மும்பை,
மராட்டிய அரசு சார்பில் பாரத ரத்னா விருது பெற்ற பழம்பெரும் பாடகி லதா மங்கேஷ்கர் பெயரில் கடந்த 1992-ம் ஆண்டு முதல் விருது வழங்கப்பட்டு வருகிறது. லதா மங்கேஷ்கர் விருது பெறுபவர்களுக்கு ரூ.5 லட்சம் பணப்பரிசு மற்றும் சான்றிதழ் வழங்கப்படுகிறது.
இந்தநிலையில் 2020-21 ஆம் ஆண்டுக்கான லதா மங்கேஷ்கர் விருது அவரது சகோதரி உஷா மங்கேஷ்கருக்கு (வயது84) வழங்கப்பட உள்ளது. இந்த முடிவை மாநில கலாச்சார துறை மந்திரி அமித் தேஷ்முக் தலைமையிலான கமிட்டி எடுத்து உள்ளது. மேலும் லதா மங்கேஷ்கரின் 91-வது பிறந்தநாளில் இந்த அறிவிப்பு வெளியிடப்பட்டுள்ளது.
இதற்கு முன் லதா மங்கேஷ்கர் விருதை பாடகி ஆஷா போஸ்லே, சுமன் கல்யாண்புர், இசையமைப்பாளர் ராம்-லெட்சுமண், உத்தம் சிங், உஷா கன்னா ஆகியோர் பெற்றுள்ளனர்.
இதற்கிடையே முதல்-மந்திரி உத்தவ் தாக்கரே, தேசியவாத காங்கிரஸ் தலைவர் சரத்பவார், துணை முதல்-மந்திரி அஜித்பவார், மந்திரிகள் அனில் தேஷ்முக், ஏக்னாத் ஷிண்டே, நவாப் மாலிக், நிதின் ராவத், சட்டசபை எதிர்கட்சி தலைவர் தேவேந்திர பட்னாவிஸ் உள்ளிட்ட பலர் பிறந்தநாள் வாழ்த்து கூறியுள்ளனர்.
