நாகப்பட்டினம்,
நாகை மாவட்டத்தில் 2011-18-ம் ஆண்டுகளில் சமூக நலத்துறை சார்பில் ரூ.144 கோடியில் நலத்திட்ட உதவிகள் வழங்கப்பட்டு உள்ளன என மாவட்ட கலெக்டர் சுரேஷ்குமார் தெரிவித்துள்ளார்.
நாகை மாவட்ட கலெக்டர் சுரேஷ்குமார் செய்திக்குறிப்பு ஒன்று வெளியிட்டுள்ளார். அதில் அவர் கூறியிருப்பதாவது:-
தமிழக அரசு ஏழை தாய்மார்களின் நலன் கருதி, சமூக நலத்துறை சார்பில் தாலிக்கு தங்கம், திருமண நிதி உதவி வழங்கும் திட்டம் ஆகியவற்றை செயல்படுத்தி வருகிறது. 2011-ம் ஆண்டு முதல் 2016-ம் ஆண்டு வரை தாலிக்கு தங்கம் மற்றும் திருமண நிதி உதவி வழங்கும் திட்டத்தின் கீழ் படித்த ஏழை பெண்களுக்கு உதவுகின்ற வகையில் 10-ம் வகுப்பு படித்திருந்தால் ரூ.25 ஆயிரமும், பட்டம் மற்றும் பட்டய படிப்பு படித்திருந்தால் ரூ.50 ஆயிரம் வழங்குவதுடன் தாலிக்கு தங்கம் 4 கிராம் வழங்கப்பட்டு வந்தது. மறைந்த முன்னாள் முதல்-அமைச்சர் ஜெயலலிதா, 2016-ம் ஆண்டு முதல் 8 கிராம் தங்கமாக உயர்த்தி வழங்க ஆணையிட்டார்.
படித்த ஏழை பெண்களுக்கு திருமண நிதி உதவி மற்றும் தாலிக்கு தங்கம் வழங்கும் திட்டத்தின் கீழ் 2011 முதல் 2016-ம் ஆண்டு வரை நாகை மாவட்ட சமூக நல அலுவலகத்தின் மூலம் 23 ஆயிரத்து 996 பயனாளிகளுக்கு தலா 4 கிராம் தங்கம் வீதம் மொத்தம் 95 ஆயிரத்து 840 கிராம் தங்கம் மற்றும் நிதி உதவியாக ரூ.107 கோடியே 34 லட்சம் வழங்கப்பட்டுள்ளது. 2016-2018 ஆண்டுகளில் ஆயித்து 750 பயனாளிகளுக்கு தலா 8 கிராம் தங்க நாணயம் வீதம் மொத்தம் 14 ஆயிரம் கிராம் தங்கம் மற்றும் நிதி உதவியாக ரூ.10 கோடியே 52 லட்சம் வழங்கப்பட்டுள்ளது. இரு பெண்குழந்தைகள் பாதுகாப்பு திட்டத்தின் கீழ் 2011-ம் ஆண்டு முதல் 2018-ம் ஆண்டு வரை 1 லட்சத்து 6 ஆயிரத்து 571 குழந்தைகளுக்கு தலா ரூ.25 ஆயிரம் வீதம் அவர்களது வங்கி கணக்கில் வைப்பு தொகையாக செலுத்தப்பட்டுள்ளது. மொத்தம் 1 லட்சத்து 32 ஆயிரத்து 317 பயனாளிகளுக்கு ரூ.144 கோடியே 5 லட்சம் மதிப்பில் நலத்திட்ட உதவிகள் வழங்கப்பட்டுள்ளன.
இவ்வாறு அதில் அவர் கூறியுள்ளார்.