'இந்தியன் 2' புரோமோஷனுக்காக மும்பை சென்ற கமல்

இயக்குனர் ஷங்கர் இயக்கத்தில் 1996- ம் ஆண்டில் நடிகர் கமல்ஹாசன் இரட்டை வேடத்தில் நடித்து வெளியான படம் 'இந்தியன்'. இப்படம் ரசிகர்களிடம் பெரும் வரவேற்பு பெற்று வசூல் சாதனை புரிந்தது. இப்படத்தில் நடிகர் கமலுக்கு ஜோடியாக மனிஷா கொய்ராலா நடித்திருந்தார். மேலும் சுகன்யா, கஸ்தூரி, கவுண்டமணி, செந்தில் என பலர் நடித்து இருந்தனர்.இதில் கமல் இந்தியன் தாத்தா வேடத்தில் எதிரிகளை அழிப்பது ரசிகர்களிடம் வரவேற்பு பெற்றது.

இதை தொடர்ந்து தற்போது 28 ஆண்டுகளுக்கு பிறகு 'இந்தியன் 2 ' படத்தை இயக்குனர் ஷங்கர் எடுத்துள்ளார். இப்படத்தில் கமல், பிரியா பவானி சங்கர், காஜல் அகர்வால், ரகுல் ப்ரீத் சிங், சித்தார்த், பாபி சிம்ஹா, சமுத்திரக்கனி என பலர் நடித்துள்ளனர். இப்படத்திற்கு அனிருத் இசையமைத்து உள்ளார். லைகா மற்றும் ரெட் ஜெய்ண்ட் நிறுவனம் இணைந்து இப்படத்தை தயாரித்துள்ளது.

இந்த படமானது கடந்த சில வருடங்களுக்கு முன்பாக தொடங்கப்பட்டது. அதன் பின்னர் ஒரு சில காரணங்களால் தாமதமான இந்த படத்தின் படப்பிடிப்பு கடந்த சில நாட்களுக்கு முன்பாக முழுவதும் நிறைவடைந்தது. அதே சமயம் இந்த படமானது ஜூன் மாதத்தில் வெளியாகும் என படக்குழுவினர் அதிகாரப்பூர்வமாக அறிவித்திருந்தனர். ஆனால் படம் ஜூலை மாதத்தில் வெளியாகும் என சமூக வலைதளங்களில் செய்திகள் பரவி வருகிறது. மேலும் இந்த படத்தின் டிரெய்லர் தயாராகிவிட்டதாகவும் இன்னும் சில நாட்களில் டிரெய்லர் ரிலீஸ் ஆகும் எனவும் கூறப்படுகிறது. அதுமட்டுமில்லாமல் இந்த படத்தின் பிரம்மாண்டமான இசை வெளியீட்டு விழா ஜூன் 1-ம் தேதி சென்னையில் நடைபெற இருப்பதாக நம்ப தகுந்த இந்த வட்டாரங்கள் தெரிவிக்கின்றன.

இந்நிலையில் இந்த படத்தின் புரோமோஷன் பணிகள் முழு வீச்சில் நடைபெற்று வருகிறது. இதற்காக தற்போது நடிகர் கமல்ஹாசன் மும்பை சென்றடைந்துள்ளார். இது தொடர்பான வீடியோக்களும் புகைப்படங்களும் இணையத்தில் வைரலாகி வருகிறது.