுவனங்கள், பள்ளிகள், கல்லூரிகள் மற்றும் அனைத்து கல்வி நிறுவனங்களுக்கும் விடுமுறை அளித்து, அவ்விடுமுறையை ஈடு செய்யும் வகையில் நவம்பர் 28-ந்தேதி அன்று பணிநாளாக அறிவித்து அரசு ஆணை வெளியிட்டுள்ளது.

அந்த வகையில், தீபாவளி பண்டிகையை முன்னிட்டு, தீபாவளி வரை காய்கறி கடைகள் அனைத்தும் செயல்பட்டுவிட்டு, தீபாவளிக்கு மறுநாள் 9-ந்தேதி (திங்கட்கிழமை) கோயம்பேடு காய்கறி வணிக வளாகத்துக்கு ஒருநாள் முழு விடுமுறை அளிப்பது என வணிக வளாக அனைத்து சங்கங்களின் ஒருங்கிணைந்த கூட்டமைப்பின் தலைவர் ஜி.டி.ராஜசேகரன் தலைமையில் நடைபெற்ற ஆலோசனைக் கூட்டத்தில் ஒரு மனதாக தீர்மானிக்கப்பட்டுள்ளது.

பொதுமக்கள் மற்றும் வியாபாரிகள் தங்களது அத்தியாவசியத் தேவைகள் மற்றும் கொள்முதல்களை முன்கூட்டியே திட்டமிட்டுக் கொள்ளுமாறு கேட்டுக்கொள்ளப்பட்டுள்ளனர். 10-ம் தேதி செவ்வாய்க்கிழமை முதல் கோயம்பேடு காய்கறி சந்தை வழக்கம்போல் செயல்படும் என கூட்டமைப்பு தெரிவித்துள்ளது.

உதகை மலை ரெயில் சேவை ரத்து 3 நாட்களுக்கு நீட்டிக்கப்பட்டு உள்ளது.

கோயம்புத்தூர் மாவட்டம் மேட்டுப்பாளையத்தில் இருந்து நீலகிரி மாவட்டம் ஊட்டிக்கு மலை ரெயில் இயக்கப்பட்டு வருகிறது. பழமை வாய்ந்த மலை ரெயிலை கடந்த 2005-ம் ஆண்டு யுனெஸ்கோ நிறுவனம் உலக பாரம்பரிய சின்னமாக அறிவித்துள்ளது.

உலக பிரசித்தி பெற்ற இந்த மலை ரெயிலில் பயணம் செய்து மலைப்பகுதியில் உள்ள இயற்கை எழில் காட்சிகளை கண்டு ரசிக்க தினமும் ஏராளமான வெளிநாடு மற்றும் உள்நாட்டு சுற்றுலா பயணிகள் வருகை தருகின்றனர்.

கனமழை

கடந்த சில நாட்களாக வடகிழக்கு பருவமழையை முன்னிட்டு, குன்னூர், கோத்தகிரி மற்றும் ஊட்டி சுற்றுவட்டார பகுதிகளில் கனமழை பெய்தது. இதன் காரணமாக, நீலகிரி மாவட்டத்தின் பல்வேறு பகுதிகளில் போக்குவரத்து பாதிப்பு ஏற்பட்டதுடன், சில இடங்களில் மரங்கள் சாய்ந்து விழுந்தன.

இதனை தொடர்ந்து, முன்னெச்சரிக்கை நடவடிக்கையாக கடந்த அக்டோபர் 24-ந்தேதி முதல் இன்று (நவம்பர் 1) வரை 9 நாட்களாக ஊட்டி எனப்படும் உதகை மலை ரெயில் சேவை ரத்து செய்யப்பட்டது.

சேவை ரத்து நீட்டிப்பு

இந்த நிலையில், பராமரிப்பு பணிகள் முழுவதும் நிறைவடையாத நிலையில், மீண்டும் மழையால் மண் சரிவு ஏற்படும் சாத்தியம் போன்றவற்றால், ரெயில் சேவை ரத்து நீட்டிக்கப்பட்டு உள்ளது. இதன்படி, மீண்டும் நாளை (நவம்பர் 2) முதல் 4-ந்தேதி வரை 3 நாட்களுக்கு மலை ரெயில் சேவை ரத்து செய்யப்பட்டுள்ளதாக சேலம் ரெயில்வே கோட்ட நிர்வாகம் அறிவித்துள்ளது. பொதுமக்கள் மற்றும் சுற்றுலாப்பயணிகளின் பாதுகாப்பை கருத்தில் கொண்டு மலை ரெயில் சேவை ரத்து நீட்டிக்கப்பட்டு உள்ளது.

பரிகார பூஜை செய்தவதாக பெண்களை தனியாக அழைத்து ஜோதிடர் அத்துமீறியுள்ளார்.

பெண்களிடம் அத்துமீறல்

சென்னையை சேர்ந்த 30 வயது பெண் ஒருவர் ஐ.டி. நிறுவனத்தில் பணிபுரிந்து வருகிறார். இவருக்கு சமூக வலைத்தளம் மூலம் கோவை மாவட்டம் பெரிய நாயக்கன்பாளையத்தை சேர்ந்த ஜோதிடர் ஒருவர் அறிமுகமானார். அவரிடம் தனது குடும்ப பிரச்சினைகளை கூறி அந்த பெண் தீர்வு கேட்டுள்ளார். அதற்கு அந்த ஜோதிடர். உங்களது தந்தையின் ஜாதகத்தில் தோஷம் உள்ளது, அதற்கு பரிகாரம் செய்ய வேண்டும் என்று கூறினார். பின்னர் அந்த பெண்ணின் வீட்டுக்கே சென்று பரிகார பூஜை செய்தார். தொடர்ந்து அந்த பெண்ணிடம் சமூக வலைத்தளம் மூலம் பேசி வந்த அந்த ஜோதிடர், உங்களது ஜாதகத்திலும் திருமண தோஷம் உள்ளது. அதற்கு தனியாக பரிகார பூஜை செய்ய வேண்டும் என்று கூறினார்.

பின்னர், அந்த பெண்ணை தனியாக புதுச்சேரிக்கு அழைத்துச் சென்று திருமணம் செய்வதாக ஆசை வார்த்தை கூறி அத்துமீற முயன்றார். உடனே உஷாரான அந்த பெண் அவரிடம் இருந்து தப்பி சென்னைக்கு திரும்பினார். பின்னர் மீண்டும் அந்த பெண்ணை தொடர்பு கொண்டு பேசி வந்த ஜோதிடர் பரிகார பூஜை செய்ய வேண்டும் என கூறி மேட்டுப்பாளையத்தில் உள்ள ஒரு தனியார் விடுதிக்கு அழைத்தார்.

அங்கு அந்த பெண்ணிடம் ஆசை வார்த்தை கூறி பாலியல் அத்துமீறலில் ஈடுபட்டுள்ளார். அதன்பிறகு சென்னை திரும்பிய அந்த பெண்ணின் செல்போன் அழைப்புகளை ஜோதிடர் தவிர்த்து வந்தார். பின்னர் அவர் குறித்து அந்த பெண் விசாரித்தபோது ஏற்கனவே திருப்பூரை சேர்ந்த ஒரு பெண்ணை இதுபோன்று ஏமாற்றி இருப்பது தெரியவந்தது.

இதனால் அதிர்ச்சி அடைந்த அந்த பெண் சென்னை மேற்கு தாம்பரம் இணை ஆணையரிடம் புகார் அளித்தார். அத்துடன் அந்த ஜோதிடரால் பாதிக்கப்பட்ட திருப்பூரை சேர்ந்த பெண் கோவை போலீஸ் சூப்பிரண்டு அலுவலகம் மற்றும் கலெக்டர் அலுவலகத்தில் புகார் அளித்தார். இந்த புகார்களின் அடிப்படையில் மேட்டுப்பாளையம் அனைத்து மகளிர் போலீசார் அந்த ஜோதிடரிடம் விசாரணை மேற்கொண்டனர். முதற்கட்ட விசாரணையில் அவர் மேலும் பல பெண்களிடம் பரிகாரம் என்ற பெயரில் அத்துமீறலில் ஈடுபட்டு இருக்கலாம் என்ற தகவல் கிடைத்து உள்ளதாக போலீசார் தெரிவித்தனர்.

தீபாவளி பண்டிகையையொட்டி இனிப்பு மற்றும் கார வகைகளைத் தயாரிக்கும் நிறுவனங்கள், தரமான மூலப்பொருட்களைக் கொண்டு பலகாரங்களைத் தயாரிக்க வேண்டும் என்று உணவு பாதுகாப்புத்துறை அதிகாரிகள் அறிவுறுத்தியுள்ளனர்.

52 இனிப்பு, கார வகைகளின் மாதிரிகள் சேகரிப்பு

தஞ்சை மாவட்டத்தில் தீபாவளி பண்டிகையை முன்னிட்டு இனிப்பு மற்றும் கார வகைகள் தயாரிக்கும் நிறுவனங்களில் உணவு பாதுகாப்புத்துறை அதிகாரிகள் குழுவினர் ஆய்வு மேற்கொண்டனர். மாவட்ட கலெக்டர் உத்தரவின்பேரில், உணவு பாதுகாப்புத்துறை நியமன அலுவலர் தலைமையில், நடமாடும் உணவு பகுப்பாய்வு கூடம் மூலம் இந்த ஆய்வு நடைபெற்றது.

அப்போது பல்வேறு இனிப்பு மற்றும் கார வகைகளின் தரம், தயாரிப்பு முறை உள்ளிட்டவை குறித்து அதிகாரிகள் ஆய்வு செய்தனர். மேலும், மொத்தம் 52 இனிப்பு, கார உணவு மாதிரிகள் சேகரிக்கப்பட்டு ஆய்வகப் பரிசோதனைக்காக அனுப்பி வைக்கப்பட்டன.

எண்ணெயை மீண்டும் பயன்படுத்தக்கூடாது

பலகாரங்கள் தயாரிக்கும்போது தரமான மூலப்பொருட்களை மட்டுமே பயன்படுத்த வேண்டும். ஒருமுறை பயன்படுத்திய சமையல் எண்ணெயை மீண்டும் பயன்படுத்தக்கூடாது என்றும் தயாரிப்பு நிறுவனங்களுக்கு அதிகாரிகள் அறிவுறுத்தினர்.

மேலும், உணவுப் பொருட்களின் தரம் மற்றும் பாதுகாப்பில் உரிய கவனம் செலுத்த வேண்டும் என்றும் வலியுறுத்தினர்.

பாதுகாப்பற்ற உணவுப் பொருட்கள் தயாரித்தால் நடவடிக்கை

ஆய்வகப் பரிசோதனை அறிக்கையில் உணவுப் பொருட்கள் பாதுகாப்பற்ற முறையில் தயாரிக்கப்பட்டிருப்பது கண்டறியப்பட்டால், சம்பந்தப்பட்ட நிறுவனங்கள் மீது சட்டப்படி நடவடிக்கை எடுக்கப்படும் என்று உணவு பாதுகாப்புத்துறை அதிகாரிகள் எச்சரித்துள்ளனர்.

உரிமம் பெற்ற கடைகளில் மட்டுமே வாங்க வேண்டும்

தீபாவளி பண்டிகையையொட்டி பொதுமக்கள் இனிப்பு மற்றும் கார வகைகளை வாங்கும்போது உரிய உணவு பாதுகாப்பு உரிமம் பெற்ற கடைகளில் மட்டுமே வாங்க வேண்டும் என்றும், உணவுப் பொருட்களின் தரம் மற்றும் பாதுகாப்பை உறுதி செய்துகொள்ள வேண்டும் என்றும் உணவு பாதுகாப்புத்துறை அதிகாரிகள் கேட்டுக்கொண்டுள்ளனர்.

சென்னையில் 19 கிலோ எடை கொண்ட வணிக பயன்பாட்டிற்கான சிலிண்டர் விலை இன்று ரூ.11 உயர்ந்து ரூ.3,016.50 காசுகளுக்கு விற்பனை செய்யப்படுகிறது.

கியாஸ் சிலிண்டர் விலை

சர்வதேச சந்தையில் விலைசர்வதேச சந்தையில் கச்சா எண்ணெய் விலை மற்றும் அமெரிக்க டாலருக்கு நிகரான இந்திய ரூபாய் மதிப்பு ஆகியவற்றின் அடிப்படையில், பெட்ரோல், டீசல், சமையல் கியாஸ் சிலிண்டர் விலையை எண்ணெய் நிறுவனங்கள் மாதந்தோறும் முதல் தேதி நிர்ணயம் செய்வது வழக்கம்.

அந்தவகையில், நடப்பு மாதமான நவம்பரில் எண்ணெய் நிறுவனங்கள் வெளியிட்டுள்ள அறிவிப்பின்படி, வணிக பயன்பாட்டிற்கான கியாஸ் சிலிண்டரின் விலை உயர்ந்துள்ளது. குறிப்பாக சென்னையில் 19 கிலோ எடை கொண்ட வணிக பயன்பாட்டுக்கான சிலிண்டர் விலை ரூ.11 உயர்ந்து ரூ.3,016.50 காசுகளாக நிர்ணயம் செய்யப்பட்டுள்ளது.

கச்சா எண்ணெய் விலை

அதே சமயம் 14.2 கிலோ எடை கொண்ட வீட்டு உபயோக கியாஸ் சிலிண்டர் விலையில் எவ்வித மாற்றமும் இன்றி ரூ.957.50-க்கு விற்பனை செய்யப்படுகிறது.

இந்த ஆண்டின் தொடக்கத்தில் ஆரம்பித்த மேற்காசிய போரின் காரணமாக பிப்ரவரி-ஜூன் மாதம் வரை கச்சா எண்ணெய் விலை கணிசமாக அதிகரித்தது. இதன் விளைவாக எரிபொருள் விலையும் உலகளவில் பன்மடங்கு உயர்ந்தது. அதற்கு இந்தியாவும் விதிவிலக்கல்ல.

போர்

ஜூன் இறுதியில் அமெரிக்கா-ஈரான் இடையே போர் நிறுத்த ஒப்பந்தம் மேற்கொள்ளப்பட்ட நிலையில் எரிபொருள் விலையும் குறைந்தது. அதன் விளைவாக ஜூலை மாதம் ரூ.183.5 மற்றும் ஆகஸ்டு மாதம் ரூ.192 என இரண்டு மாதங்களாக வணிக பயன்பாட்டு சிலிண்டர் விலை குறைக்கப்பட்டது. ஆனால் மீண்டும் இரு நாடுகளும் தாக்குதலை தொடங்கிய நிலையில் கச்சா எண்ணெய் விலை மீண்டும் உயர்ந்தது.

இதனால் கடந்த அக்டோபர் 1-ந்தேதி வணிக பயன்பாட்டு சிலிண்டர் விலை ரூ.66.50 உயர்த்தப்பட்டு விற்பனை செய்யப்பட்டது.

இந்நிலையில் இந்த மாதமும் வணிக சிலிண்டர் விலையானது ரூ.11 அதிகரித்திருக்கிறது. அதேசமயம் பெட்ரோல், டீசல் விலை கடந்த மே மாதத்திற்கு பிறகு மாற்றமின்றி விற்பனையாகி வருவதாக எண்ணெய் நிறுவன அதிகாரிகள் கூறினர்.

சென்னை அடையார் வங்கி மேலாளரின் கன்னத்தில் அறைந்ததாக முன்னாள் மத்திய மந்திரி மு.க.அழகிரி யின் மகள் கயல்விழி மீது கொலை மிரட்டல் உள்பட 4 சட்டப்பிரிவுகளின் கீழ் போலீசார் வழக்குப்பதிவு செய்துள்ளனர். இந்த வழக்கை ரத்து செய்யக்கோரி சென்னை ஐகோர்ட்டில் கயல்விழி மனு தாக்கல் செய்தார்.

அதில், "வங்கி மேலாளர்தான் என்னை தகாத வார்த் தைகளால் திட்டினார். அதை மறைத்து எனக்கு எதி ராக போலீசில் புகார் செய்துள்ளார். எனவே, வழக்கை ரத்து செய்யவேண்டும்" என்று கூறியிருந்தார். இந்த மனு நீதிபதி ஜி.கே.இளந்திரையன் முன்பு விசாரணைக்கு வந்தது. அப்போது, கயல்விழி தரப்பில் மனுவை திரும்ப பெறுவதாக கூறப்பட்டது.

இதை ஏற்றுக் கொண்டு,மனுவை திரும்ப பெற அனுமதித்து, அந்த மனுவை தள்ளுபடி செய்த நீதிபதி, "மனுதாரர் கயல்விழி மீதான வழக்கின் குற்றப்பத்திரிகையை 4 வாரங்களில் சம்பந்தப்பட்ட கோர்ட்டில் சாஸ்திரிநகர் போலீசார் தாக்கல் செய்ய வேண்டும்" என்று உத்தவிட்டார்.

நீலகிரி மற்றும் திருவள்ளூர் மாவட்டங்களில் நாளை (02.11.2026) இடி மின்னலுடன் கூடிய கனமழை பெய்யக்கூடும் என்று தெரிவிக்கப்பட்டுள்ளது.

புயல்

இதுதொடர்பாக வெளியிடப்படிருந்த செய்திக்குறிப்பில் கூறப்பட்டிருந்ததாவது:-

நேற்று முன்தினம் (30-10-26) தெற்கு அந்தமான் கடல் பகுதிகள் மற்றும் அதனை ஒட்டிய அந்தமான் நிகோபார் தீவுகளில் நிலவிய காற்றழுத்த தாழ்வு பகுதி மேற்கு-வடமேற்கு திசையில் நகர்ந்து நேற்று (31-10-26) காலை 0530 மணி அளவில் தென்கிழக்கு வங்கக்கடல் மற்றும் அதனை ஒட்டிய அந்தமான் நிகோபார் தீவுகள் மற்றும் அந்தமான் கடல் பகுதிகளில் ஆழ்ந்த காற்றழுத்த தாழ்வு பகுதியாக வலுவடைந்து காலை 0830 மணி அளவில் அதே பகுதிகளில் நிலவியது.

இது மேற்கு-வடமேற்கு திசையில் நகர்ந்து தென்கிழக்கு வங்கக்கடல் மற்றும் அதனை ஒட்டிய அந்தமான் நிகோபார் தீவுகள் மற்றும் அந்தமான் கடல் பகுதிகளில் நேற்று காற்றழுத்த தாழ்வு மண்டலமாகவும் (Depression), இன்று புயலாகவும் (Cyclonic Storm) வலுப்பெறக்கூடும். இது மேலும் மேற்கு வடமேற்கு திசையில் நகர்ந்து மத்தியமேற்கு வங்ககடல் பகுதிகளில் ஆந்திரப் பிரதேச கடலோரப் பகுதிகளுக்கு அருகில் நாளை (02-11-2026) மாலை வேளையில் நகரக்கூடும்.

சுமார் 1.5 கிமீ உயரத்தில் கேரளா-கர்நாடக கடலோர பகுதிகளுக்கு அப்பால் உள்ள தென்கிழக்கு அரபிக்கடல் பகுதிகளிலிருந்து தெற்கு மகாராஷ்டிரா கடலோர பகுதிகள் மற்றும் அதனை ஒட்டிய பகுதிகளின் மேல் நிலவும் வளிமண்டல சுழற்சி வரை ஒரு காற்றழுத்த தாழ்வு பாதை (Trough) நிலவுகிறது.

மழை

இதன்காரணமாக இன்று (01-11-2026): வடக்கு கடலோர தமிழக மாவட்டங்கள், மேற்கு தொடர்ச்சி மலை மாவட்டங்கள், மதுரை, திருச்சிராப்பள்ளி, நாமக்கல், சேலம், ஈரோடு, கரூர் மாவட்டங்களில் ஓரிரு இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும். ஏனைய தமிழகத்தில் ஓரிரு இடங்களில் இடி மின்னலுடன் கூடிய லேசான மழை பெய்யக்கூடும்.

02-11-2026: நீலகிரி மற்றும் திருவள்ளூர் மாவட்டங்களில் ஓரிரு இடங்களில் இடி மின்னலுடன் கூடிய கனமழை பெய்யக்கூடும். ஏனைய தமிழகத்தில் ஒருசில இடங்களிலும், புதுவை மற்றும் காரைக்கால் பகுதிகளிலும் இடி மின்னலுடன் கூடிய லேசானது முதல் மிதமான மழை பெய்யக்கூடும்.

03-11-2026: கடலூர் மற்றும் விழுப்புரம் மாவட்டங்களில் ஓரிரு இடங்களிலும், புதுவையிலும் இடி மின்னலுடன் கூடிய கனமழை பெய்யக்கூடும்.

மேற்கு தொடர்ச்சி மலை மாவட்டங்கள், வட தமிழகத்தில் ஓரிரு இடங்களிலும், காரைக்கால் பகுதிகளிலும் இடி மின்னலுடன் கூடிய மிதமான மழை பெய்யக்கூடும். ஏனைய தமிழகத்தில் ஓரிரு இடங்களில் இடி மின்னலுடன் கூடிய லேசானது முதல் மிதமான மழை பெய்யக்கூடும்.

அதிகபட்ச வெப்பநிலை பற்றிய முன்னறிவிப்பு:

24 மணி நேர அதிகபட்ச வெப்பநிலை மாறுதல்:

01-11-2026 முதல் 04-11-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலையில் குறிப்பிடத்தக்க மாற்றதிற்கான வாய்ப்பு குறைவு.

இயல்பு நிலையிலிருந்து அதிகபட்ச வெப்ப அளவின் வேறுபாடு:

01-11-2026: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை ஒருசில இடங்களில் 2-3° செல்சியஸ் அதிகமாக இருக்கக்கூடும்.

02-11-2026 முதல் 04-11-2026 வரை: தமிழகம், புதுவை மற்றும் காரைக்கால் பகுதிகளில் அதிகபட்ச வெப்பநிலை இயல்பை ஒட்டி இருக்கக்கூடும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு:

இன்று (01-11-2026): வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி மின்னலுடன் கூடிய லேசானது முதல் மிதமான மழை பெய்யக்கூடும். அதிகபட்ச வெப்பநிலை 33-34° செல்சியஸை ஒட்டியும், குறைந்தபட்ச வெப்பநிலை 25-26° செல்சியஸை ஒட்டியும் இருக்கக்கூடும்.

மீனவர்களுக்கான எச்சரிக்கை:

தமிழக கடலோரப்பகுதிகள்:

01-11-2026 முதல் 03-11-2026 வரை: வட தமிழக கடலோரப்பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்.

04-11-2026: எச்சரிக்கை ஏதுமில்லை.

வங்கக்கடல் பகுதிகள்:

01-11-2026: தெற்கு வங்கக்கடலின் வடக்கு பகுதிகள் மற்றும் மத்தியமேற்கு வங்கக்கடலின் தெற்கு பகுதிகளில் சூறாவளிக்காற்று மணிக்கு 60 முதல் 90 கிலோ மீட்டர் வேகத்திலும் இடையிடையே 100 கிலோ மீட்டர் வேகத்திலும், மத்தியமேற்கு வங்கக்கடலின் இதர தெற்கு மற்றும் பகுதிகள் தெற்கு வங்கக்கடலின் சில பகுதிகளில் சூறாவளிக்காற்று மணிக்கு 55 முதல் 65 கிலோ மீட்டர் வேகத்திலும் இடையிடையே 75 கிலோ மீட்டர் வேகத்திலும், ஆந்திர கடலோரப்பகுதிகள் மற்றும் அதனை ஒட்டிய மத்தியமேற்கு வங்கக்கடல் பகுதிகள், மத்தியகிழக்கு-தெற்கு வங்கக்கடலின் சில பகுதிகளில் சூறாவளிக்காற்று மணிக்கு 40 முதல் 50 கிலோ மீட்டர் வேகத்திலும் இடையிடையே 60 கிலோ மீட்டர் வேகத்திலும் வீசக்கூடும்.

மேற்குறிப்பிட்ட நாட்களில் மீனவர்கள் இப்பகுதிகளுக்கு செல்ல வேண்டாமென்று அறிவுறுத்தப்படுகிறார்கள்.

அரபிக்கடல் பகுதிகள்: எச்சரிக்கை ஏதுமில்லை.

இவ்வாறு அதில் தெரிவிக்கப்பட்டுள்ளது.

கடலூர் மாவட்டம் பண்ருட்டி அடுத்த சிறுவத்தூர் கிராமத்தைச் சேர்ந்தவர் பிரசாந்த் (வயது 19). இவர் தனது மாமா ரமேசுடன் சேர்ந்து வீடுகளில் டைல்ஸ் ஒட்டும் வேலை செய்து வந்தார். பிரசாந்தின் தாய் எழில்செல்வி சென்னையில் உள்ள ஒரு நடிகை வீட்டில், வீட்டு வேலை செய்து வருகிறார். வேலை இல்லாத நாட்களில் பிரசாந்த் சென்னையில் வசிக்கும் தாயை பார்க்க வருவது வழக்கம்.

மேலும், சிறுவத்தூர் கிராமத்தைச் சேர்ந்த பிரசாந்தின் நண்பர் களான தேவராசு (19), தினேஷ் (23) ஆகியோரும் சென்னையில் உள்ள ஒரு துணிக்கடையில் வேலை பார்த்து வந்தனர். தாயை பார்க்க வரும் பிரசாந்த், இவர்களையும் அவ்வப்போது சந்தித்துப் பேசுவதை வழக்கமாக வைத்திருந்தார். இதில் தேவராசு, ஒரு இளம்பெண்ணை காதலித்து கடந்த 3 மாதங்களுக்கு முன்பு திருமணம் செய்து கொண்டார்.

இந்த நிலையில், கடந்த 27-ந்தேதி தனது தாயை பார்க்க செல்வதாக உறவினர்களிடம் கூறிவிட்டு பிரசாந்த் சென்னைக்கு வந்தார். அதன்பிறகு அவர் வீடு திரும்பவில்லை. அவருடைய செல்போனும் சுவிட்ச் ஆப் செய்யப்பட்டு இருந்தது. தாயும் தன்னை பார்க்க மகன் வரவில்லை என்று கூறினார். இதுகுறித்து புதுப்பேட்டை போலீசாரிடம் புகார் அளிக்கப்பட்டது. புகாரின்பேரில் போலீசார் வழக்குப்பதிவு செய்து மாயமான பிரசாந்தை தேடி வந்தனர்.

கடைசியாக பிரசாந்த் யாரிடம் அதிகம் பேசியுள்ளார் என அவரது செல்போன் எண்ணை வைத்து போலீசார் ஆய்வு செய்ததில் நண்பர்களான தேவராசுவும், தினேசும் சிக்கினர். அவர்களை பிடித்து விசாரித்தபோது, பிரசாந்தை சென்னை அடுத்த திருப்பாலைவனம் போலீஸ் எல்லைக்குட்பட்ட பழவேற்காட்டுக்கு அழைத்துச் சென்று கொன்று புதைத்ததாக பரபரப்பு வாக்குமூலம் அளித்தனர்.

இந்த தகவலின்பேரில் திருப்பாலைவனம் போலீசார் பழவேற் காட்டில் சாத்தான்குப்பம் கடற்கரை பகுதியில் புதைக்கப்பட்ட பிரசாந்தின் உடலைத் தோண்டி எடுத்து பிரேத பரிசோதனைக்காக பொன்னேரி அரசு ஆஸ்பத்திரிக்கு அனுப்பி வைத்தனர். கைதான இருவரிடம் நடத்திய விசாரணையில், தேவராசுவின் மனைவியுடன் கொலையான பிரசாந்துக்கு கள்ளத்தொடர்பு இருந்தது தெரியவந்தது.

சம்பவத்தன்று சென்னைக்கு வந்த பிரசாந்த், நண்பரான தேவராசுவின் மனைவியுடன் பல இடங்களுக்குச் சுற்றி உல்லாசமாக இருந்துள்ளார். இதனால் கடும் ஆத்திரம் அடைந்த தேவராசு, பிரசாந்தை கொலை செய்யத் திட்டமிட்டு தினேசுடன் சேர்ந்து மது குடிக்கலாம் என அவரை ஆள்நடமாட்டம் இல்லாத கடற்கரை பகுதிக்கு அழைத்துச் சென்று பீர் பாட்டிலால் கழுத்தில் குத்திக் கொலை செய்து புதைத்தது விசாரணையில் அம்பலமானது. இதையடுத்து கைதான 2 பேரையும் போலீசார் கோர்ட்டில் ஆஜர்படுத்தி சிறையில் அடைத்தனர்.

கனிமங்களை ஏற்றிச்செல்லும் சரக்கு வாகனங்களில் ஜி.பி.எஸ். இல்லாவிட்டால் இன்று முதல் அனுமதி சீட்டு வழங்கப்படாது என்று தமிழக அரசு திட்டவட்டமாக அறிவித்து இருக்கிறது.

அவகாசம் முடிந்தது

இது தொடர்பாக தமிழக அரசின் புவியியல் மற்றும் சுரங்கத்துறை வெளியிட்டுள்ள செய்திக்குறிப்பில் கூறியிருப்பதாவது:-

தமிழ்நாட்டில் கனிம வளங்களைக் கொண்டு செல்லும் அனைத்து வகையான சரக்கு வாகனங்களிலும், சட்டவிரோதக் கனிமக் கடத்தலைத் தடுக்கவும், வெளிப்படைத் தன்மையுடன் கூடிய கண்காணிப்பை உறுதி செய்யவும் ஏஐஎஸ்-140 தரநிலைக் கொண்ட ஜி.பி.எஸ். கண்காணிப்புக் கருவி பொருத்தி, அதனை சுரங்கத் துறையின் அதிகாரப்பூர்வ இணையதளத்துடன் (https://mimas.tn.gov.in/) ஒருங்கிணைக்க வேண்டும் என ஏற்கனவே உத்தரவிடப்பட்டிருந்தது. இதற்கான இறுதி கால அவகாசம் 31-ந் தேதியுடன் (நேற்றுடன்) முடிவடைந்தது.

* எனவே 1-ந் தேதி (இன்று) முதல், ஏஐஎஸ்-140 ஜி.பி.எஸ். கருவி பொருத்தப்பட்டு, இணையதள ஒருங்கிணைப்பு செய்யப்படாத எந்தவொரு வாகனத்திற்கும் கனிமப் போக்குவரத்து அனுமதிச் சீட்டு எக்காரணம் கொண்டும் வழங்கப்பட மாட்டாது.

மணல், ஜல்லி

* ஜி.பி.எஸ். கருவி மற்றும் செல்லத்தக்க அனுமதிச் சீட்டு இன்றி கனிமங்களை ஏற்றிச் செல்லும் வாகனங்கள் தீவிர தணிக்கைக்கு உட்படுத்தப்பட்டு, பறிமுதல் செய்யப்படுவதோடு, வாகன உரிமையாளர்கள் மீது சட்டப்படி கடுமையான குற்றவியல் நடவடிக்கைகள் மேற்கொள்ளப்படும்.

* பொதுமக்கள் மற்றும் கட்டுமானத் துறையினருக்கு மணல், ஜல்லி உள்ளிட்ட அத்தியாவசியக் கட்டுமானப் பொருட்கள் தடையின்றி, சீராகக் கிடைப்பதை உறுதி செய்ய வேண்டியது அவசியமாகும். எனவே, இதுவரை ஜி.பி.எஸ். கருவி பொருத்தாத மற்றும் இணையத்தில் இணைக்காத வாகன உரிமையாளர்கள் மற்றும் லாரி உரிமையாளர்கள், உடனடியாகத் தங்களது வாகனங்களில் தர அங்கீகாரம் பெற்ற ஜி.பி.எஸ். கருவிகளைப் பொருத்தி துறையின் தளத்தில் ஒருங்கிணைக்க வேண்டும்.

முழு ஒத்துழைப்பு

கட்டுமானப் பொருட்களின் தொடர் வினியோகத்தை உறுதி செய்யவும், தேவையற்ற போக்குவரத்துத் தடைகளைத் தவிர்க்கவும் அனைத்து வாகன உரிமையாளர்களும் மாவட்ட நிர்வாகத்திற்கும். சுரங்கத்துறைக்கும் முழு ஒத்துழைப்பு வழங்க வேண்டும்.

இவ்வாறு அதில் கூறப்பட்டுள்ளது.

தமிழகத்தில் உள்ள தனியார் பள்ளிக்கூடங்களுக்கு நிரந்தர அங்கீகாரம் வழங்குவதற்கு ரூ.400 கோடி லஞ்சம் பெற்றதாக கூறப்படும் வழக்கில் முன்னாள் அமைச்சர் அன்பில் மகேஷ் பொய்யாமொழியை சென்னை மத்திய குற்றப்பிரிவு போலீசார் கடந்த 26-ந்தேதி அன்று அதிரடியாக கைது செய்தனர்.

அவர், வருகிற 6-ந்தேதி வரையில் நீதிமன்ற காவலில் சென்னை புழல் சிறையில் அடைக்கப்பட்டுள்ளார். அவர் முன் ஜாமீன் கேட்டு மனுத்தாக்கல் செய்திருந்த நிலையில் அவரை 5 நாட்கள் காவலில் எடுத்து விசாரிப்பதற்கு மத்திய குற்றப்பிரிவு போலீசார் மனு தாக்கல் செய்தனர். இந்த மனு மீதான தீர்ப்பை ஊழல் தடுப்பு சிறப்பு கோர்ட்டு 2-ந்தேதிக்கு (நாளை) ஒத்தி வைத்துள்ளது.

இந்த வழக்கு தொடர்பாக அன்பில் மகேஷ் பொய்யாமொழி வீடு மற்றும் அவர் தொடர்புடைய இடங்களில் மத்திய குற்றப்பி ரிவு போலீசார் சோதனை நடத்தி இருந்தார்கள். அதில் வங்கி கணக்கு விவரங்கள் மற்றும் முக்கிய ஆவணங்கள் சிக்கியது. இந்த நிலையில் அன்பில் மகேஷ் பொய்யாமொழியின் வங்கி கணக்கு விவரங்களை மத்திய குற்றப்பிரிவு போலீசார் தீவிரமாக ஆராய்ந்து வருகின்றனர்.

இன்று நடைபெறும் டிஎன்பிஎஸ்சி குரூப் 2, 2ஏ முதல்நிலை தேர்வை எழுத 4,89,885 பேருக்கு அனுமதி வழங்கப்பட்டுள்ளது.

குரூப்-2 , குரூப்-2ஏ

தமிழ்நாடு அரசு பணியாளர் தேர்வாணையம் (டிஎன்பிஎஸ்சி) சார்பில் நடத்தப்படும் குரூப்-2 மற்றும் குரூப்-2ஏ முதல்நிலைத் தேர்வு இன்று (நவம்பர் 1-ந்தேதி) திட்டமிட்டபடி நடைபெறுகிறது. இந்த தேர்வை தமிழகம் முழுவதும் 4 லட்சத்து 89 ஆயிரத்து 885 பேர் எழுத உள்ளனர்.

846 காலிப்பணியிடங்கள்

தமிழக அரசின் பல்வேறு துறைகளில் காலியாக உள்ள குரூப்-2 மற்றும் குரூப்-2ஏ பிரிவுகளைச் சேர்ந்த 846 பணியிடங்களை நிரப்புவதற்காக இந்த தேர்வு நடத்தப்படுகிறது. இதற்காக தமிழகம் முழுவதும் 4 லட்சத்து 89 ஆயிரத்து 885 பேர் விண்ணப்பித்துள்ளனர். இதன் மூலம் ஒரு காலிப்பணியிடத்திற்கு சராசரியாக 579 பேர் போட்டியிடுகின்றனர்.

இந்த தேர்வு மாநிலம் முழுவதும் 1,647 மையங்களில் நடைபெறுகிறது. சென்னையில் மட்டும் 173 தேர்வு மையங்களில் 51 ஆயிரத்து 721 பேர் தேர்வு எழுதுகின்றனர்.

காலை 9.30 மணிக்கு தொடக்கம்

முதல்நிலைத் தேர்வு இன்று காலை 9.30 மணிக்கு தொடங்கி நண்பகல் 12.30 மணி வரை நடைபெறுகிறது. மொத்தம் 3 மணி நேரம் நடைபெறும் இந்த தேர்வில் 200 கொள்குறி வகை வினாக்கள் இடம்பெறும். மொத்த மதிப்பெண்கள் 300 ஆகும்.

இதில் பொது அறிவு பகுதியில் 75 வினாக்களும், திறனறிவு பகுதியில் 25 வினாக்களும், பொதுத்தமிழ் அல்லது பொது ஆங்கிலம் பகுதியில் 100 வினாக்களும் இடம்பெறும்.

ஹால் டிக்கெட் கட்டாயம்

தேர்வர்கள் தங்களது ஹால் டிக்கெட்டை டிஎன்பிஎஸ்சி அதிகாரப்பூர்வ இணையதளமான www.tnpsc.gov.in-ல் பதிவிறக்கம் செய்து கொள்ளலாம். தேர்வு எழுதச் செல்லும் விண்ணப்பதாரர்கள் ஹால் டிக்கெட் உள்ளிட்ட தேவையான ஆவணங்களுடன் தேர்வு மையத்திற்கு உரிய நேரத்தில் செல்ல வேண்டும் என்று அறிவுறுத்தப்பட்டுள்ளது.

சென்னையில், தமிழ்நாடு அரசின் தொழில், முதலீட்டு ஊக்குவிப்பு மற்றும் வர்த்தகத் துறையும், இந்திய அரசின் வர்த்தகம் மற்றும் தொழில்துறை அமைச்சகத்தின் கீழ் செயல்படும் அயல் நாட்டு வர்த்தகத் தலைமை இயக்குனரகமும் இணைந்து, "தடை யற்ற வர்த்தக ஒப்பந்தங்களைப் பயன்படுத்துதல் இந்தியாவின் தடையற்ற வர்த்தக ஒப்பந்தங்கள் மூலம் தமிழ்நாட்டிற்கான உலகளாவிய சந்தை வாய்ப்புகளை உருவாக்குதல்" என்ற தலைப்பில் கருத்தரங்கத்தை நடத்தின.

இதில் 400-க்கும் மேற்பட்ட ஏற்றுமதியாளர்கள், பெண் தொழில் முனைவோர், ஏற்றுமதி மற்றும் வர்த்தகச் சங்கங்கள், குறு, சிறு மற்றும் நடுத்தரத் தொழில் நிறுவனங்கள், மத்திய மற்றும் மாநில அரசு ஊழியர்கள் பங்கேற்றனர். இந்தியா பல்வேறு நாடுகளுடன் மேற்கொண்டுள்ள தடையற்ற வர்த்தக ஒப்பந்தங்கள் மூலம் கிடைக்கும் வர்த்தகச் சலுகைகள், ஏற்றுமதிக்கான ஆவண நடைமுறைகள், தரச்சான்றிதழ்கள் மற்றும் சர்வதேசத் தரநிலைகள் குறித்து இக்கருத்தரங்கில் விவாதிக்கப்பட்டது.

குறிப்பாக, தடையற்ற வர்த்தக ஒப்பந்தங்களின் பயன்கள் பெரிய நிறுவனங்களுக்கு மட்டுமின்றி, குறு, சிறு மற்றும் நடுத்தரத் தொழில் நிறுவனங்கள், புதிய ஏற்றுமதியாளர்கள் மற்றும் மாவட்ட அளவிலான உற்பத்தியாளர்களுக்கும் சென்றடைவதை உறுதிசெய்வதன் முக்கியத்துவம் எடுத்துரைக்கப்பட்டது.

ஜவுளி மற்றும் ஆயத்த ஆடைகள், வேளாண்மை, உணவுப்பதப்படுத்துதல் மற்றும் கடல்சார் பொருட்கள், தோல் மற்றும் காலணிகள், ரத்தினக் கற்கள் மற்றும் ஆபரணங்கள், பொறியியல், வாகனங்கள் மற்றும் வாகன உதிரிபாகங்கள், மின்னணுவியல் மற்றும் தொழில்நுட்ப வன்பொருள் ஆகிய 6 முக்கியத் துறைகளில் தனித்தனியாகச் சிறப்புக் கலந்துரையாடல் அமர்வுகள் நடைபெற்றன.

மது, போதைப்பொருட்களை அரசு இரும்புக்கரம் கொண்டு ஒழிக்க வேண்டும். பாட்டாளி மக்கள் கட்சி, பசுமைத் தாயகம் சார்பில் கடந்த 25 ஆண்டுகளுக்கும் மேலாக நீர்நிலைகள் பாதுகாப்புக் காக போராடி வருகிறோம். சுற்றுச்சூழல் பாதுகாப்புக்காகவும் தொடர்ந்து குரல் கொடுத்து வருகிறோம். நிகழ்ச்சியில் தொகுப்பாளர் என்னை அமைச்சர் என தவறு தலாக அழைத்துவிட்டார்.

.

அதை அப்போதே திருத்தி, நான் சட்டமன்ற உறுப்பினர் என தெரிவித்தேன். தமிழக அமைச்சரவையில் பா.ம.க. இடம்பெறும் சூழல் இல்லை. தமிழக அரசின் தவறுகளைச் சுட்டிக்காட்டி, ஆலோசனை வழங்கக்கூடிய இடத்தில் தொடர்ந்து இருப்போம்.இவ்வாறு அவர் கூறினார்

மேற்கு வங்காளத்தில் இருந்து கள்ளநோட்டுகளை எடுத்து வந்து வேலூர் மாவட்டம் குடியாத்தத்தில் புழக்கத்தில் விட்ட 5 பேரை போலீசார் அதிரடியாக கைது செய்தனர்.

ஓட்டல் அதிபர்

வேலூர் மாவட்டம் குடியாத்தம் அருகே கள்ளூர் பகுதியைச் சேர்ந்தவர் ரபீக்அகமது (வயது 46). இவர் தரணம்பேட்டை பகுதியில் ஓட்டல் நடத்தி வருகிறார். சில நாட்களுக்கு முன்பு ரபீக்அகமது ஆன்லைனில் பொருள் ஒன்றை ஆர்டர் செய்துள்ளார். பின்னர் பொருளை வாங்கும்போது, அதனை கொடுக்க வந்தவரிடம் ரபீக் அகமது இரண்டு 500 ரூபாய் நோட்டுகளை கொடுத்துள்ளார். அந்த ரூபாய் நோட்டின் மீது சந்தேகம் ஏற்பட்டதால் டெலிவரி கொடுத்த நபர் குடியாத்தம் போலீசாருக்கு ரகசியமாக தகவல் தெரிவித்தார்.

கள்ளநோட்டுகள் பறிமுதல்

இதையடுத்து ரபீக்அகமதுவிடம் போலீசார் விசாரணை நடத்தினர். பின்னர் அவரிடம் இருந்து ரூ.50 ஆயிரம் கள்ள நோட்டுகளை பறிமுதல் செய்தனர். மேலும் அவர் குடியாத்தம் பகுதியில் வசிக்கும் ஜூபேர்அகமது(52) என்பவரிடம் கள்ளநோட்டுகளை வாங்கியதாக தெரிவித்தார். அதன்பேரில் ஜூபேர்அகமதுவை போலீசார் கைது செய்து அவரிடம் இருந்த ரூ.20 ஆயிரம் கள்ள நோட்டுகளை பறிமுதல் செய்தனர். அவரது வாக்குமூலத்தின் அடிப்படையில் ஆம்பூர் கோபால்(47), பேரணாம்பட்டு காமராஜ்(48) ஆகியோர் கைது செய்யப்பட்டு ரூ.50 ஆயிரம் கள்ளநோட்டுகள் கைப்பற்றப்பட்டன.

மேற்கு வங்காளத்தில் இருந்து...

தொடர் விசாரணையில், ஆம்பூரைச் சேர்ந்த பாபு(65) என்பவர்தான் கள்ளநோட்டுகளை சப்ளை செய்தது தெரியவந்தது. அவரிடம் இருந்து ரூ.30 ஆயிரம் பறிமுதல் செய்யப்பட்டது. பாபு கடந்த 10 ஆண்டுகளுக்கு முன்பு மேற்கு வங்காளத்தில் கள்ளநோட்டு வழக்கில் கைதாகி சிறைக்கு சென்றவர் என்பதும், அங்கிருந்து கள்ளநோட்டுகளைக் கொண்டுவந்து புழக்கத்தில் விட்டதும் விசாரணையில் அம்பலமானது.

5 பேரிடம் மொத்தம் ரூ.1½ லட்சம் கள்ளநோட்டுகள் பறிமுதல்

இந்த வழக்கில் அதிரடியாக கைது செய்யப்பட்ட 5 பேரிடம் இருந்தும் மொத்தம் ரூ.1½ லட்சம் மதிப்பிலான கள்ளநோட்டுகளைப் போலீசார் பறிமுதல் செய்து தீவிர விசாரணை நடத்தி வருகின்றனர்.

சென்னையை அடுத்த நன்மங்கலம் பகுதியில் மின்சாரம் தாக்கி கட்டிடத் தொழிலாளி பலியானது குறித்து போலீசார் விசாரித்து வருகின்றனர்.

கட்டிட தொழிலாளி

சென்னையை அடுத்த நன்மங்கலம் டாக்டர் அம்பேத்கர் சாலையைச் சேர்ந்தவர் காந்தி (வயது 57). கட்டிடத் தொழிலாளியான இவர், பள்ளிக்கரணை நாராயணபுரம் நாகேஸ்வரியம்மன் பிரதான சாலையில் நடைபெற்று வரும் வீடு கட்டும் பணியில் ஈடுபட்டு வந்தார்.

மின்சாரம் தாக்கி பலி

நேற்று காலை அந்த வீட்டின் முதல் மாடியில் சாரம் பிரிக்கும் பணியில் காந்தி ஈடுபட்டிருந்தார். அப்போது எதிர்பாராதவிதமாக அவரது கை, சாலையோரம் சென்ற உயர் அழுத்த மின்கம்பியில் பட்டது. இதில் மின்சாரம் தாக்கியதில் தூக்கி வீசப்பட்ட அவர், மயங்கி விழுந்தார்.

இதைக்கண்டு அதிர்ச்சியடைந்த சக தொழிலாளர்கள், உடனடியாக அவரை மீட்டு தனியார் ஆஸ்பத்திரிக்கு கொண்டு சென்றனர். அங்கு அவரை பரிசோதித்த டாக்டர்கள், காந்தி ஏற்கனவே இறந்துவிட்டதாக தெரிவித்தனர். இதுகுறித்து பள்ளிக்கரணை போலீசார் வழக்குப்பதிவு செய்து விசாரித்து வருகின்றனர்.

திருப்பூர் மாவட்டம் காங்கயம் பகுதியில் தண்ணீர் தொட்டியில் விழுந்த 2 1/2 வயது பெண் குழந்தை உயிரிழந்தது குறித்து போலீசார் விசாரித்து வருகின்றனர்.

தண்ணீர் தொட்டியில் விழுந்த பெண் குழந்தை

திருப்பூர் மாவட்டம் காங்கயம் பகுதியைச் சேர்ந்த கார்த்தி-எஸ்தர் தம்பதியின் 2 1/2 வயது பெண் குழந்தை கனித்ரா, வீட்டின் முன்பு விளையாடிக் கொண்டிருந்தபோது திடீரென மாயமானார். அக்கம்பக்கத்தில் தேடியபோது, திறந்திருந்த 10 அடி ஆழ தண்ணீர் தொட்டியில் குழந்தை விழுந்திருக்கலாம் என்ற சந்தேகம் எழுந்தது.

உயிரிழப்பு; போலீசார் விசாரணை

இதுகுறித்த தகவலின்பேரில் விரைந்து வந்த தீயணைப்புத் துறையினர், தொட்டிக்குள் இறங்கி தேடியபோது தண்ணீரில் மூழ்கிய நிலையில் குழந்தை மீட்கப்பட்டது. பின்னர் அரசு மருத்துவமனைக்கு கொண்டு செல்லப்பட்ட குழந்தையைப் பரிசோதித்த டாக்டர்கள் ஏற்கனவே இறந்துவிட்டதாக தெரிவித்தனர். இது தொடர்பாக போலீசார் விசாரித்து வருகின்றனர்.

சென்னை விமான நிலையத்தில் மலேசியாவில் இருந்து ரூ.1.71 கோடி உயர்ரக கஞ்சா கடத்தி வந்த இளம்பெண்ணை சுங்க இலாகா அதிகாரிகள் கைது செய்தனர்.

மலேசிய விமானம்

சென்னை மீனம்பாக்கம் பன்னாட்டு விமான நிலையத்துக்கு வெளிநாடுகளில் இருந்து போதைப்பொருள் கடத்தி வரப்படுவதாக சுங்க இலாகா அதிகாரிகளுக்கு தகவல் கிடைத்தது. இதையடுத்து சுங்க இலாகா நுண்ணறிவு பிரிவு அதிகாரிகள் தீவிர கண்காணிப்பில் ஈடுபட்டனர். அப்போது மலேசிய தலைநகர் கோலாலம்பூரில் இருந்து வந்த விமானத்தில் பயணம் செய்த 28 வயது இளம்பெண், சுங்கச் சோதனையை தவிர்த்து வெளியே செல்ல முயன்றார். சந்தேகமடைந்த அதிகாரிகள் அவரை தடுத்து நிறுத்தி, சூட்கேஸ் மற்றும் கைப்பையை சோதனையிட்டனர்.

ரூ.1.71 கோடி உயர்ரக கஞ்சா பறிமுதல், இளம்பெண் கைது

அதில் 23 பாக்கெட்டுகளில் உணவுப் பொருட்கள் போல் மறைத்து வைக்கப்பட்டிருந்த 4 கிலோ 877 கிராம் எடையுள்ள உயர்ரக ஹைட்ரோபோனிக் கஞ்சாவை பறிமுதல் செய்தனர். அதன் சர்வதேச மதிப்பு ரூ.1 கோடியே 71 லட்சம் ஆகும். மலேசியாவில் இருந்து கஞ்சாவை கடத்தி வந்த இளம்பெண்ணை சுங்க இலாகா அதிகாரிகள் கைது செய்து விசாரணை நடத்தி வருகின்றனர். சர்வதேச போதைப்பொருள் கடத்தல் கும்பலுடன் அவருக்கு தொடர்பு உள்ளதா?, யாரிடம் போதைப்பொருளை ஒப்படைக்க கொண்டு வந்தார்? என்பது குறித்தும் விசாரித்து வருகின்றனர்.

தூத்துக்குடி மாவட்டத்தில் தனியார் நிதி நிறுவனத்தில் கடன் தருவதாகக் கூறி வாலிபரிடம் ரூ.1.95 லட்சத்தை நூதன முறையில் மோசடி செய்த மர்ம நபர்களை போலீசார் வலைவீசி தேடி வருகின்றனர்.

ரூ.2 லட்சம் கடன்

தூத்துக்குடி மாவட்டம் நாசரேத் பகுதியைச் சேர்ந்த வாலிபரின் செல்போன் எண்ணிற்கு தனியார் நிதி நிறுவனம் ஒன்றில் இருந்து குறுந்தகவல் வந்துள்ளது. அதில் அவருக்கு ரூ.2 லட்சம் கடன் ஒப்புதலாகி உள்ளதாகவும், அதனைப் பெறுவதற்கு ஜி.எஸ்.டி. மற்றும் பரிவர்த்தனை கமிஷன் தொகையாக ரூ.1.90 லட்சம் செலுத்த வேண்டும் என்றும் கூறப்பட்டிருந்தது.

ரூ.1.95 லட்சம் மோசடி

மேலும் லோன் தொகை கணக்கில் சேர்ந்த பிறகு இந்த முன் பணம் மீண்டும் அவரது வங்கி கணக்கிற்கு மாற்றப்பட்டுவிடும் என்றும் ஆசை வார்த்தைகள் கூறப்பட்டுள்ளன. இதை உண்மை என்று நம்பிய அந்த வாலிபர், கூகுள்பே, போன்பே போன்ற யு.பி.ஐ. செயலிகள் மூலம் பல தவணைகளாக மொத்தம் ரூ.1.95 லட்சத்தை மர்ம நபர்களின் கணக்கிற்குச் செலுத்தியுள்ளார்.

மர்ம நபர்களுக்கு போலீஸ் வலைவீச்சு

ஆனால் பல நாட்கள் ஆகியும் அவரது வங்கி கணக்கில் லோன் தொகையோ அல்லது அவர் செலுத்திய முன்பணமோ திரும்ப வரவில்லை. இதனால் தான் ஏமாற்றப்பட்டதை உணர்ந்த அந்த வாலிபர், இதுகுறித்து சைபர் கிரைம் இணையதள போர்ட்டலில் ஆன்லைனில் புகார் செய்தார். அந்த புகாரின் அடிப்படையில் சைபர் கிரைம் போலீசார் வழக்குப்பதிவு செய்து, மோசடியில் ஈடுபட்ட மர்ம நபர்களை வலைவீசி தேடி வருகின்றனர்.

தூத்துக்குடி உப்பளத் தொழிலாளர்களுக்கு 2026-ம் ஆண்டுக்கான தீபாவளி போனஸ் வழங்கும் ஒப்பந்தம் கையெழுத்தானது.

உப்பளத் தொழிலாளர்களுக்கு 2026-ம் ஆண்டுக்கான தீபாவளி போனஸ்

தூத்துக்குடி உப்பளத் தொழிலாளர்களுக்கு 2026-ம் ஆண்டுக்கான தீபாவளி போனஸ் ஒப்பந்தம் உப்பள உற்பத்தியாளர்கள் மற்றும் தொழிலாளர் சங்க பிரதிநிதிகள் முன்னிலையில் கையெழுத்தானது.

பேச்சுவார்த்தை

தூத்துக்குடி உப்பு உற்பத்தியாளர்கள் சங்கத்தினருக்கும், தொழிலாளர் பிரதிநிதிகளுக்கும் இடையே 2026-ம் ஆண்டுக்கான தீபாவளி போனஸ் தொடர்பான பேச்சுவார்த்தை, தூத்துக்குடி உப்பு உற்பத்தியாளர்கள் வியாபாரிகள் சங்க அலுவலகத்தில் நேற்று நடைபெற்றது.

இந்த பேச்சுவார்த்தையில் உற்பத்தியாளர்கள் தரப்பில் தூத்துக்குடி சிறு அளவிலான உப்பு உற்பத்தியாளர்கள் சங்கம், தூத்துக்குடி உப்பு உற்பத்தியாளர்கள் மற்றும் வியாபாரிகள் சங்கம் ஆகிய இரண்டு சங்கங்களின் பிரதிநிதிகள் பங்கேற்றனர். தொழிலாளர்கள் தரப்பில் சி.ஐ.டி.யு., ஏ.ஐ.டி.யு.சி., ஐ.என்.டி.யூ.சி., அண்ணா உப்பளத் தொழிலாளர் சங்கம், வேப்பலோடை உப்பளத் தொழிலாளர் சங்கம், தூத்துக்குடி உப்பு சுரண்டல் தொழிலாளர் சங்கம் உள்ளிட்ட ஏழு தரப்பினர் கலந்துகொண்டனர்.

உப்பு வாருதல் தொழிலாளர்களுக்கு ரூ.11,000 போனஸ்

பேச்சுவார்த்தையின் முடிவில் இரு தரப்பினரும் ஏகமனதாகப் போனஸ் ஒப்பந்தத்தில் கையெழுத்திட்டனர். அதன் விவரம் பின்வருமாறு:

2026-ம் ஆண்டில் குறைந்தபட்ச முழு அளவிலான வேலையில் பணியாற்றிய உப்பு வாருதல் தொழிலாளர்களுக்கு ரூ.11,000 மற்றும் பிற பணிகளில் ஈடுபடும் தொழிலாளர்களுக்கு ரூ.10,675 தீபாவளி போனஸாக வழங்க முடிவு செய்யப்பட்டுள்ளது. இத்தொகையை வருகிற நவம்பர் 5-ம் தேதிக்குள் வழங்க வேண்டும் என ஒப்பந்தத்தில் தெரிவிக்கப்பட்டுள்ளது.

கண்ணாடி வாங்க ரூ.400

வழக்கமாக வழங்கப்படும் 9 நாட்கள் விடுமுறைச் சம்பளத்துடன், சட்டமன்றத் தேர்தல் விடுமுறை நாளுக்கான சம்பளத்தையும் சேர்த்து மொத்தம் 10 நாட்களுக்கான விடுமுறைச் சம்பளம் வழங்கப்படவுள்ளது. தொழிலாளர்களுக்கு மிதிவண்டி மற்றும் கண்ணாடி வாங்குவதற்காக ரூ.400 வழங்கவும் ஒப்பந்தத்தில் முடிவு செய்யப்பட்டுள்ளது.

திருநெல்வேலி, திருச்செந்தூர் இடையேயான பயணிகள் ரெயில் சேவை 5 நாட்களுக்கு ரத்து செய்யப்பட்டுள்ளது.

திருநெல்வேலி, திருச்செந்தூர் இடையே பயணிகள் ரெயில் சேவை காலை முதல் இரவு வரை சீரான இடைவேளையில் இயக்கப்பட்டு வருகிறது. இந்த ரெயில் சேவையை தினமும் நூற்றுக்கணக்கான பயணிகள் பயன்படுத்தி வருகின்றனர்.

ரெயில் சேவை ரத்து

இந்நிலையில், திருநெல்வேலி, திருச்செந்தூர் இடையேயான பயணிகள் ரெயில் சேவை 5 நாட்களுக்கு ரத்து செய்யப்படுவதாக தெற்கு ரெயில்வே அறிவித்துள்ளது.

அதன்படி, பராமரிப்பு மற்றும் நிர்வாக காரணங்களுக்காக திருநெல்வேலி , திருச்செந்தூர் இடையேயான பயணிகள் ரெயில் சேவை நவம்பர் 26ம் தேதி முதல் 30ம் தேதி வரை 5 நாட்களுக்கு முழுமையாக ரத்து செய்யப்படுவதாக தெற்கு ரெயில்வே அறிவித்துள்ளது. இந்த வழித்தடத்தில் பயணம் செய்ய திட்டமிட்டுள்ள பயணிகள் மாற்றுப்போக்குவரத்து ஏற்பாடுகளை செய்துகொள்ளுமாறு ரெயில்வே அறிவுறுத்தியுள்ளது.

தூத்துக்குடி மாவட்ட கலெக்டராகப் பணியாற்றி வரும் விஷு மகாஜனின் புகைப்படத்தைப் பயன்படுத்தி, மர்ம நபர் ஒருவர் வாட்ஸ்அப் மூலம் அரசு அதிகாரிகளிடம் பணம் பறிக்க முயன்ற சம்பவம் தூத்துக்குடியில் அதிர்ச்சியை ஏற்படுத்தியுள்ளது.

ஆய்வுக் கூட்டத்தின் போது வந்த மெசேஜ்

தூத்துக்குடி மாவட்டத்தில் பணியாற்றி வரும் சில அரசு அதிகாரிகளுக்கு கலெக்டரின் புகைப்படம் வைக்கப்பட்ட வாட்ஸ்அப் எண்ணிலிருந்து பணம் கேட்டுத் தகவல்கள் அனுப்பப்பட்டுள்ளன.

கடந்த சில நாட்களுக்கு முன்பு மாவட்ட கலெக்டர் விஷு மகாஜன் அதிகாரிகளுடன் ஆய்வுக்கூட்டம் நடத்திக் கொண்டிருந்தபோதே, கூட்டத்தில் பங்கேற்ற சில அதிகாரிகளின் எண்களுக்கு அதே வாட்ஸ்அப் எண்ணிலிருந்து குறுஞ்செய்தி (Message) வந்துள்ளது. இதில் அதிர்ச்சியடைந்த அதிகாரிகள், உடனே இத்தகவலை கலெக்டரிடம் தெரிவித்துள்ளனர்.

பணமோசடி முயற்சி

இதனைத் தொடர்ந்து நடத்தப்பட்ட விசாரணையில், மர்ம நபர் போலியாக கலெக்டரின் புகைப்படத்தைப் பயன்படுத்தி அதிகாரிகளிடம் பணமோசடி செய்ய முயன்றது தெரியவந்தது. இதையடுத்து அனைத்து அதிகாரிகளுக்கும் எச்சரிக்கைத் தகவல் அனுப்பப்பட்டதுடன், மாவட்ட சைபர் குற்றப்பிரிவு காவல் நிலையத்தில் புகார் அளிக்கப்பட்டது.

சைபர் குற்றப்பிரிவு போலீசார் வழக்குப்பதிவு

அந்த புகாரின் பேரில் சைபர் குற்றப்பிரிவு போலீசார் வழக்குப்பதிவு செய்து தீவிர விசாரணை மேற்கொண்டு வருகின்றனர். போலீசாரின் முதற்கட்ட விசாரணையில், அந்த வாட்ஸ்அப் எண் கேரள மாநிலம் காசர்கோடு பகுதியைச் சேர்ந்த ஒருவரின் பெயரில் பதிவு செய்யப்பட்டுள்ளது தெரியவந்துள்ளது. அந்த மர்ம நபரைப் பிடிக்கப் போலீசார் தொடர்ந்து தீவிர விசாரணை நடத்தி வருகின்றனர்.

கன்னியாகுமரி மற்றும் திருநெல்வேலி மாவட்டங்களில் சிறப்பாக பணியாற்றிய போலீசாரை திருநெல்வேலி சரக டி.ஐ.ஜி. திருநாவுக்கரசு நேரில் அழைத்து சான்றிதழ் வழங்கி பாராட்டினார்.

சிறப்பாக பணியாற்றிய போலீசாருக்கு டி.ஐ.ஜி. திருநாவுக்கரசு பாராட்டு

கன்னியாகுமரி மாவட்டம், மார்த்தாண்டம் அனைத்து மகளிர் காவல் நிலைய போக்சோ வழக்கில் 20 ஆண்டுகள் சிறைத் தண்டனை பெற்றுத்தரச் சிறப்பாகப் புலனாய்வு செய்த போலீஸ் இன்ஸ்பெக்டர் உமா மற்றும் நீதிமன்றப் பணியைச் சிறப்பாக மேற்கொண்ட தலைமைக் காவலர் மெர்சிபாய், கன்னியாகுமரி அனைத்து மகளிர் காவல் நிலைய பாலியல் பலாத்கார வழக்கில் 14 ஆண்டுகள் சிறைத் தண்டனை பெற்றுத்தர நீதிமன்றப் பணியைச் சிறப்பாக மேற்கொண்ட தலைமைக் காவலர் வெங்கடேஸ்வரி மற்றும்

திருநெல்வேலி மாவட்டம் வீரவநல்லூர் காவல் நிலைய கூட்டுக் கொள்ளை வழக்கில் 7 ஆண்டுகள் சிறைத் தண்டனை பெற்றுத்தர நீதிமன்றப் பணியை சிறப்பாக மேற்கொண்ட தலைமைக் காவலர் பார்வதி ஆகியோரை இன்று (31.10.2026) திருநெல்வேலி சரக டி.ஐ.ஜி. திருநாவுக்கரசு, சரக அலுவலகத்திற்கு நேரில் அழைத்துப் பாராட்டுச் சான்றிதழ்கள் வழங்கி கவுரவித்தார்.

திருவண்ணாமலை ராஜகோபுரம் முன்பாக பொது சுகாதாரத்துறை சார்பில் அவசரகால மீட்பு ஒத்திகை நடைபெற்றது.

தீபத் திருவிழா

திருக்கார்த்திகை தீபத் திருவிழாவை வரும் திருவண்ணாமலையில் நவம்பர் 24-ந்தேதி தேதி 2,668 அடி உயர மலை மீது மகா தீபம் ஏற்றப்பட உள்ளது. இதைக் காண 50 லட்சத்திற்கும் மேற்பட்ட பக்தர்கள் வருவார்கள் என எதிர்பார்க்கப்படுகிறது.

அவசரகால மீட்பு ஒத்திகை

இதனையொட்டி தீ விபத்து மற்றும் கூட்ட நெரிசல் போன்ற அவசர சூழல்களில் காயமடைந்தவர்களை மீட்பது குறித்து இன்று கோவில் ராஜகோபுரம் முன்பு பொது சுகாதாரத்துறை சார்பில் அவசரகால மீட்பு ஒத்திகை நடத்தப்பட்டது.

மாவட்ட கலெக்டர்

காயமடைந்தவர்களுக்கு முதலுதவி அளித்து, 108 ஆம்புலன்ஸ் மூலம் மருத்துவமனைக்கு அழைத்துச் செல்வது போன்ற காட்சிகள் செயல்முறையாக விளக்கப்பட்டன. மாவட்ட கலெக்டர் வந்தனா கார்க் ஒத்திகையை பார்வையிட்டார். அவசர நேரங்களில் பொதுமக்கள் பதற்றமடையாமல் மீட்புக் குழுவினருக்கு ஒத்துழைக்க வேண்டும் என்றும் அறிவுறுத்தப்பட்டது.

தேனி மாவட்டம் வருசநாடு சுற்றுவட்டாரங்களில் உள்ள 98 மலைக்கிராமங்களில் வசிக்கும் மக்களை ஸ்ரீவில்லிபுத்தூர் மேகமலை புலிகள் காப்பக ஆக்கிரமிப்பாளர்கள் என காரணம் காட்டி அவர்களை அங்கிருந்து வெளியேற்றும் நடவடிக்கையில் வனத்துறையினர் தொடர்ந்து ஈடுபட்டு வருகின்றனர்.

போராட்டம்

வனத்துறையின் இந்த நடவடிக்கையை கண்டித்து மலைக்கிராம மக்கள் தொடர்ந்து போராட்டத்தில் ஈடுபட்டு வருகின்றனர். இந்த நிலையில், தேனி மாவட்ட கலெக்டர் சிவ கிருஷ்ணமூர்த்தி, 50-க்கும் மேற்பட்ட மலைக்கிராமங்களுக்கு சென்று மக்களின் கோரிக்கைகளைக் கேட்டறிந்தார். அவர்கள் பல தலைமுறைகளாக அங்கு வசிப்பதற்கான ஆவணங்களையும் ஆய்வு செய்தார்.

கோரிக்கைகள்

மஞ்சனூத்து வன சோதனைச் சாவடி பகுதியில் மக்கள் சாலையில் அமர்ந்து கோரிக்கைகளை முன்வைத்தனர். சுப்ரீம் கோர்ட்டில் வழக்கு நிலுவையில் இருப்பதால், தமிழக அரசு சார்பில் மக்களுக்கு தேவையான உதவிகள் அனைத்தும் செய்யப்படும் என்றும், அரசு எப்போதும் மலைக்கிராம மக்களுக்குத் துணையாக இருக்கும் என்றும் கலெக்டர் உறுதியளித்தார்.

காதலை கைவிட மறுத்ததால் மாணவியை கழுத்தை நெரித்துக் தந்தையே கொலை செய்த சம்பவம் அதிர்ச்சியை ஏற்படுத்தி உள்ளது.

மாணவி

விழுப்புரம் மாவட்டம் வானூர் தாலுகா வி.பரங்கனி கிராமத்தை சேர்ந்தவர் சிவசாஸ்திரி (வயது 40). லாரி டிரைவர். அவரது மனைவி விமலா. இவர்களுக்கு 2 மகள்கள் உள்ளனர்.

இந்தநிலையில் கடந்த சில மாதங்களுக்கு முன்பு வரை அவரது 2-வது மகள் ராணிப்பேட்டை மாவட்டம் காரை கிராமத்தில் உள்ள தனது பாட்டி வீட்டில் தங்கியிருந்து அங்குள்ள பள்ளியில் படித்து வந்தார். அப்போது அந்த கிராமத்தை சேர்ந்த வாலிபர் ஒருவருடன் மாணவிக்கு பழக்கம் ஏற்பட்டுள்ளது. நாளடைவில் இந்த பழக்கம் காதலாக மாறியது.

தந்தை கண்டிப்பு

இந்த விவகாரம் மாணவியின் பாட்டிக்கு தெரிய வந்தது. இதுகுறித்து அவர் தனது மகள் மற்றும் மருமகனிடம் தெரிவித்தார். இதையடுத்து சிவசாஸ்திரி தனது மகளை சொந்த ஊருக்கு அழைத்து வந்தார். இங்கு வந்ததும் நீ நன்றாக படிக்க வேண்டும், படிக்கும் காலத்தில் காதல் எல்லாம் வேண்டாம் என அறிவுரை கூறினார். மேலும் கரசானூரில் உள்ள பள்ளியில் மாணவியை 10-ம் வகுப்பு சேர்த்து விட்டார்.

இந்த நிலையில் இங்கு வந்த பின்னரும் மாணவி செல்போனில் அந்த வாலிபருடன் பேசி வந்ததாக கூறப்படுகிறது. இதையறிந்த மாணவியின் தந்தை அவரை கண்டித்துள்ளார். இருப்பினும் அவர் கேட்கவில்லை.

துக்க நிகழ்ச்சிக்கு...

நேற்று முன்தினம் மாணவியின் தாயார் விமலா ராணிப்பேட்டையில் உறவினர் ஒருவர் வீட்டு துக்க நிகழ்ச்சிக்கு சென்று விட்டார். இதனால் இரவு வீட்டில் சிவசாஸ்திரி மற்றும் அவரது 2 மகள்கள் இருந்தனர். அனைவரும் சாப்பிட்டு விட்டு தூங்க சென்றனர்.

அப்போது சிவசாஸ்திரி தனது மூத்த மகளை அழைத்து அருகே இருக்கும் சித்தப்பா வீட்டுக்கு சென்று தூங்குமாறும், இங்கு நானும் தங்கையும் இருந்து கொள்கிறோம் என தெரிவித்துள்ளார். அதன்பேரில் மூத்த மகள் சித்தப்பா வீட்டுக்கு தூங்க சென்றார்.

கழுத்தை நெரித்து கொலை

பின்னர் சிவசாஸ்திரி விகாஷினியிடம் அந்த வாலிபரிடம் பேசுவதை தவிர்க்குமாறும், நீ நன்றாக படிக்க வேண்டும் என்று கூறியுள்ளார். ஆனால் மாணவி அந்த வாலிபரை தான் காதலிப்பதாக தெரிவித்ததாக கூறப்படுகிறது. இதனால் ஆத்திரம் அடைந்த சிவசாஸ்திரி பெற்ற மகள் என்று கூட பாராமல் கழுத்தை நெரித்துக் கொலை செய்துள்ளார்.

பின்னர் அவர் தனது சகோதரருக்கு செல்போனில் தொடர்பு கொண்டு மகளை கொன்று விட்டதாக கூறியுள்ளார். இதை கேட்டு அவர் பதறி அடித்துக்கொண்டு வீட்டுக்கு வந்துள்ளார். அப்போது மாணவி இறந்த நிலையில் கிடந்துள்ளார். இருப்பினும் உயிர் இருக்கும் என்ற நம்பிக்கையில் அவரை வானூர் அரசு ஆஸ்பத்திரிக்கு கொண்டு சென்றார். அங்கு அவரை பரிசோதனை செய்த டாக்டர்கள், மாணவி ஏற்கனவே இறந்துவிட்டதாக தெரிவித்தனர்.

போலீசில் சரண்

இதற்கிடையே சிவசாஸ்திரி தனது மகளை கொலை செய்து விட்டதாக கூறி வானூர் போலீசில் சரணடைந்தார். உடனடியாக போலீசார் மாணவியின் உடலை மீட்டு பரிசோதனைக்காக கனகசெட்டிக்குளம் தனியார் ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து சிவசாஸ்திரியை கைது செய்தனர்.

காதலை கைவிட மறுத்ததால் பெற்ற மகளை தந்தையே கழுத்தை நெரித்துக் கொலை செய்த சம்பவம் வானூர் பகுதியில் பெரும் பரபரப்பை ஏற்படுத்தி உள்ளது.

6 மாதங்களில் தவெக அரசு மக்களுக்கு கொடுத்த பரிசு விலைவாசி உயர்வுதான் என எடப்பாடி பழனிசாமி கூறியுள்ளார்.

செங்கல்பட்டு மறைமலை நகரில் அதிமுகவின் 55ஆம் ஆண்டு தொடக்க விழா கூட்டத்தில் அக்கட்சியின் பொதுச்செயலாளர் எடப்பாடி பழனிசாமி பேசியதாவது:-

சில கட்சிகள் ரீல்ஸ் விடுகின்றன; ரியலாக இருக்கும் கட்சி அதிமுகதான். ஏழைகளுக்காக எம்ஜிஆர் தொடங்கிய அதிமுக ரீல்ஸ் போடும் கட்சி அல்ல. 6 மாதங்களில் தவெக அரசு மக்களுக்கு கொடுத்த பரிசு என்னவென்றால் விலைவாசி உயர்வுதான். மின்கட்டணம்தான் உயர்ந்துள்ளது; ஆனால் மின்சாரம் சரியாக வருவது இல்லை.

விஜய் அப்படி என்ன சாதனை செய்தார்..இந்த ஆட்சியில் ஊழலே இல்லையா சொல்லுங்க..எந்த அரசு அலுவலகத்திற்கு சென்றாலும் லஞ்சம் தான்..திமுக ஆட்சியில் ரூ.5 ஆயிரம் என்றால் தவெக ஆட்சியில் ரூ.10 ஆயிரம் வாங்குறாங்க.

"சந்தி சிரிக்கும் சட்டம்-ஒழுங்கு

சந்தி சிரிக்கும் நிலையில் சட்டம்-ஒழுங்கு உள்ளது; குழந்தைகள் அடிக்கடி காணாமல் போகின்றனர் போதைப் பொருள் விற்பனை அதிகரிப்பு; நாகையில் ரூ.400 கோடி -மெத்தபெட்டமைன் கண்டுபிடிக்கப்பட்டது.

அதிமுகவை தொட்டு கூட பார்க்க முடியாது

உயிரோட்டமுள்ள அதிமுகவை பலர் உடைக்க பார்க்கின்றனர். தொட்டு கூட பார்க்க முடியாது. விஜய் தமிழ்நாட்டின் முதலமைச்சர் அல்ல; அவருக்கு மேல் 3 முதலமைச்சர்கள் உள்ளனர். மேடையில் பேசும்போதே மின்வெட்டு ஏற்பட்டு விடுமோ என நினைக்கும் சூழல் உள்ளது. சினிமாவை விட அதிகம் பணம் சம்பாதிக்க விஜய் அரசியலுக்கு வந்துள்ளாரா? என கேள்வி எழுப்பினார்.

தலைமைத் தேர்தல் ஆணையர் ஞானேஷ் குமார் பதவி விலகும் வரை மக்கள் மன்றத்திலும் நாடாளுமன்றத்திலும் தொடர்ந்து போராடுவோம் என்று காங்கிரஸ் எம்.பி. மாணிக்கம் தாகூர் தெரிவித்துள்ளார்.

இது தொடர்பாக தமிழக காங்கிரஸ் தலைவர் மாணிக்கம் தாகூர் எம்பி தனது எக்ஸ் தளத்தில் வெளியிட்டுள்ள பதிவில் தெரிவித்திருப்பதாவது:-

மக்களவை எதிர்கட்சி தலைவர் ராகுல் காந்தி மற்றும் ‘இந்தியா’ கூட்டணிக் கட்சிகளின் நாடாளுமன்ற உறுப்பினர்கள் மற்றும் குடிமக்கள் இன்று புதுடெல்லியில் ஒன்றுதிரண்டு நடத்திய மக்கள் நாடாளுமன்றத்தில் நானும் பங்கேற்று, ஜனநாயகம் காக்க உரக்கக் குரலெழுப்பினேன்!

குற்றச்சாட்டுகள்

இந்திய அரசியலமைப்புச் சட்டம் பிரிவு 326 உத்தரவாதம் அளித்துள்ள வாக்குரிமைக்குக் கடுமையான அச்சுறுத்தலை ஏற்படுத்தியுள்ள தலைமைத் தேர்தல் ஆணையர் ஞானேஷ் குமாரை உடனடியாகப் பதவி நீக்கம் செய்யக் கோரும் தீர்மானத்தில் முன்வைக்கப்பட்ட 6 முக்கியக் குற்றச்சாட்டுகள்.

1. பாஜகவுடன் இணைந்து தேசிய மற்றும் மாநிலத் தேர்தல்களை முறைகேடாகத் திருட சதித்திட்டம் தீட்டியது; வாக்காளர் பட்டியலை மாற்றி, தங்களுக்கு வேண்டியவர்களைச் சேர்க்கவும் நீக்கவும் அனுமதித்து, தேர்தல் ஜனநாயகத்தின் அடித்தளத்தின் மீதே தாக்குதல் நடத்தி தேசத்துரோகம் இழைத்தது.

2. முறைகேடான வாக்காளர் பட்டியல் சிறப்புத் தீவிர திருத்தம் (SIR) மூலம், எவ்வித இயற்கை நீதியுமின்றி பாரபட்சமாகவும் வெளிப்படைத்தன்மையின்றியும் 13.2 கோடி இந்தியக் குடிமக்களின் அடிப்படை வாக்குரிமையைத் திட்டமிட்டுப் பறித்தது.

3. நாடாளுமன்றத்தின் ஒப்புதலோ அல்லது கவனமோ இன்றி, 1960 வாக்காளர் பதிவு விதிகளின் படிவம் 6-ல் தன்னிச்சையாகத் திருத்தங்களை மேற்கொண்டு, முதன்முறை இளம் வாக்காளர்கள் வாக்காளர் பட்டியலில் சேர்வதைத் தடுத்து அவர்களின் உரிமையை நசுக்கியது.

4. ERONET / ECINET மென்பொருளைத் தவறாகப் பயன்படுத்தி, வாக்காளர் பட்டியலின் கட்டுப்பாட்டைத் தேர்தல் ஆணையத்தில் மையப்படுத்தி, உள்ளூர் தேர்தல் பதிவு அலுவலர்கள் தகுதியான வாக்காளர்களைச் சேர்ப்பதைத் தடுத்து தன்னிச்சையாகப் பெயர்களை நீக்கியது.

5. தேர்தல் ஆணையத்தில் உள்ள மற்ற இரு தேர்தல் ஆணையர்களையும் திட்டமிட்டு முடிவெடுக்கும் அதிகாரத்திலிருந்து ஒதுக்கி வைத்து, அவர்கள் பதிவு செய்த 14 ஆட்சேபனைக் குறிப்புகளையும் மீறி, சட்டவிரோதமாக முடிவுகளை மேற்கொண்டது.

6. சுயேச்சையாகச் செயல்பட வேண்டிய அமைப்பை அடகுவைத்து, எதிர்க்கட்சிகளின் வாதங்களைக் கேட்காமல் தேர்தல் ஆணைய அலுவலகத்தையே பூட்டியது; எதிர்க்கட்சித் தலைவர்கள் தாக்கப்பட்டபோது கைகட்டி வேடிக்கை பார்த்தது; பிரதமர் நரேந்திர மோடி மற்றும் உள்துறை அமைச்சர் அமித்ஷாவின் உத்தரவின்படி செயல்பட்டு, தனது குடும்பத்தினருக்கு முக்கியப் பதவிகள் மற்றும் ஆதாயங்களைப் பெற்றுத் தந்தது.

டிசம்பர் 2023-ல் மோடி அரசு இவருக்கு அளித்த சட்டப் பாதுகாப்பு என்பது இந்த ஜனநாயக விரோத குற்றங்களுக்கான கவசமே தவிர வேறில்லை. அரசியலமைப்புச் சட்டத்தின் ஆன்மாவைச் சிதைத்து, 140 கோடி இந்திய மக்களின் வாக்குரிமையைத் திருடிய ஞானேஷ் குமார் சட்டத்தின் பிடியிலிருந்து தப்பவே முடியாது!

‘இந்தியா’ கூட்டணி

மக்களவை எதிர்கட்சி தலைவர் ராகுல் காந்தி தலைமையில், 140 கோடி மக்களின் ஜனநாயக நம்பிக்கைக்குத் துரோகம் இழைத்த இந்த அதிகார அத்துமீறலை ‘இந்தியா’ கூட்டணி ஒருபோதும் அனுமதிக்காது; வாக்கைக் காப்போம், நாட்டைக் காப்போம் என்ற உறுதியோடு, ஞானேஷ் குமார் உடனடியாகத் தலைமைத் தேர்தல் ஆணையர் பதவியிலிருந்து விலகும் வரை ‘இந்தியா’ கூட்டணி மக்கள் மன்றத்திலும் நாடாளுமன்றத்திலும் சமரசமின்றித் தொடர்ந்து போராடும்!

இவ்வாறு அதில் தெரிவிக்கப்பட்டுள்ளது.

ஆதாரமற்ற குற்றச்சாட்டுகளை விட்டுவிட்டு, ஆக்கப்பூர்வமான அரசியலை முன்னெடுங்கள் ராகுல் காந்தி என்று நயினார் நாகேந்திரன் தெரிவித்தார். இது தொடர்பாக, பாஜக மாநில தலைவர் நயினார் நாகேந்திரன் தனது எக்ஸ் தளத்தில் பதிவிட்டு இருப்பதாவது;-

ஐடிபிஐ வங்கி

1964 ஆம் ஆண்டு தொடங்கப்பட்ட ஐடிபிஐ வங்கியை, 50 ஆண்டுகளுக்கும் மேலாக ஆட்சியில் இருந்த உங்கள் இந்திய தேசிய காங்கிரஸ் கட்சி, தனது சுயலாபத்திற்காக சுரண்டி தின்றது என்பதுதான் வரலாறு.

வாராக்கடனாக மாறியது

அதுமட்டுமன்றி தங்கள் ஆட்சியில் நஷ்டத்தில் இயங்கி கொண்டிருந்த கிங்பிஷர் உள்ளிட்ட பெரு நிறுவனங்களுக்கு விதிகளை மீறி அதிகளவிலான கடன்களை வழங்குமாறு, பொதுத்துறை வங்கிகளை காங்கிரஸ் கட்சி நிர்ப்பந்தித்ததன் விளைவாகவே, ஐடிபிஐ வங்கியின் மொத்த கடன்களில் கிட்டத்தட்ட மூன்றில் ஒரு பகுதி திரும்ப வராத வாராக்கடனாக மாறியது. ஐடிபிஐ வங்கி பெரும் நிதியிழப்பையும் சந்தித்தது.

ரூ.25 ஆயிரம் கோடி மறுமுதலீடு

ஆனால், நமது பாரத பிரதமர் மோடி தலைமையிலான அரசு, ரூ.25 ஆயிரம் கோடி மறுமுதலீடு செய்து அந்த வங்கியை மீட்டெடுத்தது. ‘ஊழல் கறைபடிந்த’ காங்கிரஸின் கரங்கள் இந்த உண்மைகளை மூடிமறைக்க முயன்றாலும், மக்கள் ஒருநாளும் மறக்கமாட்டார்கள்.

வங்கியின் நலன்

மேலும், யுபிஏ ஆட்சி காலத்தை போலல்லாமல், ஐடிபிஐ வங்கியின் மூலோபாய மறுசீரமைப்பு, விதிமுறைகளுக்கு உட்பட்டு முறையாக மேற்கொள்ளப்பட்டுள்ளது என்பதையும், அங்குள்ள ஊழியர்களின் பணி நிபந்தனைகளும் ஓய்வூதிய பலன்களும் முழுமையாக பாதுகாக்கப்படும் என்பதையும் நமது மத்திய அரசு தெளிவுபடுத்தி விட்டது. அப்படியிருக்கையில், ‘வங்கியின் நலன்’ என்ற பெயரில் தற்போது நீங்கள் நடத்தும் விளம்பர நாடகம் ஒரு பைசாவிற்கு கூட பிரயோஜனமில்லாதது.

ஆரோக்கியமான அரசியல்

எனவே, அரசியல் ஆதாயத்திற்காக ரபேல் விவகாரம், வாக்கு திருட்டு என அடுத்தடுத்து ஆதாரமற்ற குற்றச்சாட்டுகளை அடுக்கி அம்பலப்படுவதை விட, ஆக்கப்பூர்வமான உத்திகளை கொண்டு ஆரோக்கியமான அரசியலில் ஈடுபடுங்கள் ராகுல் காந்தி!

இவ்வாறு அதில் தெரிவிக்கப்பட்டுள்ளது.

பரபரப்பான அரசியல் சூழ்நிலைக்கு இடையே, அதிமுகமாவட்டச்செயலாளர்கள் ஆலோசனைக் கூட்டம் அக்கட்சியின் பொதுச்செயலாளர் எடப்பாடி பழனிசாமி தலைமையில் நாளை நடைபெற உள்ளது.

மதுராந்தகம் மற்றும் தாராபுரம் ஆகிய இரண்டு சட்டமன்றத் தொகுதிகளுக்கான இடைத்தேர்தலில் ஆளும் கட்சியான தமிழக வெற்றிக் கழகம் வெற்றி பெற்ற நிலையில், அதிமுக 3வது இடத்திற்குத் தள்ளப் பட்டு கடும் பின்னடைவைச் சந்தித்தது.

இந்த பரபரப்பான அரசியல் சூழ் நிலைக்கு இடையே, அதிமுக மாவட்டச் செயலாளர்கள் ஆலோசனைக் கூட்டம் சென்னை ராயப்பேட்டையில் உள்ள கட்சியின் தலைமை அலுவலகத்தில் நாளை பிற்பகல் 3.30 மணி அளவில் நடை பெறுகிறது. இக்கூட்டம் அதிமுகபொதுச்செயலாளர் எடப்பாடி பழனிசாமி தலைமையில் நடைபெற உள்ளது.

இக்கூட்டத்தில், அடுத்த கட்டமாக 5தொகுதிகளுக்கு நடைபெற உள்ள இடைத் தேர்தல் பணிகள் குறித்தும், எஸ்.ஐ.ஆர் பணிகளில் மாவட்டச் செயலாளர்கள் தீவிரமாகப் பணியாற்ற வேண்டியதன் அவசியம் குறித்தும் ஆலோசிக்கப்பட உள்ளது.

மேலும், அடுத்த மாதம் நடத்தப்பட வேண்டிய கட்சியின் பொதுக்குழு மற்றும் செயற்குழுகூட்டத்திற்கான ஏற்பாடுகள் குறித்தும் இந்த மாவட்டச் செயலாளர்கள் கூட்டத்தில் விரிவாக விவாதிக்கப்பட்டு முக்கிய முடிவுகள் எடுக்கப்படும் என்று எதிர்பார்க்கப்படுகிறது.

பெருநகர சென்னை மாநகராட்சி சார்பில் வீடுதோறும் மின்னணுக் கழிவுகள் சேகரிக்கும் சிறப்பு முகாம் இன்று நடைபெற்றது. இதில் பழைய கைப்பேசிகள், கணினிகள், தொலைக்காட்சிப் பெட்டிகள் உள்ளிட்ட மொத்தம் 1,309 மின்னணு மற்றும் மின்சாதனக் கழிவுகள் பொதுமக்களிடமிருந்து சேகரிக்கப்பட்டன.

மின்னணுக் கழிவுகள்

இது தொடர்பாக சென்னை மாநகராட்சி வெளியிட்டுள்ள அறிக்கையில் தெரிவித்திருப்பதாவது:-

இந்திய அரசால், மின்னணுக் கழிவுகளைத் திறம்படச் சேகரித்தல், தரம் பிரித்தல் மற்றும் முறையாக அகற்றுதல் ஆகியவற்றை உறுதி செய்வதற்கும், இது தொடர்பான நடவடிக்கைகளை உரிய முறையில் ஒருங்கிணைப்பதற்கும், சிறப்பு இயக்கம் 6.0 என்ற முன்னெடுப்பினை அனைத்து ஊரக மற்றும் நகர்ப்புற உள்ளாட்சி அமைப்புகளும் மேற்கொள்ளுமாறு அறிவுறுத்தப்பட்டுள்ளது.

இதன் ஒரு பகுதியாக, பெருநகர சென்னை மாநகராட்சியின் சார்பில், இன்று, மாநகராட்சியின் தூய்மைப் பணியாளர்கள் மூலம் வீடுகள் தோறும் சென்று மின்னணுக் கழிவுகளைப் பாதுகாப்பான முறையில் சேகரித்து, சுற்றுச்சூழலுக்கு உகந்த வகையில் மறுசுழற்சி செய்வதை ஊக்குவிக்கும் வகையில் சிறப்பு சேகரிப்பு முகாம் நடைபெற்றது.

மாநகராட்சி

மேலும், மின்னணுக் கழிவுகளை வீட்டுக் குப்பைகளுடன் கலக்காமல் தனியாகப் பிரித்து, மாநகராட்சியின் தூய்மைப் பணியாளர்களிடம் ஒப்படைக்க வேண்டும் எனப் பொதுமக்களுக்கு விழிப்புணர்வு ஏற்படுத்தப்பட்டது.

இதனைத் தொடர்ந்து, பொதுமக்கள் தங்களிடம் பயன்படுத்தப்படாமல் உள்ள அல்லது பழுதடைந்த மின்னணு மற்றும் மின்சாதனக் கழிவுகளான 3 பழைய கைப்பேசிகள், 38 கணினிகள், 11 மடிக்கணினிகள், 82 விசைப்பலகைகள், 361 தொலைக்காட்சிப் பெட்டிகள், 34 மின்விசிறிகள் மற்றும் 780 இதர மின்னணுச் சாதனங்கள் என மொத்தம் 1,309 மின்னணு மற்றும் மின்சாதனக் கழிவுகளை, இன்று நடைபெற்ற சிறப்புச் சேகரிப்பு இயக்கத்தின்போது மாநகராட்சியின் தூய்மைப் பணியாளர்களிடம் ஒப்படைத்தனர்.

மறுசுழற்சி

இச்சிறப்புச் சேகரிப்பு பணியின் போது சேகரிக்கப்பட்ட மின்னணுக் கழிவுகள், உரிய விதிமுறைகளின்படி, இந்திய அரசால் அங்கீகரிக்கப்பட்ட மின்னணுக் கழிவுகளை, சுற்றுச்சூழலுக்கு உகந்த வகையில் முறையாக மறுசுழற்சி செய்யும் நிறுவனத்திடம் ஒப்படைக்கப்படும் என தெரிவித்துக்கொள்ளப்படுகிறது.

பெருநகர சென்னை மாநகராட்சியின் இம்முயற்சிக்கு பொதுமக்கள், குடியிருப்போர் நலச் சங்கங்கள் (RWAs), கல்வி நிறுவனங்கள், வணிக நிறுவனங்கள் மற்றும் இதர அமைப்புகளிடமிருந்து நல்ல வரவேற்பு கிடைத்துள்ளது. இச்சிறப்புச் சேகரிப்பு முகாமின் மூலம் மின்னணுக் கழிவுகள் பொது இடங்கள், சாலையோரங்கள் மற்றும் நீர்நிலைகளில் முறையற்ற வகையில் கொட்டப்படுவது தவிர்க்கப்படுவதுடன், அவற்றால் ஏற்படக்கூடிய சுற்றுச்சூழல் மாசுபாடு மற்றும் பொதுமக்களின் உடல்நலப் பாதிப்புகளும் தடுக்கப்படுகின்றன.

பொதுமக்கள் தொடர்ந்து தங்களிடம் உள்ள பயன்படுத்தப்படாத மற்றும் பழுதடைந்த மின்னணு மற்றும் மின்சாதனக் கழிவுகளைத் தனியாகச் சேகரித்து, மாநகராட்சியின் தூய்மைப் பணியாளர்களிடம் ஒப்படைத்து, இம்முயற்சிக்கு முழு ஒத்துழைப்பு வழங்குமாறு கேட்டுக் கொள்ளப்படுகிறது.

இவ்வாறு அதில் தெரிவிக்கப்பட்டுள்ளது.

ஈரோட்டில் அமைச்சர் விஜய் பாலாஜி இன்று செய்தியாளர்களை சந்தித்து பேசினார். அப்போது அவரிடம் அம்பாசமுத்திரம் இடைத்தேர்தலில் சீமானை பொது வேட்பாளராக நிறுத்தினால் தமிழக வெற்றிக் கழகத்திற்கு நெருக்கடி ஏற்படுமா? என செய்தியாளர்கள் கேள்வி எழுப்பினர். இதற்கு பதிலளித்தபோது அவர் கூறியதாவது;-

நெருக்கடி வராது

“அம்பாசமுத்திரம் இடைத்தேர்தலில் பொதுவேட்பாளரால் த.வெ.க.விற்கு நெருக்கடி எதுவும் வராது. மக்கள் தெளிவாக இருக்கிறார்கள். தமிழக முதல்-அமைச்சர், த.வெ.க. தலைவர் விஜய் மீது மக்கள் அளவு கடந்த நம்பிக்கை வைத்துள்ளனர்.

நிச்சயம் வெற்றி பெறுவோம்

சமீபத்தில் நடந்த இடைத்தேர்தலில் ஒரு ரூபாய் பணம் கொடுக்காமல், திருமங்கலம் பார்முலாவை உடைக்கும் வகையில் பெரிய வாக்கு வித்தியாசத்தில் த.வெ.க. வெற்றி பெற்றுள்ளது. நிச்சயம் வருங்காலங்களில் எந்த தொகுதியில் இடைத்தேர்தல் நடந்தாலும் த.வெ.க. தொடர்ந்து வெற்றி பெறும்.”

இவ்வாறு அவர் தெரிவித்தார்.

சென்னை, கடலூர் உள்ளிட்ட 9 துறைமுகங்களில் ஒன்றாம் எண் புயல் எச்சரிக்கை கூண்டு ஏற்றப்பட்டுள்ளது.

வானிலை மையம்

சென்னை வானிலை மையம் வெளியிட்டிருந்த அறிக்கையில், “நேற்று (30-10-26) தெற்கு அந்தமான் கடல் பகுதிகள் மற்றும் அதனை ஒட்டிய அந்தமான் நிகோபார் தீவுகளில் நிலவிய காற்றழுத்த தாழ்வு பகுதி மேற்கு-வடமேற்கு திசையில் நகர்ந்து இன்று (31-10-26) காலை 5.30 மணி அளவில் தென்கிழக்கு வங்கக்கடல் மற்றும் அதனை ஒட்டிய அந்தமான் நிகோபார் தீவுகள் மற்றும் அந்தமான் கடல் பகுதிகளில் ஆழ்ந்த காற்றழுத்த தாழ்வு பகுதியாக வலுவடைந்து காலை 8.30 மணி அளவில் அதே பகுதிகளில் நிலவுகிறது.

காற்றழுத்த தாழ்வு மண்டலம்

இது மேற்கு-வடமேற்கு திசையில் நகர்ந்து தென்கிழக்கு வங்கக்கடல் மற்றும் அதனை ஒட்டிய அந்தமான் நிகோபார் தீவுகள் மற்றும் அந்தமான் கடல் பகுதிகளில் அடுத்த 6 மணி நேரத்தில் காற்றழுத்த தாழ்வு மண்டலமாகவும் (Depression), அதன் பிறகு, அடுத்த 24 மணி நேரத்தில் புயலாகவும் (Cyclonic Storm) வலுப்பெறக்கூடும். இது மேலும் மேற்கு வடமேற்கு திசையில் நகர்ந்து மத்தியமேற்கு வங்ககடல் பகுதிகளில் ஆந்திரப் பிரதேச கடலோரப் பகுதிகளுக்கு அருகில் 02-11-2026 ம் தேதி மாலை வேளையில் நகரக்கூடும்” என்று தெரிவிக்கப்பட்டிருந்தது.

புயல் எச்சரிக்கை கூண்டு

இந்நிலையில் வங்கக் கடலில் புயல் உருவாக கூடிய வானிலை சூழல் ஏற்பட்டுள்ளதால், 9 துறைமுகங்களில் 1-ஆம் எண் புயல் எச்சரிக்கை கூண்டு ஏற்றப்பட்டுள்ளது. இதன்படி சென்னை, கடலூர், நாகை, எண்ணூர், காட்டுப்பள்ளி, புதுச்சேரி, காரைக்கால், பாம்பன், தூத்துக்குடி ஆகிய 9 துறைமுகங்களில் ஒன்றாம் எண் புயல் எச்சரிக்கை கூண்டு ஏற்றப்பட்டுள்ளது.

ஒன்றாம் எண் புயல்

பொதுவாக புயல் காலங்களில் 1 முதல் 11 வரை புயல் எச்சரிக்கை கூண்டுகள் ஏற்றப்படும். பகல் நேரங்களில் மூங்கில் தட்டைகளால் ஆன கூண்டுகள் ஏற்றப்படுவது வழக்கம். இரவு நேரங்களில் வண்ண ஒளி விளக்குகளால் ஆன புயல் எச்சரிக்கை கூண்டுகள் ஏற்றுவார்கள்.

ஒன்றாம் எண் புயல் எச்சரிக்கை கூண்டு ஏற்றப்பட்டால், புயல் உருவாகக் கூடிய வானிலை சூழல் ஏற்பட்டுள்ளதாக அர்த்தம். துறைமுகங்கள் பாதிக்கப்படாமல், பலமாக காற்று வீசும் என்றும் பொருள் ஆகும்.

நாமக்கல் மாவட்டத்தில் 1,100-க்கும் மேற்பட்ட கோழிப்பண்ணைகள் உள்ளன. இங்கு சுமார் 4 கோடி முட்டையின கோழிகள் வளர்க்கப்பட்டு வருகின்றன. இதன் மூலம் நாள் ஒன்றுக்கு ஏறத்தாழ 3 கோடி முட்டைகள் உற்பத்தி செய்யப்பட்டு வருகின்றன.

20 காசுகள் உயர்வு

இந்நிலையில், நாமக்கல் மாவட்டத்தில் கோழி முட்டை கொள்முதல் விலை நேற்றை நிலவரப்படி 590 காசுகளாக (ரூ.5.90) இருந்து வந்தது. இதற்கிடையே இன்று நாமக்கல்லில் நடந்த தேசிய முட்டை ஒருங்கிணைப்புகுழு கூட்டத்தில் அதன் விலையை 20 காசுகள் உயர்த்த நிர்வாகிகள் முடிவு செய்தனர். அதன்படி, இன்று முட்டை கொள்முதல் விலை 610 காசுகளாக (ரூ.6.10) அதிகரித்துள்ளது.

கடந்த ஜூலை 31-ந்தேதி 6 ரூபாயாக இருந்த முட்டை விலை, தொடர்ந்து வெகுவாக குறைந்து வந்த நிலையில், தற்போது மீண்டும் முட்டை விலை ரூ.6.10 ஆக உயர்ந்துள்ளது குறிப்பிடத்தக்கது.

தெலுங்கானாவில் போலீஸ் ரோந்து வாகனத்தைக் கண்டு ஓடியபோது, வயல்வெளியில் மின்சாரம் தாக்கி கல்லூரி மாணவர்கள் 2 பேர் உயிரிழந்தனர்.

கல்லூரி மாணவர்கள்

தெலுங்கானா மாநிலம் ரங்காரெட்டி மாவட்டம். மொய்னாபாத்தில் கே.ஜி. ரெட்டி பொறியியல் கல்லூரி உள்ளது. இங்கு நேற்று இரவு மாணவர் விழா நடைபெற்றது. விழாவிற்குப் பிறகு, பல மாணவர்கள் கல்லூரிக்கு அருகிலுள்ள வயல்வெளிகளில் அமர்ந்து மது அருந்தினர்.

அந்த நேரத்தில், ஒரு போலீஸ் ரோந்து வாகனம் அங்கு வந்தது. இதைக் கண்ட மாணவர்கள் அச்சத்தில் ஓடினர். இதன் தொடர்ச்சியாக, ஒரு வயலில் பதிக்கப்பட்டிருந்த மின் கம்பிகள் தாக்கியதில் 2 மாணவர்கள் சம்பவ இடத்திலேயே உயிரிழந்தனர். சகமாணவர்கள் உடனடியாக இவ்விஷயத்தை கல்லூரி நிர்வாகத்தின் கவனத்திற்குக் கொண்டு வந்தனர். அவர்கள் இந்தச் சம்பவம் குறித்து போலீசில் புகார் அளித்தனர்.

விசாரணை

போலீசார் சம்பவ இடத்திற்கு வந்தனர். மாணவர்களின் உடல்கள் கைப்பற்றப்பட்டு, பிரேதப் பரிசோதனைக்காக உஸ்மானியா மருத்துவமனைக்குக் கொண்டு செல்லப்பட்டன. இந்தச் சம்பவம் தொடர்பாக போலீசார் வழக்குப்பதிவு செய்துள்ளனர்.

இந்த வழக்கின் விசாரணையின் ஒரு பகுதியாக, பல மாணவர்களிடமிருந்து சம்பவம் தொடர்பான விவரங்களை அவர்கள் சேகரித்து வருகின்றனர்.