பெண் கல்வியின் முக்கியத்துவம் குறித்து அரசு பள்ளி மாணவர்களுக்கான போட்டிகள்

பெரம்பலூர்,

பெரம்பலூர் ஒன்றிய ஒருங்கிணைந்த பள்ளி கல்வி மற்றும் இலவச கட்டாய கல்வி உரிமை சட்டம் ஆகியவற்றின் சார்பில் அரசு பள்ளி மாணவ- மாணவிகளுக்கு பெண்கல்வியின் முக்கியத்துவம் மற்றும் சுத்தம், சுகாதாரம் சார்ந்த பேச்சு, கட்டுரை, ஓவிய போட்டிகள் வட்டார அளவில் நேற்று நடத்தப்பட்டது. இதனை ஒருங்கிணைந்த பள்ளி கல்வியின் மாவட்ட ஒருங்கிணைப்பாளர் குணசேகரன் தொடங்கி வைத்தார். நேற்று காலையில் 1-ம் வகுப்பு முதல் 3-ம் வகுப்பு வரையிலான மாணவ, மாணவிகளுக்கு ஓவிய போட்டியும், 4-ம் வகுப்பு முதல் 5-ம் வகுப்பு வரையிலான மாணவ- மாணவிகளுக்கு பேச்சு, கட்டுரை போட்டிகளும் நடத்தப்பட்டது. மதியத்திற்கு பிறகு 6-ம் வகுப்பு முதல் 8-ம் வகுப்பு வரையிலான மாணவ- மாணவிகளுக்கும், 9-ம் வகுப்பு முதல் 12-ம் வகுப்பு வரையிலானவர்களுக்கும் தனித்தனியாக போட்டிகள் நடத்தப்பட்டது. இதில் அரசு பள்ளிகளில் இருந்து ஏராளமான மாணவ, மாணவிகள் கலந்து கொண்டு தங்களது திறமைகளை வெளிபடுத்தினர். இதில் முதல் மூன்று இடங்களை பிடிப்பவர்களுக்கு பரிசுத் தொகை வழங்கப்படவுள்ளது. போட்டிகளில் முதலிடம் பெறுபவர் வருகிற 11-ந்தேதி நடைபெறும் மாவட்ட அளவிலான போட்டிகளில் கலந்து கொள்ள தகுதி பெறுவர். இதில் வட்டார கல்வி அதிகாரிகள் ராமதாஸ், செந்தாமரை செல்வி, மேற்பார்வையாளர் தேவகி ஆகியோர் கலந்து கொண்டனர்.