பஞ்ச்குலா,
அரியானா மாநிலம் பஞ்ச்குலா பகுதியில் அரசுப்பள்ளியில் படிக்கும் 11-ஆம் வகுப்பு மாணவனை சக நண்பர்கள் உதவியோடு 9-ஆம் வகுப்பு படிக்கும் மாணவன் கத்தியால் குத்தி கொன்றுள்ள சம்பவம் பெரும் பரபரப்பை ஏற்படுத்தியுள்ளது.
இச்சம்பவம் குறித்து போலீஸ் அதிகாரி ஒருவர் கூறுகையில், கடந்த திங்களன்று தன்னுடன் சண்டையிட்ட 11-ஆம் வகுப்பு மாணவனை, பள்ளி வளாகத்தின் வெளியில் சக மாணவர்களுடன் சேர்ந்து 9-ஆம் வகுப்பு படிக்கும் மாணவன் கத்தியால் குத்தி கொன்றுள்ளான். இது தொடர்பாக மாணவனை கைது செய்துள்ளோம். சண்டையின் போது இறந்த மாணவனை காப்பாற்ற முன்வந்த 10-ம் வகுப்பு மாணவனும் தாக்குதலுக்கு உட்பட்டு படுகாயமடைந்துள்ளான். இறந்த மாணவனின் உடலை கைப்பற்றி பிரேத பரிசோதனைக்கு அனுப்பி வைத்துள்ளோம். அதன் அறிக்கை வந்த பின்னர் முழு விவரங்களும் தெரியவரும். மேலும் இச்சம்பவம் குறித்து தீவிர விசாரணையை நடத்தி வருகிறோம் எனக் கூறினார்.