கிருஷ்ணகிரி,
மத்திய அரசின் சார்பில் ஆண்டு தோறும் 10-ம் வகுப்பு படித்து கொண்டிருக்கும் மாணவர்களுக்கு தேசிய திறனாய்வு தேர்வு நடத்தப்படுகிறது. இந்த தேர்வில் தேர்ச்சி பெறுபவர்களுக்கு பிளஸ்-1, பிளஸ்-2 படிக்கும் காலங்களில் மாதந்தோறும் ரூ. ஆயிரத்து 250 கல்வி ஊக்கத்தொகையும், இளங்கலை, முதுகலை படிப்பு முடியும் வரை மாதந்தோறும் ரூ. 2 ஆயிரமும் வழங்கப்படுகிறது. இத்தேர்வு நேற்று தமிழகம் முழுவதும் நடந்தது.
கிருஷ்ணகிரி மாவட்டத்தில் கிருஷ்ணகிரி -2, ஓசூர் -4, காவேரிப்பட்டணம் -2, சூளகிரி, வேப்பனப்பள்ளி, தேன்கனிக்கோட்டை, பர்கூர், மத்தூர், போச்சம்பள்ளி, ஊத்தங்கரை ஆகிய இடங்களில் தலா 1 மையம் என மொத்தம் 15 மையங்களில் தேர்வு நடந்தது. இந்த தேர்வினை எழுத 4 ஆயிரத்து 232 மாணவ, மாணவிகள் விண்ணப்பித்திருந்தனர். தேர்வினை 3 ஆயிரத்து 834 மாணவ, மாணவிகள் எழுதினர். 398 மாணவ, மாணவிகள் தேர்வினை எழுத வரவில்லை. கிருஷ்ணகிரியில் நடந்த தேர்வு மையத்திற்கு மாவட்ட முதன்மை கல்வி அலுவலர் மகேஸ்வரி, மாவட்ட கல்வி அலுவலர் ராஜா ஆகியோர் நேரில் சென்று பார்வையிட்டு ஆய்வு செய்தனர்.