புதுச்சேரி,
புதுச்சேரி சட்டசபையில் மானிய கோரிக்கை மீதான விவாதத்தில் குடிமைப் பொருள் வழங்கல் துறை குறித்து நடந்த விவாதம் வருமாறு:-
அசோக்ஆனந்த் எம்.எல்.ஏ. (என்.ஆர்.காங்.):- எனது தொகுதியில் 3 ஆயிரம் சிவப்பு நிற ரேஷன் கார்டுகள் தான் உள்ளன. ஒரு சில தொகுதியில் 10 ஆயிரம் சிவப்பு நிற ரேஷன் கார்டுகள் உள்ளன. இதுதொடர்பாக அமைச்சர் உரிய நடவடிக்கை எடுக்க வேண்டும்.
சபாநாயகர் வைத்திலிங்கம்:- ஒரு ரேஷன் கார்டுக்கு 10 கிலோ, 20 கிலோ என்று அரிசி வழங்குகிறோம். எத்தனை பேர் உள்ளனரோ அதற்கேற்ப பொருட்கள் கொடுத்தால் பிரச்சினை வராது. நாம் ரேஷன் கார்டு வீதம் பொருட்களை கொடுக்கிறோம். இதனால் ஒரு குடும்பத்தில் 3 பேர் இருந்தாலும், ஒரு கார்டை இரண்டாக பிரித்து விடுகின்றனர்.
அமைச்சர் கந்தசாமி (குடிமைப்பொருள் வழங்கல்துறை):- ஒரு நபர் உள்ள அட்டைதாரர்கள் கூட 20 கிலோ அரிசி வாங்கிச் செல்கின்றனர்.
சபாநாயகர் வைத்திலிங்கம்:- அதனால் தான் குடும்ப உறுப்பினர்கள் எண்ணிக்கை அடிப்படையில் பொருட்கள் வழங்குங்கள் என்கிறேன். ரேஷன் கார்டு மூலம் ஒரு வீட்டிற்கு 2 இலவச பொருட்கள் வழங்கப்படுகிறது. இதனால் பலர் ரேஷன் கார்டை பிரித்து வருகின்றனர்.
அன்பழகன் எம்.எல்.ஏ. (அ.தி.மு.க.):- மத்திய அரசு இலவச அரிசிக்கு தரும் பணத்தை ஒரு ரேஷன் கார்டுக்கு என்று வழங்கவில்லை. ரேஷன் கார்டுகளில் உள்ள உறுப்பினர்கள் எண்ணிக்கை அடிப்படையில் தான் வழங்குகிறது.
அமைச்சர் கந்தசாமி:- ரேஷன் கார்டு தொடர்பாக ஆய்வு செய்யப்போனால், சட்டமன்ற உறுப்பினர்கள் எதிர்ப்பு தெரிவிக்கின்றனர்.
அசோக் ஆனந்த் எம்.எல்.ஏ:- நீங்கள் எந்தவித ஆய்வும் செய்யாமலேயே ஆட்சிக்கு வந்த முதல் 6 மாதத்தில் 12 ஆயிரம் சிவப்பு நிற ரேஷன் கார்டு கொடுத்து இருக்கிறீர்கள்.
அமைச்சர் கந்தசாமி:- இந்த பிரச்சினையை தீர்க்க குடும்ப உறுப்பினர்கள் எண்ணிக்கை அடிப்படையில் ரேஷன் கார்டுக்கு பொருட்கள் வழங்க நடவடிக்கை எடுக்கப்படும். இவ்வாறு விவாதம் நடைபெற்றது.